موقف لغيرك تكلمتي فيه وبعدين صارلك مثله!!

السلام عليكم بنات كيفكم وكيف حوالكم وعيالكم ان شاءالله تكونو بأحسن حال


بعض الأحيان تصير فغيرنا مواقف ونتناقلها بيننا بغرض السوالف مو شرط غرض الاستهزاء والتقليل من الغير ان كان بالجامعه او العمل او الزواج
طبعاً جميعنا نمر بمواقف وظروف نتعلم منها وتكون درس لنا وممكن تكون عقاب من الله 😬 يريد الله ويحطنا بنفس الموقف او مشابه له ويذكرنا بنفس الكلام اللي قلناه على فلانه


كل وحدة تقولنا ايش الموقف اللي صارلها وتعلمت منه ولو تكرر كيف بتتصرف واللي مانحطت بمواقف تتعلم مننا وتخلي ببالها كما تدين تدان وتخليها بحااااالها 😌




انا ببدأ الأول وبقولكم موقف صارلي لي ☝🏼


في وحدة كان بينها وبين زوجها مشاااكل وتعامله معها جداً سيء وهي ساكتة ماتتكلم وتسكت وتصبر طبعاً كانت تحكيلي كل شي يصير على الواتس وانا بالأول ماكنت ارد بعد فترة طلقها وراحت لأهلها كانت تحلم متى يرجعها ومتى يجي يقولها احبك وانا كنت اقولها انسيه واشتغلي وكملي دراستك من زينه واسب فيه لانه فعلاً شخص سيء تقولي صعبة ارجع لأهلي قلتلها انا لو منك اطلع شقه لحالي قريبه وماهمهي احد(انا وقتها كنت متزوجة لكن حياتي مستقرة مع زوجي ماجربت شي من هالكلام) زوجها رجعها قبل لتخلص العدة باسبوع جلست معه اسبوعين حملت منه وطلقها ثاني ورماها طول الحمل وكالعادة تحلم بالرجعه وانا اقنعها انه تنساه وهي ياحرام تحلم ببيت ومطبخ تطبخ فيه وشغلات بسيييطة لكن لأني كنت بنعمة ماكنت حاسة فيها وكنت اروح لزوجي اقوله مسكينه هالبنت واقوله كل شي صار معها وهو يقولي ليش تنصحيها بالطلاق لا حرام اللي تتزوج صعبه تتطلق كنت اقوله مين قلك انا لو تطلقت مابقعد ابكي عليك بشتغل واطلع شقه لحالي واربي اولادي واعيش مبسوطة.. صارت مشاكل مع زوجي ورمى علي يمين الطلاق ونزلني لأهلي بنفس يوم رجعتها لزوجها ولدت بالمستشفى وطلعت معه على بيتهم وانا رحت لاهلي وانا بديت معاناه المطلقه والاهل والبيت والعيال وحسيت فيها وندمت على كلامي معها وقلت ليتني قلتلها براحتك اللي يريحك وبقيت 6 شهور متمرمطة ماعرفت اعمل شي من اللي قلته ابغى اطبخ ماعرف ابغى انتف جسمي ماعرف اوووف كل شي صعب عند الاهل وبعدين رجعت لزوجي والحمدلله تحسن كثير وماعدت اتدخل بأحد ابداً ابداً اي احد يكلمني بس ادعيله الله يعينك الله يكتبلك الخير استخيري استغفري ادعي الله قومي الليل .. وبس تعلمت دعو الخلق للخااالق وسلامتكم