موقف صعب غير حياتي تكفون ساعدوني انا اتعذب

محجووووووووز

لرد خاثر ولا تقلقين ياعمري

والله ياعمري الموقف بصرااااحه لاتحسدين عليهواقولك الحمد لله على سلامة ابوك هذا اهم شي واللي سويتيه اي وحده بتسويه والله لو انه غير ابوي كيف ابوي يصرخ وا نا اطالع فيه ماتحرك حبيبتي اللي سويتيه اي وحده كانت بتسويه ويعطيك الله الف عافيه ماأغمى عليك وبالنسبه للموضوع انه لسى في بالك اكيد ماراح تنسين الحين بس مع الوقت ان شاء الله بتنسين والله انا بنتي راح ابوها يجيب غرض من الصيدليه وترك السياره مشغله ومادري ايش حركت البنت فيها ومشت السياره على ورى انا بغيت انجن والحمد لله ماصابنا اي شي بس الموقف قعد فتره وهوه لسى في بالي وصرت اخاف من السيارات بس الحين الحمد لله نسيته وان شاء الله انك انت كمان مع الوقت بتنسين اما بالنسبه لزوجك اكيد انه من باب الغيره عليك لااقل ولا اكثر وراح ينسى كمان ان شاء الله

والله صراحه اختي مع الوقت بتزول مخاوفك ..

وبالنسبه للي سويتيه الله يلوم اللي يلومك وقتها مافيه وقت لتفكير

الله يعينك حبيبتي ..

صباح الخير .. اختى نبع الأنوثه .. والله اقولك شى ماتستغربينه
انا حطيت نفسى بنفس موقفك انا متأكده انه ماراح يجى نفس الشعور اللى حسيتى فيه ساعتها لكنى تخيلت والدى مثل ماهو والدك بسم الله عليهم
والله انى تألمت وبغيت ابكى مادرى ليه ... الاحساس هذا مر على لأن الانسان يتألم لمن يلقى ابوه فى موقف ألم وتعب وخوف وهو رمز القوه قدامنا حنا عياله ولانفكر انه بيوم بيتألم مثل شعور الانسان العادى يعنى اللى اقصده انك تألمتى من منظر ابوك اسم الله عليه وهو مفزوع ومتألم ولأول مره يكون فى موقف انسان متألم وهذا شى ما الومك فيه لانه احساس جديد على الابناء انهم يشوفون آبائهم بهالمنظر المؤلم .. الان لا تذكرين الموقف او كل ماتذكرتيه تذكرى انه الأن طيب الحمدلله او تذكرى انه حصل على العلاج وتم اسعافه .. وان السياره جت على جزء بسيط من جسمه وليس الجسم كامل ... وتذكرى موقفك معه انك ركضتى لأجل والدك حبيبك .. راح ترتاحين انك ساعدتيه اول وحده .. بعدها يا عزيزتى موقف انك طلعتى من غير حجاب او من غير عباة .. تذكرى انك طلعتى لأجل والدك وانك لك الفخر بأنك طلعتى لأجل مساعدته وتذكرى انك فى موقف ماكان يحتمل انك تفكرى .. الانسان فى مواقف محد يلومه فيها .. ولو زوجك فتح الموضوع أو انتى تقدرين انك تفتحين الموضوع بطريقتك كأمرأه ذكيه بحيث تخصصين لك يوم ويكون فى جلسه هادئه تسوين له شاى او قهوه وتقولين له يابو فلان انا مسوية لنا جلسه خاصه .. ومن خلال جلوسكم والهدوء من حولكم .. قولى فى موضوع مضيق صدرى وحابه انى اوضح لك الاحساس اللى بقوله واتمنى انك تقدر هالموقف والاحساس اللى حصل ساعتها .. وتشرحين الموقف وانك انفجعتى بالموقف اللى حصل .. قولى
انت حط نفسك مكانى لو هذا ابوك لاسمح الله وحصل له هالموقف اكيد الواحد بيطير عقله ...

انا مره حصل معى موقف .. بقوله لكى وانتى بتعرفين انه تقريبا قريب للشىء اللى حصل لك.. مره من المرات اغمى على وانا كنت بالبيت .. اهلى من خوفهم وفزعهم على اخذونى بالسياره وانا بلبس البيت كنت لابسه بنطلون وقميص من غير حجاب ولا عباة وبالمستشفى لقيت نفسى من غير غطاء على شعرى وانحرجت حيل يوم صحصحت .. قالوا والله يومها ماندرى كيف جبناك عالمستشفى ... شايفه هالموقف وانا ما اعرف كم شخص شافنى وانا مغمى على بالمستشفى .. المهم ياعزيزتى انا انتى مو حابه تواجهين زوجك وتتجاوزين الموقف وتبين تمحين اى اثر بقلبه عليك... ممكن تكتبين لك رساله حلوه وتشرحين له الموقف وتقولين انا ما الومك وانت زعلك على الللى صار اعرف انه من غيرتك على وحبك لى .. وانا لانى احبك احب يكون الموضوع واضح بالنسبه لك ... وحاولى تتجازين الموقف لانه بسيط وماشافك الا ولد عمره 20 مثل ما ذكرتى ... ياعزيزتى لاتخلين موقف مثل هذا وتكرار التفكير فيه يجعل منك انسانه حزينه موسوسه .. والله كثر التفكير يمرض .. انتى تذكرى انه شىء حصل وانتهى وانك كنت على حق وماغلطتى بس الرجال يغارون على زوجاتهم من حبهم لهم اكيد... مو من شك او اى اشياء اخرى تطرى فى بالك...

الموضوع انتهى قولى هالشىء فى نفسك وترى فى موضيع مثل زوجك والبيت تحتاج انك تعطيها اهتمام لو بحثتى عن ما حولك ..
لاتطالعين على موقف حصل وانتهى لانك بتدورين بدوامه .. وتزعجين نفسك وزوجك وعيالك بس لأنك مو قادره تنسين الموقف واكثرى من الدعاء حتى لايسيطر عليك التفكير فى هالموضوع
الحمدلله ابوك طيب وانتى ايضا ابحثى عن استقرار عائلتك اقصد زوجك وبيتك واولادك ..
وترا الدنيا ماتسوى نزعل نفسنا على مواضيع ونكبر الموضوع على اشياء حلها بيدنا واشياء الله كاتبها لكل انسان ...
اما سالفة خوفك من ركوب السياره هذا شى حصل لك من الموقف اللى شفتيه جدام عيونك
والخوف اللى حصل لك لمن شفتى ابوك اسم الله عليه ارتبط معك بكل سياره تشوفينها او تركبينها ... وهذا غلط انتى تقدرين تتجاوزين هالموقف .. بأنك تركبين بالسياره وتتذكرين الاشياء او الذكريات الحلوه اللى تجمعك بالسياره مثلا ان زوجك معك او انك بتروحين بالسياره لمكان انتى تحبينه علشان ترتبط معك السياره بالذكريات الجميله وليست فقط الذكريات السيئه ...
مثل ابوى جاه خبر وفاة اخوه الله يرحمه الفجر وهو نايم رن التلفون وابوى نايم
ورد على التلفون وجاه الخبر ... الله لا يوريكم ولايعيده علينا هالموقف ..
المهم انه صار يخاف يرد على التلفون الفجر او حتى الصبح لان التلفون ارتبط بعقله بوفاة عمى او بالاخبار السيئه ... عموما هذا شى وقتى وبيزول مع الوقت بس انتى لاتفكرين بهالامور وخليكى متفائله ... الازواج مايحبون يشوفون زوجاتهم بس مهمومين ويفكرون .. خليك متفائله ومبتسمه .. واكسبى الوقت فى الاهتمام بزوجك وبيتك ادرى طولت حيل بالموضوع .. سامحونى ...

الحمدلله على سلامة الوالد

ياأختي نبع الأنوثة ذكرتيني بموقف حصل لنا قبل سنة ونص مشابه لموقفك طبعا كان أول يوم في السنة الدراسية وكنت أنا في ثالث ثانوي وأمي الله يحفظها لي سوت لي بطاطس مقلي تعرف أني اموت في شئ اسمه بطاطس وطبعا أنا دخلت كعادتي سلمت على امي وجلست أسولف معاها هذا لسى وأنا بمريولي وامي كانت توها مخلصة صلاة الظهر ونسيت البطاطس والزيت على النار وماتذكرت إلا على صرخة أخوي الصغير لماشاف النار موصله للسقف بعدين أمي من الخوف ماعرفت إيش تسوي !!؟؟ فمسكت المقلاية بيدها وحطتها في المغسلة ولاحظي إن المقلاية كانت مولعة نار طبعا أمي ارتبكت بس كانت تبغى تطفي النار والنار لسعت يدها وانحرقت يدها موقف والله كان صعبا جدااااااا وديناها المستشفى وقبله مستوصف بس قالوا الحريق من الدرجة الثانية ودوها مستشفى وطبعا أنا رحت معهم وأنا بلبس المدرسة وجلست أشوفهم لما يقصوا الجلد واشوف امي تتألم وتبكي وأنا قلبي يتقططططططططططططع وجالسة أبكي طول الطريق لأني ماقدرت أسوي لها شئ
وجلست أمي شهور تتألم وماتنام إلا بمهدء من قوة الألم ياعمري ياأمي وإلى الآن وأنا ضميري يأنبني صحيح أنه مكتوب ولااعتراض على حكم الله بس أحس أني انا السبب
وكرهت البطاطس كره كره فضيع وحتى الإ الآن أخاف أني أقلي حاجة على الزيت حتى أخاف على امي إنها تقلي

ياأختي نبع الأنوثة هذا شئ طبيعي أنك تكوني خايفه من السيارات ومع مرور الزمن إن شاء الله راح تعدي المرحلة
أما عن سالفة خروجك فهذا شئ عادي لأن الإنسانة في هذي اللحظة مايكون في كامل وعيه ولا أمي كيف تشيل المقلاة وهي مشتعل فيها النار