على هذا الرابط
ملف سفرات وعزايم وبوفيهات أطباق عالم حواء ابداع × ابداع
هذا أول بوفيه اسويه أنا بروحي والله العظيم و بدون أي مساعده ، بسيط جدا ومو مرتب مثل البوفيهات اللي امي تسويهم وترى ما استخدمت السخانات لأن الأطباق اللي اخترت أسويها بسيطة وكميتها قليلة والبوفيه اللي أنا سويته كان على طاولتين بس ، أما اللي إحنا نسويه عادة يكون على خمس و6 طاولات ..
والبوفيه هذا سويته يوم الخميس لجمعة خالاتي ، وترى انا مخططة له من أسبوع وبديت استغل بالأطباق قبلها بليله..
اللي سويته يوم الأربعاء كان:
الكيكة تقريبا اخذت 3 ساعات والمعجنات اخذت مني 6 ساعات والجلي وورق العنب بس ما طبخته والمعكرونة سلقتها وسويت الصلصة بس البشاميل سويته ثاني يوم..
اما اللي سويته يوم الخميس "بديت من الساعة 9 الصبح لغاية الساعة 7 مساءا وانا اشتغل":
سويت باقي الأطباق وكيكة السويسرول سويتها الساعة 9 الصبح وخليتها بالفريزر وبديت شغلي ..
تعرفون شنو هلكت وتعبت وطبعا الجمعة نمت نوم مو طبيعي بس كفاية مدح أهلي لي وأبوي أهم واحد فيهم فديت عمره ، وخالتي تبيني أسوي لها بوفيه نفسه ببيتها ..
والموضوع كله كان تحدي بيني وبين أمي وترى اللي كلفتي بالبوفيه من أغراض طبخ وفواكه 35 دينار بس وكسبت الرهان ، وانا بدخل المطبخ سمعت أمي بالمطبخ تقول حق خالتي شوفي سوت كل هذا بروحها ولا تتفنن بالتزيين والله لو تتزوج بترفع راس زوجها وبيتها أحسه راح يكون جنة والله<<< أمي تمدحني الحين ههههههههههههههه ، وبويهي تكسر فيني لأنها تخاف علي ادخل المطبخ..
وانتظر رايكم بكل صراحة فيه والله ماراح ازعل ، ولا تحرموني من توجيهاتكم في طريقة الأطباق اللي اخترتها واقتراحاتكم في التقديم والترتيب ..
بتلاحظون بالصور إن أماكن متغيرة كل شوي لأني كل ما انزل طبق اتوهق بمكانه وأغير ترتيبهم وهذي كانت أول غلطة باني ضيقت على روحي بالطاولات لأني ماتوقعت إن الأطباق بتكون جذي كثيرة تبارك الرحمن ..
مـــاشـــاء الله ، تـــبـــارك الرحمن..
هذا شكل البوفيه عموما بعد آخر تعديل ، وترى الصورة اللي مغطيتها صورة اخوي الصغير..
وهذا من قريب..
وهذا هرم الفواكه بس مافي وجه مقارنة بيني وبين هرم الفواكه اللي أمي تسويه..
وهذا الدرج "الهرم" واهوا فاضي ، وعلى فكرة انا اللي ملبسته ومزينته :42: ..
وهذا من الخلف..
التبولة..
طبعا انا استخدمت 3 أضعاف هالمقادير..
المقادير:
4 ك بقدونس مفروم ناعم
2 ك طماطم مفرومة ناعم
1\2 -1ك نعناع مفروم ناعم
2-4 م ك بصل مفروم ناعم جدا جدا "يفضل البصل الاخضر"
1\4 -1\2 ك برغل ناعم "مغسول ومنقوع بماء نظيف"
1\2 – 1 ك عصير ليمون "حسب الذوق <<< أحبها حامضة"
التتبيلة:
2 م ص دارسين
1 م ص فلفل أسود
ملح
2 م ص بابريكا
2 م ك نعناع ناشف
1\2- 3\4 ك زيت زيتون
الطريقة:
تخلطين المقادير مع بعض وتخلط التتبيلة في وعاء بروحها ونصبها على الخضار قبل التقديم ب10 دقايق أو أقل عشان ما تذبل..
وتقدم إما مع الخس أو الملفوف..
وهذا رابط لكذا نوع سلطة:
4 أنواع سلطات :) ..