صباحكم مسائكم مسك وعنبر رمضان كريم
رمضان يجمعنا ههههههه متاثره بالفيمتوا اليوم ياحبيباتي قلت بقول لكم على مواقف طريفه حصلت لي في رمضان فرصه بمااني ماعندي فطور اليوم طبعا اعرف بتقولون ليش اعرفكم ملاقيف تموتون في اللقافه زيي ربعي اخخخخخخخ تدرون ليش اليوم صليت الظهر وقلت ببدء باللحمه عشانها تطول جيت بفتح الغاز والحمد لله ياربي لقيته خلص طبعا رحت لزوجي وتوه جاي من الصلات قلت له خلص قال خلاص نجيب الفطور من برى طبعا انا طرت من الفرحه بفتك من الفطور بس
فينا فينا السحور بس المهم نسيت انا وش كنت اقول انا بكتب مواقفي الطريفه قعدت اسولف عن الغاز المهم
ماطول عليكم الموقف الاول
هذا الموقف قبل الزواج كان عمري 15
سنه طبعا كنت صايمه وكنت في بيت اهلي ملكه مدري اميره لاطبخ ولانفخ
امي الله يحفظها والشغاله يسون الفطور وانا مغير اسوي حلى اوالي يطق في راسي موزي الحين الطبخ والنفخ كله علي :angry2:المهم من الزهق وكان وقتها مافيه نت والعصر مدري شسوي نورت في راسي لمبه ماهي زي لمبة ران موري لا لمبه ثانيه قلت ليش ما اشيل شعر يدي بالحلاوه وكان الوقت برد طلعتها من الثلاجه لقيتها جامده قلت خلاص بصخنها صخنتها بالمكرويف وحطيتها في صحن وكان ابوي الله يرحمه طالع برى البيت كنت مطمنه وانا طالعه بصحن من المطبخ الاويفتح الباب ابوي ومن الخرعه دخلت اقرب شيء للمستودع ومعاي الصحن ونور مطفي والمستودع مافيه شباك
يعني ظلمه المهم الاوحرك رجلي ويطيح الاغرض ويسمع ابوي الصوت وانا اسكت ولاكلمه واسمعه يقول لامي مين الي في المستودع قالت امي مافيه احد قال ابوي اسمع شيء طاح قالت امي يوه اكيد الاغراض خلني اشوف وانا اقول لايمه لالا طبعا امي ماتدري اني هنا الاوتفتح امي الباب
ههههههه والنور وتدخل هي وابوي
وتفتح النور الله لايوريكم فشيله وانا معاي الصحن واضح انواع الاحرج امي طبعا قالت اف انتي انصدمت وابوي
جلس يضحك ويقول اطلعي يابتي اطلعي عليك بالعافيه هههههههههه
يحسبني فاطره وصحن فيه اكل يالله
قلت لايبه يعني يابابا لاانا والله صايمه
بس هذا مدري وشو اقول استحيت اقوله انها حلاوه لشيل ماعرفت وش اقول وهو ماصدقني قال طيب طيب اطلعي وروحي الغرفه ازين لك ههههههه والله كل ماتذكر اموت ضحك على نفسي الله يرحمه الحين بقول لكم الموقف الثاني :
هذا الموقف كنت في ايام الملكه يازينها من ايام احلى ايام حياتي المهم
كان ابوالشباب:arb: بيجي بعد التراويح هذاك
اليوم طبعا طلعت كل النداره سويت اصناف وانواع ماخليت مالح ولاحالي يعني اني طباخه وجاء وتعشينا وعجبته الكنافه الي كنت مسويتها مدح فيها والاكل كله طبعاوبعد ماراح جلست انا وختي توئم روحي في الصاله اقولها صار وصار لحد مادخل ابوي الله يرحمه طبعا سكتنا وقعدنا نتفرج على التلفزيون وانا والله ماشوف
شيء بالي مع :arb: وجالسه سرحانه واطالع في التلفزيون وابتسم
وتذكرت شيء واضحك الا ابوي قال وشفيك تضحكين قلت لا بس اضحك
على واشر بيدي على التلفزيون الافشيله والله احراج
اثاريهم حاطين على الاخبار وانا مانتبهت صاروجهي الوان جلسوا كلهم يضحكون علي وانا بقيت اطلع من ملابسي من الحياء ههههههههههه
وشرايكم اتمنى مواقفي اعجبتكم وضحكتكم اشكر مشرفتنا عبور المستحيل على هذه الحمله الرائعه ولاتحرموني من ردودكم 0000000000الماهرات
ههههه اماااا الموقف الأول مرررررررهـ يفطس ضحك ومحرررج
يعطيك العاااافيـــة وبالتوفيق ان شااااء الله