مثل ماواعدتكم ياحلوات إني أحط لكم منيو العزايم الرمضانية
ولأني ملتاعة من هالعزايم اللي تطب علي فجأة .. يعني ماأدري
إلا الحبيب جاي بعد صلاة الظهر وهو مبسوط ويقول ترى اليوم عندي ارجال :icon28:!!!!!
كم هم يالحبيب؟؟؟
أنا عزمت عشرة ويمكن يجون ثمانية !!!
حبيبي على باله يبسط لي المسألة ؟؟؟
ومن غير ولا كلمة تعلن حالة الطوارئ في البيت كله ..
لا والأدهى إذا جا من الدوام وقال توني مريت على أبوي أسلم عليه وعزمته على الفطور ؟؟
ياقلبي أنا والله إني أقعد خمس دقايق طايرة بوهتي :blink:(على كلام القصمان) لما أستوعب الصدمة
لأن معنى هذا بتجي الحمولة كلها بقضها وقضيضها ..
أبوه وحريمه إخوانه وحريمهم خواته ورجالهن
فأضطر أعمل أربع سفر .. سفرة للرجال وسفرة للنسوان وسفرة للأطفال وسفرة للشغالات
هالمرة قلت ليش ماأحط لي قائمة بحيث إني أكون
على استعداد في الحالات الطارئة لأن زوجي صاحب سوابق بالعزايم اللي تجي بهالطريقة
ولأنه كثير من الوقت يروح علي وأنا أفكر وش أطبخ ؟؟؟
لاتجي وحدة تقولي رمضان مو للطبخ نعم هذا صحيح وأيد بقوة لكن لاصار عندك زوج مثل
زوجي و ماأحب أرد أحد أبد والله لو أجيب لهم من المطعم ولا أقول لا ولا ليش تعزم ؟؟ !!
و مقارنة بعزايم والدي الله يخليه لنا اللي معودنا إنه يجي بعد صلاة الظهر ويقول لأمي
ترى عندي ضيوف بالمجلس ويبون يتغدون وبعد كل فرض صلاة يدخل معاه مجموعة أقلها
اقهوة وشاي وفواكه ..!! وعلى حسب الوقت إن كان غدا ولا عشا ولا فطور رمضان ولا فطور الأيام العادية
فأقوم وأحتسب الأجر وأشمر عن ذرعاني وأدخل المطبخ ..
أعرف طولت عليكم بس لابد من باب الفضفضة ولا تجيني اعتراضات من
بعض الحبيبات الله يجزاهن خير إن رمضان مو للطبخ لايبلاهن الله بواحد مثل أبوي ولا في أقل الأحوال مثل زوجي ........
وعندي قائمتين فقط لأن غالبا الضيوف مايتكررون
وثانيا يصير عندك خبرة بنفس القائمة فتكون المهمة أسهل إن شاء الله
أبحط القائمة الأولى ,إذا أعجبتكم كملت لكم القائمة الثانية
بسم الله نبدأ
الفطور : قطايف بالجبنة . لقيمات . كرواسان بالقرفة . بف باستري بالمكسرات
العصيرات مع الفطور : ليمون بالنعناع . جوافة بالحليب والموز . عصير تفاح(جاهز) . كوكتيل
العشا :
السلطات : سلطة خضراء . سلطة فرنسية . بابا غنوج
المقبلات : كفتة البطاطس (مفرز ) . ورق عنب(مفرز أو جاهز) . بيتزا (مفرز). بطاطا مشوية .مصابيب بالمارتديلا
سمبوسة ( مفرزة ثلاث أنواع )
الشوربات :شوربة ماجي بالفطر . شوربة عدس . شوربة كويكر .
الأطباق الرئيسية : مكرونة بالبشاميل . طيور سمان محشية . محشي كوسة .
حلى السفرة : قدرة قادر . جيلي بالقشطة (ثلاث الوان ).تشيز كيك بالشوكلاته والنسكافيه
بعض الاحيان أضيف الحلويات والمشروبات الباقية بعد الفطور .
وإن شاء الله يحوز على رضاكم
اللهم صل على محمد
يلزم عليك تسجيل الدخول أولًا لكتابة تعليق.
""زااهية الألوان""
•
نسيت أقول لكم بعض الأحيان أسوي رز على حسب رغبة الضيوف إذا يفضلون الرز مع العشا ولا لا .
مــرام
•
الله يعطيك العافيه ويبلغنا الشهر واحنا بأحسن حال ..
أما بخصوص الرز إحنا نخليه للعشا او للسحور .
أما بخصوص الرز إحنا نخليه للعشا او للسحور .
nood
•
ايه والله اكررره هالحركات زوجي من راعينها يعني يكلمه احد العصر يحلف عليه يجي يفطر عندنا من العلم انا شوين واسوي علي قدنا ويقولي ليه تعصبين عادي فطورنا العادي والله رفعة الضغط عاد هالسنه قلت بسوي طبق رايسي 2 بدل واحد للزنقات وغير الي معه من شوربه وفطاير ...
اللهم بارك لنا في شعبان وبلغنا رمضان يارب العالمين
اللهم بارك لنا في شعبان وبلغنا رمضان يارب العالمين
الله يعطيك العافية وكملي قائمتك الاولى روعة بس ياليت تحطين الطريقة لكل نوع >>> وسيعة وجه خخخ
والله يبلغنا الشهر بصحة وسلامة
والله يبلغنا الشهر بصحة وسلامة
الصفحة الأخيرة