المفروض يكون اول شي تبدين فية من تجهيزك .. لأنه اهم قطعه بجهازك ..
وغالباً تفصيل فستان فخم ياخذ من شهر ونص الى شهرين شغل .. وحلو انه يكون بدولابك قبل الزواج
بفترة كافيه في حال لو لاقدر الله ماطلع حلو او شي, يكون فية مجال للتعديل او البحث عن بديل
بعد ماتخلصين من هم فستان لزواج ..
جيبي نوته وقلم ..
واكتبي التجهيزات المهم اللي تحتاجينها حسب مهرك وميزانيتك اللي ممكن تزيدين بها على المهر
وعلى حسب ظروف زواجك واهل زوجك ..
مثلا ً..
تجهيز اللي بتسافر لبعثه بعد الزواج مباشرة يختلف عن تجهيز اللي ماراح تروح ..
وتجهيز اللي بتسكن في بيت لحالها يختلف عن اللي في بيت حموله
كل زواج وله ظروف ..
في بنات كثير تتزوج وبعدة باسابيع تسافر لمده سنه او سنوات .. وفي هالحاله ماراح تحتاج
فساتين سهره بشي وشويات .. لانها ماراح تستخدمهم ..
ولا راح تحتاج اشياء كثير تحتاجها اي عروس مقيمه ..
تقسيم المهر }
نجي لاهم نقاط تقسيم المهر واللي اغلب العرايس يسألون عنها ..
المهم يختلف من بنت للثانيه .. فية اللي مهرها 30 الف .. وفية اللي 300 الف ..
كل وحدة وظروفها وامكانياتها وعادات مجتمعها ومدينتها ..
وفية بنات اهلهم مقتدرين او هي موظفه, ولو ماكفى المهر تقدر تزيدة لكن فية بنات امكانياتهم على قدهم
ولازم يقسمون المهر بحكمه وذكاء .. لان من حق كل عروس تكون انيقه ..
حتى لو ماجهزت من الماركات العالميه ..
وعلى فكرة .. موضروري تضفين السوق كله وكانه بيسكر وماعاد هوب فاتح
اهم شي يكون عندك الاساسيات وفساتين مناسبات مع اكسسواراتهم وبعض الاحتياجات
الاساسية لكل عروس .. بس الضف بالجمله ذا ماله سنع
الموضه تتجدد كل كم شهر .. وممكن تحملين بعد شهر او شهرين وماعاد تستفيدين من كل ملابسك
وبدال ماتشترين كميه كبيرة من التجهيزات العاديه عشان مهرك قليل
خليها كميه قليله بس من ماركات جيدة وتواجه حتى لو كررتيها ..
مثلا ً..
بدال ماتشتريين بـــــ> 4 الآف 10 شنط من نوعيات متواضعه .. اشتري بس 2 من ماركات حلوة
ومعروفه + كلتش سهرة .. وصلى الله وبارك ... على الاقل وين ماتروحين الا شنطتك حلوة وتواجه
لان للاسف الحين صار اول حكم مسبق على مظهرك يتم من خلال شنطتك ..
قل لي وش ماركه شنطتك اقول لك من انت!!!!
هذا مجرد مثال فقط ,, عشان بس توصل الفكرة ..
ولكل قاعدة شواذ ولكل وضع استثناء .. انتي تحددين احتياجاتك حسب مجتمعك
مثلا بعض المجتمعات يكون المهر كامل للزوجه بس لاغراضها الخاصه
والزوج يتكفل بتجهيز البيت كامل من ادوات مطبخ واكسسوارات وخلافه
والبعض لا .. يكون مطلوب من الزوجه تشتري من مهرها المواعين والمفارش واطقم واكسسوارات الحمام
الخ ..
يعني هالشي انتي بس الاقدر على تحديده .. وعلى ضوءة تقسمين مهرك وتخصصين لكل
حاجه قيمتها
نصائح مهمة }
لما تشترين أي شي خليه قدامك ... او اكتبي بالنوته وش شريتي بالضبط ومن وين
واهم شي قيسيه وتأكدي من مقاسه بالضبط عشان تبدلينه في وقته قبل تنسين
لانه كثير بنات يجلسون كم شهر يجهزون وينسون وش اشتروو وممكن يكررون القطع والالوان مع الربشه ..
الافضل لو تشترين المعلاق المتنقل مثل حق المحلات .. تلقينه متوفر باماكن كثير
مثل هوم بلازا + جدة للديكور + ايكيا
وتشترين المعاليق ةاكياس الفساتين .. وتخلينهم قدامك بالغرفه معلقين ومرتبين ومغلفين عشان وقت النقل
يكون سهل لك بس تشيلينهم وتعلقينهم مكانهم
..ومنها يكونو قدامك وتعرفين وش شريتي ووش ناقصك
حتى اللانجري اشتري البوكسات حقت ايكيا ورتبيها فيها .. خليها جاهزة عشان ماتنحاسين من النقل
طبعا اول شي بعد فستان الزواج هو فساتين السهرة ..
اشتريها او فصليها وارتاحي من همها .. لان الاشياء الثانيه كلها جاهزة بالسوق وتقدرين تخلصينها بسرعه
بس اي شي يبي خياط هو المشكله..
لو حبيتي تجربين مشغل ولا خياط جديد, لاتغامرين وتحطين اقمشتك الغاليه عنده وانتي ماجربتية قبل!
لان فية ناس اللي يصلحهم ماعندهم اخلاص بالمدح .. يمدحون لك خياط ويوصلونه السماء
وممكن يكون صدفة ضبط معم وانتي تتوهقين .. جربي اول مرة بقطعه عادية وشوفي نتيجتها
لو تمام خلاص كملي معه .. عشان كذا محتاجه انك تبدين بالتجهيز بدري
حتى لو زواجك باقي له 5 او 6 شهور .. صدقيني الوقت يمر بسرعه وماتدرين الا باقي شهرين
او اقل وتتكركب كل امورك فوق بعض
احتياجات العروس }
طبعاً القائمه التاليه ليست الزامية .. بل مجرد نموذج يشمل اقل الكميات المعقوله, وحاولت اغطي بها
ادق واهم احتياجات كل عروس .. ومثل ماقلت كل مجتمع وايش متعود ان العروس تشتري .. :
* فستان الزواج .. واللي يبدأ سعرة في اقل الأحوال من3000 ريال فمافوق
محلات مقترحه في حال الجاهز:
(بروفينيياس + رهيد + مختارات العبد الواحد + الندى الفضي + انتي الاميرة
وكذا محل بعد وكلهم بالعليا العام ماعدا الندى الفضي في طريق الملك عبد العزيز )
* فساتين السهرة .. واتوقع 5 فساتين عدد مناسب .. وممكن اقل لو اهل زوجك
موب راعين مناسبات او انهم في مدينه اخرى وطبعا في ابسط الاحوال يبدأ سعر الفستان الواحد من الف ريال
فما فوق ..
(كفالي في ساكس افنيو + حياه مول + العليا مول +سنتريا في حال الجاهزة
مركز نجود + هارفي نيكلز )
(الاقمنشه : عمر بن صديق + اسواق الاندلس + العليا مول +رويال مول + الرمال + صالح الرماح )
* اطقم مناسبات وعزايم وفساتين عاديه ... اتوقع من 6ل7 اطقم كامله كافيه جدا ..
(المملكه + الفيصليه + غرناطه + حياة مول + صحارى +سنتريا + بنوراما مول+ السواني )
* شنط اليد .. مثل ماقلت سابقا .. اتوقع 2 من ماركه جيدة افضل من عدد كبير وانتي حرة
لكن من 2 الى 3 اتوقع عدد معقول .. + شنطة او 2للسهرات والمناسبات .. ولو ميزانيتك مبحبحه
ممكن تزيدين العدد ..
(سنتريا + المملكة + الفيصلية في حال لو تبين ماركات )
أو:
( الدو + ناين ويست + تشارلز أند كيث + ميلانو سكوير )
* شوزات للسهرة .. اتوقع 3 كفايه .. اسود ونيوود ولون مناسب للسهرات ..ممكن ذهبي او فضي او برونزي
والشوزات الحلوة للسهرات تبدأ من ال200 ريال فما فوق طبعا مو ماركات أكيد ..
+ 2 او 3 شوزات عادية متفاوته الاطوال + شوز مشي او2 في حال سافرتي لشهر العسل مثلا
(ميلانو سكوير + الدو + ناين ويست + تشارلز اند كيث +زارا + فينيسي .بس لو تبين ماركات عالمية
عندك المملكه وسنتريا )
* لبس يومي ولبس طلعات عادية .. جينزات + تي شيرتات+ قمصان ..
(نفس الاسواق اعلاة + بيرشكا + مانقو + زارا + نيويوركر +ريفر آيلند+ كوتون +نيولوك
H&M ) وكثير محلات غيرهم للبس العادي
* لانجري وقمصان للنوم مختلفه الالوان والقصات والاطوال .. لانك ماتدرين شيخ الشباب وش يفضل
* ملابس داخليه متنوعه ومختلفه ويبي لك كمية منها +اشكال من البرا للسهرات والعزايم
وللاوقات العادية .. واذا محتاجه مشد مناسب بعد لازم توفرينه
(ايتام +لاسنزا + وومن سيكريت + لافي ان روز + الريّس لو تبين مشدات كويسه + فية كم محل
في شارع الوزير مثل ياسمين والعساف مثلا ) ماكتبت نعومي لأني اكرهه من قلب احسة خربوطي
* طقم فوط وارواب +كم حبه من الفوط المختلفه اضافيه+ مفارش والحفه مختلفه
(المتجر العام في طيبه + المتجر الوطني في مركز بن سليمان + الثنيان والشلهوب في اوشيقر)
(لو تبين شي توب عند دبنهامز + باخشوين والبيت السعودي في شارع ال 30 )
* اكسسوارات للشعر وللبس .. مع انه العروس لازم في المناسبات تلبس مجوهرات بس بعد تحتاج كم قطعه
اكسسوار حلو
(شادن في حياة مول و القرعاوي + منير للساعات عندة اكسسوارات اقنر موجود بالمملكه تحت )
وفية بعض الاكشاك في اغلب المولات تبيع اكسسوارات مشكله
* عطورات لك .. اتوقع 5 كفايه بس يفضل أثنين منهم باللوشن تبعه
هذا اذا ميزانيتك محدودة لان العطور الحين مكلفه .. وممكن تشترين 2 رجالية
(باريس غاليري + دبنهامز + وجوة + سيفورا + هارفي نيكلز+ ساكس افنيوو )
* دهن عود من نوعية فاخرة .. يكفي توله مقسمة على 4ارباع .. وممكن تكون هال4 كل وحدة من نوع
من باب التغيير + كمية من البخور حتى لو بسيطه .. اهم شي يكون ريحته حلوة
(سيد جنيد عالم + عبد الصمد القرشي + الماجد + الدخيل+ الصفوة + ياس + باريس غاليري )
* كريمات لجسمك وبشرتك .. ومعطرات للجسم ومو شرط تكون كثيرة .. اهم شي تكون كويسه
ومزيل مناكير (صيدليه الحبيب + هارفي + سيفورا + بوتس+بودي شوب + نكتار )
* مجموعه من الميك آب يحتوي على اهم الاساسيات : كريم اساس + بيز + بودرة كومباكت + بودرة سايبه +
بلاشر 3 الوان كافي + ارواج 6 الوان حلو .. وممكن مثل ماقلت تشترين اكثر لو معك
+نوع او 2 اضاءة +كونسيلر +كم قلم كحل وماسكرا وكم قلم محدد + محدد حواجب وكم لون ماناكير +باليت
شدو او كم لون متفرق +مجموعه من الفرش الاساسيه.
تقريبا ذول الاساسيات واللي مايكمل المكياج بدونها .. بغض النظر عن الكميات
بس تقريبا 2000 ريال ممكن تجيب لك هالاشياء بس بتوازن ..يعني مو شرط تلتزمون بالعدد أعلاة
لو ميزانيتكم مفتوحة اشتروا أكثر بس انا حطيت اقل شي معقول ..
(نفس محلات العطور + ماك )
* اغراض مهمة تتبع التجميل .. مثل عدة العنايه بالاظافر+ اغراض للشاور والسنفرة
وتنظيف الجسم + قطن باشكال متعددة ومزيل للميك آب ..
(صيدلية الحبيب + نزيه + شارع السويلم )
* اجهزة لتصفيف الشعر ..
(نزيه + اكسترا + شارع الخزان )
* معاليق للملابس واكياس لحفظ الفساتين
(جده للديكور في شارع العليا العام + ايكيا )
* طقمين عبايات حلو للمناسبات + عبايه حفيفة وماتكون طويله حيل في حال السفر مع شوز فلات
(الاختيار الاول + فاشن لاين + السلطانه + ميد نايت +والنجمه الفضيه في رويال مول وطيبه )
* طقم سجادة صلاه وفي حال كنتي ببيت مستقل تحتاجين على الاقل 3 زيادة للضيوف
( الراشد في اوشيقر وطيبه + الغيث في طيبه )
* اكسسورات لادراج التسريحه لترتيب اغراضك فيها
( ايكيا + دايسو )

مبرووك يا عروسه موفقه بزواجك،،، الأخوات ماقصرو حبيب أضيف نقطه المكياج والعطورات والاستشواااار ابعدي عن طيبه كلها تقليد في تقليد وإذا تعرفي تطلبي اون لاين اشتري شنط ماركه جوده وتعيش معاك وتواجه الشنطه بنظري اهم شي.. وتقدير تطلبي تشرتات وبلايز اون لاينوكمان فساتين اذا تعرفي مقاسك

لا يا روحي مو قليل في ما معنى حديث الرسول أكثرهن بركه اقلهن مهر وَيَا حبيبي شكلك مو جنوبية احنى نزوج ب50 والكلافه شينه ترى ومشكورين الي ساعدوني والي تعرف ارقام حريم يسوون كورس تكفون الفزعه

اغلب العوايل متوسطه الدخل مهرهم من 50 الى 60 اذا انتو اغنياء غيركم هذي قدرته ..
المهم ياصاحبه الاستشاره
جيبي ورقه وقلم وقسمي مثلا اكتبي ملابس ب 5000 جلسات ليزر ابدي فيها من الحين عشان تخلصين بسرعه ..اكتبي فستان ب 3000 من اسواق مكه بس دوري محل كويس وفصلي عنده واكتبي مثلا مكياج ب كذا استشوار بكذا وحاولي ماتتعدي المبلغ ووفري 5000 بلحاله هذي تزودي منها النواقص لو يحوج
والتزمي بهالاشياء حسب احتياجك
يعني انتي بتكثرين ملابس او عطور براحتك بس قسمي لكل وحده مبلغ لحالها وجيبي ظروف واكتبي ع كل ظرف مبلغ 5000 مثلا للملابس والي بعده مبلغ 1500 للكوافير وهكذا
وربي يباركلك بمهرك قولي امين
بس انتبهي تمسكي مبلغ كبير وتدخلين السوق وتشترين ملخبط من ملابس من عطور من مكياج قسم بيطير مهرك باسبوعين لااازم تقسمين وكل يوم تقضين شي مخصص
يوم العطور يوم المكياج وهكذا

يسلمو لي