السلام عليكم ورحمة الله وبركاته ...
كيفكم حبيباتي ؟
عساكم دائماً في خير وبخير
من زماااان وانا ودي اكتب لكم تجربتي والتي كان لها اثر كبير في رفع معنويات اللي حولي وإثارة عزيمتهم وهالشيء خلاهم يمشوا على نفس المسار وصاروا مثلي ماشاء الله تبارك الله ..
اولا انا دبدوبه بالفطره :)
من لما اعرف نفسي وانا متينه ..
وكنت اظهر اكبر من اللي هم في سني بكثير
ومايخفى عليكم وش يجي وراء هالاحساس من احباط وعزله
المهم كبرت ولا زلت نجلاء الدبدوبه ..
دخلت الكليه وتخرجت وانا من فتره لفتره اعمل ريجيم انقص كم كيلو
وبعدها ارجع اللي نقصته وفوقه الضعف ..
تخرجت وتزوجت .. وقبل زواجي عملت ريجيم نقصت فيه لحد ماوصلت السبعين
وبس تزوجت حملت وزاد وزني زياده مفرطه واجيب الاول عمليه قيصريه
وهالشيء حرمني من الرياضه وشد البطن بعد الولاده
وتجلس اختكم كم شهر وتحمل بالثاني
واجيبه والكبير عمره بس سنه ونص
ولكم ان تتخيلوا كم صار وزني ..
فوق الميه:44:
وجلست بعد الثاني سنين اعمل ريجيم وارجع ابطل وهكذا ...
لحد ماجاء اليوم اللي كان بداية الانطلاقة والتغيير الجذري ..
وقتها كان وزني 102
فكرت وقلت يابنت ليه ماتخففي بس وتمشي وتبذلي مجهود كبير
وطبعا قلت ماراح استخدم اي ريجيم ولا راح اكل اي شيء ماكنت اكله من اصناف الريجيم
ولا احرم نفسي من اي شيء لأني ابغى هذا يكون هو اسلوب حياه امشي عليه طول العمر
وفعلا بدأت وكانت بدايتي في شهر صفر 1430هـ قبل ثلاث سنوات
وكان نظامي كالتالي :
وانا اعمل بالصباح معلمه
الساعه سبعه : كنت اخذ تمر وقهوه حبه او ثلاث حبات المهم يكون وتر ,
الساعه عشره : من ربع الى ثلث خبز ابيض واكله مع بيضه وحده وجبنه وفول وسلطه لحد مااخلص هالربع وكانت اللقمه صغيره مره عشان اشبع واحسس نفسي اني اكلت كثير وشبعت واشرب شاي محلى عادي
وبعدها لما اروح البيت اصلي الظهر وانام واصحى قبل العصر اعمل الغداء لعيالي وانا اخذ لي حبه فاكهه واطلع من البيت امشي من بعد العصر لحد أذان المغرب وارجع ع الاذان ..
اصلي المغرب وبعدها ارجع اعمل تمارين واحيانا اكتفي بالرقص ..
والرقص يابنات وش اقول لكم عنه وربي انو خطيييير .. هو السبب الاكبر بعد توفيق الله في انزال وزني من تحت ..
وبعد التمارين والشاور الدافي اجلس اتغدى وهو طبعا غداء عشاء
وكان عباره عن صحن سلطة كبير و6 ملاعق رز احمر من اللي عملته للأولاد وربع دجاجه
وبعدها بكم ساعه اذا اشتهيت اي شيء اكل منه بس بكميه بسيطه زي الشكولاته مثلاً ...
واستمريت على هالوضع شهور نزلت من 102 إلى 55
وقولوا ماشاء الله
والحين لي اكثر من سنتين وانا محافظه على وزني
وكل من شافني وربي مايعرفني
يقولون ماعرفناك الا بصوتك :27:
كل شيء فيك تغير وللأحسن ولله الحمد
ظهرت ملامحي وبان جمالي .. كنت ظالمه حالي
تصدقون وربي يشهد انه قبل ثلاث سنين كنا عاملين حفل للمتقاعدات في الاستراحه وجات اختي معايه وكانت بثالث ثانوي
وفكروها بنتي
واني الحين مايصدقون الناس اني متزوجه ولما اقولهم انه عندي ولدين والكبير بالصف الاول ينهبلوا ويقولوا مستحييييل
والبلاء كان في الشحم واللحم الله لايعاوده لنا ولا لكم ويعطي العزيمه كل من يحتاجها يااارب ويعينه حتى يصل للوزن المثالي ..
ملاحظه : اثناء التخفيف كنت استخدم حبوب بيورين ان للشعر خوفا من التساقط وهيك
والحمد لله شعري ماتأثر ولله الحمد ...