لي عودة

الله يبارك لنا جميعاً في شعبان ويبلغنا رمضان ويعيينا فيه ع الصيام والقيام
اول ماتزوجت كان لازم خميس وجمعة ضيووف عوايل ع الفطور
كنت اصحى من الساعة ٩صباحاً الى قبل الاذان طبخ ونفخ
واشكال والوان وتحضير سفره من والى ، عند الرجال والحريم يمكن اربع او خمس عائلات
ولا يعزمنا الا اثنين فقط !!
مع هالوقت الطووويل ماكنت اعرف شي اسمة احتساب الاجر !
وماكنت افهم معنى رمضان الحقيقي من صلاة تراويح وقيام وقراة قران
الله يتوب علي ،
💠من المواقف الي ماانساهاا
انعزمنا مره عند صديق زوجي ، وماقصرت الحرمه سفره كاملة متكامله
مره كنت تعبانه ومزكمة صحيت متأخره ع الساعه ٤ مالي نفس اطبخ
قلت بسوي اي شي بسيط الا زوجي يقولي تراني عزمت الرجال فلان
وبيجي يفطر معنا😱 حراام عليك ماعلمتني من بدري ايش اسوي الحين !!
مافيه مطاعم ولا شي حولنا منطقه جديده والخدمات غير متوفره
ويله طربق طربق ومامداني الا قبل الاذان دخلو علينا وجهزت السفره
وتفشلت من الحرمة سفرتي ماكنت يعني وتعذرت من ها ماعلمني زوجي الا متآخر !

💠موقف ثاني ،
كنا معزومين ع الفطور ونمت بعد العصر ارتاح اشوي واقوم اتجهز انا وبناتي
الا زوجي يجي يقولي قووووومي بيجينا ضيف ع الفطوورر
واقوم مفجوعه كيف ومتى وماتعرف تتعذر منه قال قوومي شوفي شغلك
واطير ع المطبخ واصحي بناتي تعاالو ساعدوني ماكان فيه شغاله
ويله ويله نلحق قبل الاذان ماكنت اقدر اغسل ملعقه علشان استخدمة مره ثانيه
الوقت مايمدي ،والحمد لله قدرت انجز واخلص شي قبل المغرب وشي بعده
والمجلى مليااان مواعين وحاله المطبخ حاله يرثى له
والله يكتب الاجر ،
الحمد لله بعدين صار زوجي لايعزم ولا ينعزم وارتحت الله يتقبل منا جميعاً

الحمدلله مانعزم برمضان.. زوجي اغلب وقته بالمسجد ما أشوفه كثير...
ودايم أقول اللي بيعزم عنده ١١ شهر يقدر يعزم فيهم... رمضان للعبادة مو للعزايم...
واللي تبي الأجر تشوف احد من العمال اللي ماعندهم اهل وتفطره من فطورهم مايكلف عليها

الله يعين ويبلغنا وياكم باحسن حال من كثر الدروس اللي اخذتها صارت السمبوسه لازم مفرزنه ومواعين الضيوف بجهه وحده مرتبه٢٤ ساعه واذا عندي ضغط ماكثر الاطباق علشان اتقن الطبق اللي اسويه