من هي عواطف ابلعيهم ( بطاقة شخصية )

سلام عليكم
صبحكن الله بالخير يا حريم وش لونكن طاب لونكن
أسفيه على هلانقطاع المفاجي
أحب أسلم عليكن كلكن وحده تنطح الأخرى
وأحب أشكر كل الي راسلنن خاص أو على الأيميل حقي يسألني عن الغياب المفاجئ وأخص أختي صبا الأيام الحبوبه الى ما زالت تسأل عني والباقيات بدون تخصيص
على العممو عندي موضوع اليوم
وهالاموضوع بعد من زمان حريم عالم حواء أرسلن لي ايميلات يبغن مني انشرة
لكن ابشرن والله بعزكن وبعز كل الي يعز عليكن

عواطف ابلعيهم
البطاقه الشخصيه
أسمي الحقيقي عواطف
وأسمي بعالم حواء عواطف ابلعيهم = عواطف اب لعيالها
وسبق وني فسرت معنى ابلعيهم

الحاله الاجتماعيه
متزوجه وعندي بنيوات الله يصلحهن أكبرهن بنت أسمها ( بقشه ) الله يصلحها ويخليها لميمتها
المؤهل الدراسي سادس
عندي شبك غنم به معيزات وصخال يجي عددهن حول 150 راس
وزوجي عنده 344 راس
أعرف احلب الغنم واسرح بها وهذا سبب غيابي عنكم هالفترة
لان هالفترة فترة امطار وخيرات والعشب ابشركن طلع والخير والعلوم الغانمه

البلد
السعوديه - في حايل عروس الشمال

ساكنه بحارة كل الي بها بدو
جاراتي هن
1- المصرقعيه
( هذا لقب مني لها بس اسمها الحقيقي رفضت اني اعلمكم به ) وهي أعز جاراتي بالحقيقه وحبوبه وأميه لا تقرا ولا تكتب بس سنعه وقرما تعرف تصلح البهم ( الغنم ) وتعرف تحلبها وتلعفها وتسرح بها
2- وضحى
وهذي بعد من جاراتي الحبيبات بس لو تسلم من الحش تمام
3- جارات حليلات بس كلهن عجايز ساكنات بحارتنا

كيف عرفت شبكة عالم حواء وكيف تعلمت اصلا للكمبيوتر
بالبدايه تستغربون مني كيف تعلمت وكيف ان بدويه مثلي خشت عالم حواء وخشت الانترنت
وما معها الا سادس بس
بالبدايه انا مرة قبل سنتين سيرت على بنت من صديان وصديان ديرة بحايل الوكاد البنت هذي متعلمه ومخلصه الجامعه بس ما لقت وظيفه للحين وعندها ببيتها كمبيوتر
بالبدايه قالت لي فيه موقه بالانتر نت اسمه عالم حواء وفيه كذا وكذا
عاد انا تحمست قلت ممكن تعلميني عليه قالت ايه بس بشرط اجيتس كل يوم الساعه اربع العصر واعلمتس عليه شهر كامل مقابل 1000 ريال قلت ابشري 1500 مو 1000 قالت اتفقنا

عاد انا رحت وخذيت عنزين من معزاء وقلت لبو البنات يبيعها ويشتري لي كمبيوتر
راح وباع المعزاء وشرا لي كمبيوتر
وعلمتني عليه البنت هذي وصرت محترفه عليه
بدوييه ولقت انترنت
وهالكلمه دايم تقولها المصرقعيه الله يسلمها
وهذي السالفه
وسلامتكن