مين يساعدني بمشكلة زوجي وأدعيلها عن ظهر الغيب

السلام عليك ورحمة الله . أولا بصبح وأمسي علي الجميع . أنا متزوجة من 18 سنة وعندي بنتين والحمد لله حياتنا ماشية لا بأس فيها طبعا الكل عنده مشاكل بس زوجي من النوع العصبي ومر بمشاكل عائلية خلته يصير عصبي ويكره أهله ويبتعد عنهم وعن مشاكلهم . لهذا السبب حياته كانت صعبة وايد ومهما قلت ما راح أقدر أوصف وأخليكم تحسون فيه وبصراحة أنا أعذره على عصبيته . والحمد لله أنا من النوع الصبور واللي يتحمل وخصوصا إني أحبه من قلبي وأحس أن الدنيا ما تسوى بدونه . لأنه إنسان طيب وخلوق وما يحب اللف والدوران ومهتم ببيته وعياله أكثر من نفسه وهذا اللي مخليني متمسكه فيه . بس المشكلة وأرجوكم افهموني ما بي أحد يقولي اتركيه خليكم متفاهمين وياي وساعدوني وأنا على يقين بأن كل شي بهالدنيا له حل . وبصراحة ما كنت حابة أفتح هالموضوع علشان لا تزعلون مني بس وصلت السالفة وياي لحدها وخايفة إني ما أقدر أتحمل أكثر . وودي أساعده وأجرب كل شي وياه عسى وعل الله سبحانه وتعالي يهديه للصواب . سامحوني لأني طولت بس ودي تفهموني قبل ما تحكمون علي . المشكلة هي إنه مبتلي بشرب الخمر مع إنه تركها لمدة ثلاث سنوات بعد ما راح العمرة لأنه كان متعود يشرب من وهو عمره ستة عشر وطبعا بسبب عيلته المتفككة مافي أحد منعه أو أرشده وظل على هالحال . وأنا اللي أكلتها . وما كنت أدري قبل الزواج ومن حبي له ظليت وياه . المشكلة إنه بالفترة الأخيره رجع للشرب بعد ما ترك ثلاث سنوات وسبب تركه لأنه حس صار يسوي شغلات وينسى ويعصب زياده وتزيد المشاكل ويطيح على الأرض يعني مو مثل أول لما كان شباب الحين هو عمره 44 سنة وكل ما يشرب يزيد عصبية وبصراحة صرت أخاف منه وأحاول أتجنبه وأبعد عنه وما أجادله بأي شي وأسوي كل اللي يبيه وما أصدق متى ينام علشان يعدي اليوم على خير وهذا غير المشكلة الثانية المسبات والإهانات والضرب إذا زادت عصبيته . والله العظيم وهو الوحيد اللي عالم فيني إني دايما أدعيله علشان يكرهه بس خوفي قاعد يزيد علشان شذي أصريت أكتبلكم يمكن ألاقي الحل عندكم فأرجوكم اللي تلاقيلي حل تقولي وبدعيلها من كل قلبي بظهر الغيب بس ساعدوني . بانتظاركم والسموحة .