مو قادره اكون انا..

مشكلتك الاساسيه مو قادره تتقبلين الواقع والحقيقه اللي حولك وتتعايشين مع تفاصيله مثل ماهي
ولا قادره تتقبلين التغيير اللي يحصل في حياتك
اللي ابيك تستوعبينه ان التغيير هو اكثر شي طبيعي يمر فيه الانسان
حتى هواياتنا وميولنا والاشياء اللي نفضلها واسلوبنا وطريقة تفكيرنا كلها قابله للتغيير والتطوير مع كل مرحله في حياتنا
فقط اسمحي لنفسك ولتفكيرك انك تتقبلين هذا الجزء الطبيعي البشري فيك
مو لازم تبقين طول عمرك بنفس مستوى الشغف لاشياء معينه عادي تفقدين حتى اهتمامك بها وتتبنين اشياء جديده وتجربين حاجات ثانيه متنوعه لاول مره
وبخصوص علاقتك مع الاهل والاصدقاء اعرف ان عدم الاهتمام الكافي من الاهل يسبب فوضى داخل النفس ويفتح باب التساؤولات والمقارنات لكن بنفس الوقت يفتح عليك باب التدقيق الشديد والمبالغه والتصيد
لازم تتعلمين تحطين نقطه نهاية سطر قصة طفولتك ومراهقتك وتتعلمين تقلبين الصفحه وتبدأين صفحه جديده
لا تطيلين الوقوف والبكاء على الاطلال لانك ماراح تستفيدين ولا شي
بكل بساطه الان قدامك حياه انتي مسؤله عن صناعة تفاصيلها عشان تكون ماضي حلو
وحتى اهلك اعذري تقصيرهم وجهلهم في مسألة الاهتمام الكافي بك ولا تصيرين جحوده بدون قصد لانك لو تكتبين ايجابيات اهلك بتلاقين انها تطغى على السلبيات فلا تفتحين اذنك للشيطان اللي يحاول يجيك من مدخل انك مسكينه مظلومه مضيومه مهمله وحيده منحوسه ... الخ ويخليك تركزين في هذا الشي الواحد السلبي المضخم وتتجاهلين الكم الهائل من الايجابيات وتهدرين وقتك وعمرك في وساوس شيطانيه اغلبها اوهام مضخمه
واذا على قلة الاهتمام شوفيني انا مريت بظروف فيها قلة اهتمام ووقعت بسببها في مشاكل وحوسه ولخبطه لكن حطيت نقطه نهاية السطر مثل ماقلت لك وبدأت من جديد وسامحت وعفوت واهم شي ألتمست العذر وحطيت نفسي مكانهم ووالله اني ألتمست العذر حتى لو ان العذر تافه لكن بالنهايه هم الوالدين اللي واجب علينا برهم ونؤجر على هذا الشي ونحتسب اجر صبرنا وتسامحنا ونبادر بالموده والاحسان ومع مرور الايام النفس يطيب جرحها والامور تزين لان اللي يحتسب الاجر ويعلق كل شي يحصل له بالله ربي يكون معه ويعينه وينور بصيرته
ببساطه احنا نعيش الحياة الدنيا ما نعيش جنة الفردوس
يعني هذا طبيعة الحياة البشريه مافيها شي كامل ولازم نمر فيها بتجارب متنوعه هدفها اننا ننضج ونتطور عاطفياً وفكرياً ونفسياً واجتماعياً ونتعلم اشياء جديده ولا اجل كيف راح نستوعب ونفهم الحياه اذا ما مرينا بمثل هذي الاشياء المزعجه ؟
وحتى الصداقات مو واجب ولا إلزامي انه يكون عندك صداقات
ولا لازم ولا حتى عيب ولا غلط انك ماتقدرين تنسجمين مع كل العقليات والشخصيات
ومو لازم يكون عندك صداقات احياناً يكفي اننا نكون على تواصل شبه سطحي او متوسط مع بنات العايله والمعارف مو لازم تكون علاقتنا صداقه قويه احنا مو مستعدين لها من الداخل ونجبر نفسنا عليها بس لاننا نبي نكون مثل الباقي ... لا عزيزتي مو لازم
ختاماً حياتك مافيها أي مشكله تستدعي انك تعذبين نفسك من اللا شيء
الخلل فقط في طريقة فهمك وتعاملك مع الحياه وتقلباتها وظروفها
كوني مرنه ومنفتحه للتغيير والتطوير وتقبلي واقعك مثل ماهو واعفي وسامحي وألتمسي العذر
لان راح يجي يوم تكونين محتاجه ان الاخرين يكونون مرنين معك ويلتمسون لك العذر ويتقبلونك مثل ما انتي
هونيها وتهون مافي شي مستاهل

هلا نور قرأت موضوعك مرتين
وفهمت من كلامك المشكلة مو إنك إنسانة سيئة أو ضعيفة مثل ما تتخيلين المشكلة إنك عشتِ سنوات طويلة وأنتِ تحاولين تاخذين حب وتقدير من ناس ما عرفوا يعطونك اللي تحتاجينه فهمتِ

طبيعي ترى بعد كل هذا تتعبين وتفقدين شغفك وتكرهين نفسك وصورتك الحالية
الشي اللي لفت انتباهي إنك ما زلتِ تقولين (((أبي أتغير))) وهذا معناه إن فيه جزء منك بشخصيتك ما استسلم وهالشي مره حلو

لكن انصحك لوجه الله لا تحاولين تصلحين حياتك كلها دفعة وحدة علشان لاتضغطين نفسك
ابدي بشيء صغير جدًا يوميًاامشي عشر دقااااايق مثلااكتبي سطر واحد بدفتر خاص فييييييك ارسمي رسمة بسيطة حتى لو ما أعجبتك اي شي ي قلبي

ولا تربطين قيمتك بنظرة الناس كافي اللي راح يانور قضيتِ عمر كامل تحاولين تثبتين نفسك لهم وما شبعتِ من التقدير

الشخصية الهادئة مُمِلَّة كنت بزمان هادئة حساسة ومتقوقعة على نفسي
كنت احس بملل من شخصيتي ... الهدوء الزائد سيء وايضًا الخجل الي من كل شي حرفيًا اسوأ شيء ممكن توصل له البنت...ما اقول لك تغيري بالكامل لكن دخلي بشخصيتش القوة والحزم والمرح ولا تعيشين دور الضعيفة ... انتي الي تضعفين نفسك وانتي الي تقوينها كل هذا الشي بيدك انتي مش باهتمامهم او باهمالهم

مشكلتك حساسه جدا احترت صراحه بالرد
لان المتسبب لك بالاذى بوجهة نظرك اهلك
وانا عندي العائلة خط احمر حتى لو البعض منهم يجرح بقصد او بدون قصد

اشوف ان هم احن الناس علينا مهما درات فينا الدنيا
نصيحتي لك تقربي من الله وادعي ربك يألف بين قلوبكم
وتقربي منهم وعامليهم بالحسنى وزياده  وأحسني الظن واختلقي لهم اعذار واحتسبي الاجر خاصه امك وأبوك ماتدرين وش الظروف للي مرو فيها

سورة البقره والسنن الرواتب والله انها معجزه لا يمر يومكم بدونهم

كذلك خصصي لك وقت اسمعي برودكاست عن التطوير الذات وبناء الشخصية

اشغلي وقتك بشي تحبينه والاهم شيكي ع تحاليك

إذا كلامي ضايقك سامحني والله يسخر لك خلقه

أنتِ مو ضعيفة شخصيه
أنتِ متعبة ومجروحة من زمان.

من وأنتِ صغيرة كنتِ تحتاجين
أحد يسمعك ويطمنك ويحتويك
لكن كثير من مشاعرك تم تجاهلها
أو التقليل منها!
ومع السنين بدأتي تصدقين
إن المشكلة فيك
مع إنها مو بالضرورة فيك.

اللي صار لك من تهميش
وتنمر وعدم وجود سند كافي
يخلي أي شخص يفقد ثقته بنفسه
ويصير يخاف من الناس
ومن الرفض.

أما إنك ما عاد صرتِي تستمتعين
بالرسم والكتابة
والأشياء اللي كنتِ تحبينها
فهذا غالبًا بسبب الإرهاق النفسي
أو الاكتئاب وليس لأنك تغيرتي
لشخص سيئ أو فاشل!!!

الحين لا تحاولين تصيرين
نسخة جديدة منك 😡
ولا تجبرين نفسك تحب نفسها فجأة
ابدئي بأشياء صغيرة جدًا

حاولي توقفين جلد الذات
كل ما بدأ صوت اللوم داخلك

ومن كلامك كله أكثر شيء
واضح لي إنك محتاجة رحمه بنفسك
أكثر من حاجتك للقسوة عليها.


والشيء المهم إن الشخص
اللي ما زال يحاول بعد كل
هالسنين مو شخص مستسلم

فيه جزء داخلك للحين
يبي يعيش بشكل أفضل
وهذا الجزء هو اللي خلاك
تكتبين كلامك اليوم.

بإختصار إنتِ وحدك الي قادره
تنزعين نفسك من الوحده العاطفيه
الي عايشه فيها

لاتنتظرين أحد يحس فيك أو يساعدك.

لازم تنظرين لنفسك إنك شي ثمين
محتاج كثير من العنايه
ورددي أنا أقدر أتجاوز كل شي صعب
بحول الله