الموقف اللي اثر فيني وتغيرت بعده
قبل سنوات كنا نبني بيتنا على حسابنا وكان فله وكل شي حطيناه فيه المهم سكنته على السيراميك مافيه قطعة اثاث ماكان معنا شي وزوجي ماكان يبي يحط اي اثاث يبي شي زين
وجاء زواج عندنا وكانت امي بتحظر وقالت ابمرك اتقهوى عندك وكنت حامل وحملي تعبت فيه نحفانه فيه بشكل طالع جسمي بس كرش
المهم كلمتني امي وقالت ابجيك المغرب والعشاء اروح للقصر انا استحيت ارد امي وقلت حياك الله زوجي يوم علمته زعل وقال اصبري لين نأثث وبعدين تجي امك انا قلت لا والله ماأرد امي وتهاوشت معه يقول خليها تروح للقصر تعذري منها وانا اقوله لا مستحيل اردها وتهاوشنا وتكلمت عليه ووصلت للطلاق وزعلته وطلع وقمت نظفت البيت وجاب العصر صحنين حلا وشكولاته للضيافه وجهزت القهوى وانا فرحانه بأمي وللاسف جات امي متكشخه مرره وتناظرني بطرف عين وتسأل وين كنباتكم وين الاثاث قلت تونا نازلين بنأثث بعدين وكانت معها عمتي وريتهم البيت وانا تعبانه من الحمل وارحب فيهم واهلي عمتي والله بس تشكر لي وامي الله يهديها يالله تكلم معي وتناظرني من فوق لتحت للعلم انا الحمدلله جميله مره بس مع الحمل نزل ٣ ارباع وزني وتعبانه من قل الاكل مااشتهي شي المهم امي ساكته والله لا اشكرت ولا ضحكت لي وراحت للزواج وجيتهم هناك وعلى شاني تعبانه خليت عباتي علي ولبس بناتي وحظرت وجيت ابجلس عندها اسولف معها وتبعد عني كأنها متفشله مني قالت ليش لابسه كذا وليش بناتك لبسهن كذا وانا ملبسه بنتي فستان ناعم لان الزواج بعيد من قرابة زوجي وكنت بس ابي استانس وتهاوشني قالت شوفي فلانه كيف لبسها حزنت وسكت ولما راحت للبيت بعد يومين كلمتها بالجوال تقولي زوجك كيف متحملك هو مشاءالله ذوقه حلو بالبيت وتعبان عليه وانتي لا
قلت انا اللي مخططه معه البيت الله يهديها قامت تجدع كلام علي مع اني والله ماقصرت معها بشي
المهم تحسفت اللي ماسمعت كلام زوجي وتحسفت اني تلفظت عليه على شان امي مع انه طيب ولا يقصر
والان مسسسسستحيل اقدم احد على زوجي ونفسي مهما كان حتى امي ولا اجامل احد على حساب نفسي واذا ماناسبني شي عادي اعتذر

مشكورين ع المشاركه
وهل من مزيد ؟؟!

مواقف كثيره والمشكله اني افهم الدرس واستوعب لكن كل مره أقع في نفس الخطاء ويكون الدرس أقوى واقسى لكن هذي المره خلاص ما اعتقد راح أكرر خطأي.. لأنه كان قاسي جدا..
وتعلمت انه السكوت أفضل مئة مره من الكلام لعدة اسباب اولا كثر الكلام في الموضوع يرسخ الموضوع في العقل الباطني والظاهر وما ينسى ابدا.. لكن في المقابل تجاهل المشكله او الموقف وعدم التفكير لها او الكلام عنها تنتهي وتتلاشى..
لما نجي نفضفض ونتكلم للاحظه ننسى نفسنا ويمكن نتعمق في الكلام والكلمه تجر كلمه ونفتح مواضيع مسكره وتتجدد الأحزان.. ونتذكر الماضي ونبكي على الاطلال.. وهذا ليس في صالحنا ولن نتقدم ابدا..
وأهم شي اننا في أغلب حديثنا مع الأشخاص وفضفضتنا يعقبها ندم ليش قلت وياليتني سكت.. وهذا حالنا بعد الفضفضة 💔 😔 ندم وشعور بالحزن فأذن الأرجح اننا نكتفي بصمت فصمت دواء واتغافل يمنحك فرصه لتقبل الحياه والأشخاص وتعايش معهم..
في النهايه لكل شخص أولويات في الحياه أهلك أولادك زوجك بيتك دينك نفسك رتبي أولوياتك ولا تجعلي رضى الناس من أولوياتك لأنهم عمرهم ما راح يرضو..

ولك مني جزيل الشكر على موضوعك الجميل 🌹❤️

عادي ازيد ولا ماينفع إلا رد واحد 😙

زيدي ياعسل المنتدى انتي ❤️