كان ودي انزل نفس الموضوع من كم يوم بس الحمد لله سبقتيني
انا زوجي يروح الدوام اول الاسبوع ويرجع على الويك اند بصراحة تعبانة نفسيا ومش مرتاحة خاصة ان زوجي يعتمد علي كثير فصار ما يتحمل اي مسؤلية ويجي كانه ضيف وكمان ما يتصل ويسأل لانه دائما مشغول
نفسيتي تعبت واتمنى اجد عندكم بعض الحلول للملل الي اصبح لا يفارقني

لاحظت انه فيه منكم وااايد تعبانين مثلي بنات انا ما اعتقد اذا زوجج يغيب عنج هذا شيحلو بالعكس والله انه احس من خلال تجربتي اول ما تزوجت كان زوجي يشتغل قريب من البيت يعني يروح الصبح ويي الظهر والله يا بنات انه ما كان يستغني عني وطوال سنتين او اكثر كان ما يطيق فراقي يوم وبعد ما اشتغل بعيد عني والله احس انه فراقي بنسباله عيد حتى لما يكون عنده اجاازه احس انه ما يحب يجلس عنده ومسوله اهتمامات انيه واستوى انسان مادي كل تفكيره بالفلوس والله هذا الشي اثر على نفسيتي وااايد استويت انسانه ما احس بطعم الحياة والي قاهرني انه يدري بحزني والمي وبعد كل هذا ما فيه احساس يشوف دموعي بعيونيوالله العظيم عنده عادي طبعا لاه تعود على فراقي احيانا اكر اشتغل علشان اسلي نفس ويحس اني منشغله عنه علشان يحس عى دمه شوي

ليش الزوجة ما تشوف الجانب الايجابي من البعد عن الزوج بسبب العمل
اول شئ لابد ان الزوجة تبعد عن راسها الوساوس والشك والافكار السلبية وتسد اذنها عن اي كلام من الناس اللي مالها شغلة غيرانها تحسسك انك ناقصة وغير سعيدة لان زوجك يالمسكينة بعيد عنك و تحاول تدخل الشك والريبة بقلبك ان البعيد عن العين بعيد عن القلب
خلي وقت فراغك سبب لتطوير نفسك ادخلي دورات كملي دراستك اذا تركتيها خلي وقت للأهتمام بجمالك ورشاقتك اقري كتب عن الحياة الزوجية وكتب بالعلم النفس خلي بعض الوقت للزيارات وصلة الرحم والخروج مع الصديقات اكثري بهذا الوقت من العبادات
اهم شئ انك تكسبي ثقة زوجك فيك وتقنعية انه يسمحلك بالخروج وهو بعيد وبالقليل من الحرية اللي ان شاءالله تكوني على قدر المحافظة عليها وحاولي كل ماحبيتي انك تخرجين حتى وانتي ببيت اهلك اتصلي عليه وخذي الاذن وحسسيه حتى وهو بعيد انك تبحثي عن رضاه وانك على قدر الثقة اللي اعطاك اياه
وهذي نصحية مني قبل ما يجي زوجك كم يوم ليش ما تجهزي كم طبخة وكذا نوع حلى وخليها بالفريزر عشان لما يرجع بالسلامة تذوقية من طبخك وحلاك وبنفس الوقت ما تقضي وقت طويل بالمطبخ والطبخ وتستغليه مع زوجك
انا اقول هذا الكلام من تجربة وانا وزوجي سعيدين وحياتنا خالية من المشاكل لأننا نحاول نقضي الوقت كل واحد يحاول انه يسعد الثاني بالوقت القصير اللي نقضيه مع بعض والحمد لله
والله ان بعض البنات يحسدوني ان زوجي يعبد كم يوم ويتمنون ان رجالهم يسافروا عشان يرتاحوا من الروتين ويتفرغوا لأنفسهم ويشتاقوا شوي لرجالهم

السلام عليكم اخواتي انا اعظم حال منكم فانا لظروف انتظار التحصل على إقامه في امريكا اضطررنا انا و زوجي ان نعاني من البعد راجين الله ان يجمعنا تزوجنا منذ سنتين بقي معي شهرين بعد الزواج ثم ذهب ولم اره الا بعد ١٠ اشهر وبقينا معا قرابة ٤ اشهر ثم رجع و لكن الحمد لللاه على كل حال فهذا ابتلاء من الله فاحتسب الاجر عنده

حطيتوا ايدكم على الجرح..اااه واااه واااااااااه...

انا زوجي طبيعة عمله كثرة السفر....يعني في الشهر يسافر حوالي اربع مرات...تخيلوا..وكل مره 5 ايام...ومرات يكمل اسبوعين..ومرات تزيد عن الشهر؟؟؟ا ذا كمل اسبوع عندنا يكون عيد...

شو اقولكم...ابدا ابدا مافي استقرار...خاصة ان عيالي ياحليلهم صغار ومتعلقين في ابوهم...الكبيره توها بتكمل اربع سنين...والثاني 3 سنين..والاخير 8شهور...
الحمدلله اني اسوق...يعني اذا احد مرض لا سمح الله او صار شي..سيارتي موجوده...لكن والله مافي شي يسد مكان الاب..
.خاصة اني ما احب اسوق ولا احب اطلع... لكن شو اسوي للضروره احكام...
لاتقولون لي ايجابيات وما ايجابيات.تعب تعب ما بعده تعب...الحمدلله على كل حال..

..الزواج للإستقرار...وعدم استقرار الزوج يأثر حتى على نفسية الاطفال...هذي وجهة نظري واتمنى تتقبلونها