خواتي الأحباء أولا مو عارفة اشلون أرد جميلكم إلا بالدعاء بظهر الغيب بإذن الله .
والله تندمت لأني ما شاركتكم من الأول لأن خجلت منكم بصراحة وإنكم ممكن تبعدون عني بس الحمد لله وجدتكم متفاهمين جدا لوضعي ووضعه بنفس الوقت . والله بكيت لما شفت ردودكم وما تصدقون ايشكثر ارتحت .
أختي البدر في التمام أشكرك على تفاعلك وياي وصدق أحاسيسك . وإلي أختي الورقة الأخيرة أشكرك على دعائك وحسن تفهمك . وأختي ربي اغفر لي أشكرك من صميم قلبي . والأخت N.O.O.R11 أشكرك من كل قلبي وبالفعل أنا أحسه ناقصة حنان وأشياء وايد بس مو بإيدي أرجعله كل اللي ناقصة من ناحية الحنان والله وربي شاهد إني مدلعته وكل اللي يبيه أسويه وطول الوقت تدليك بالساعات وبعدين أشوف بناتي والبيت ودراستهم وكل هذا وأنا بروحي ما عندي مثل بعض الناس خدم ليساعدوني بأمور البيت علشان أفضاله مع إنه كان عندي من قبل ثنتين بس خلاص طابت نفسي منهم ومن مشاكلهم وقلت أحسن أشتغل بكيفي على قد ما أقدر . وأنا مو من النوع مثل الحريم الباقية المتتطلبات ويبون ويبون ويطلبون لحد ما الزوج يطفش ويمل لالالالا أبدا أنا الحمد لله بشهادة الجميع طيبة القلب ومالي طلبات أبدا وياه وشنو ما ييب للبيت أكون مستانسة ومتسامحة جدا لأبعد الحدود وصبورة وإلا ما صبرت 18 سنة زواج وهو على هالحال . والكل يقوله إنت شنو تبي أكثر من شذي عندك زوجتك راضية بكل شي وطيبه وحنونه وما لها طلبات وطلباتك أوامر عندها وما ترفضلك طلب وبناتك متفوقات والحمد لله الحالة المادية متوسطة . يرد ويقول أبي واحدة ذكية تفهمني وأفهمها وووووو . ما أدري ليش ما يفهم إن الإنسان ما يقدر ياخد كل اللي يبيه أو يكون عنده كل اللي باله . يعني حاسس هذي مو حياته وهو عايش اهني بالخطأ ومو عاجبة شي وخصوصا بصراحة بهالبلد حتى دوامه مل منه ووده يطلع تقاعد امبجر .
أختي بالله OMLAMAR أشكرك على دعائك وحسن اتباعك لموضوعي . والأخت جمان الله يعطيكي العافية . والأخت حبحبة حمراء أشكرك وايد . والأخت صوت في الغربة الله يساعدها ويهون عليها والله أدري بشنو تحس الله يعينها . والأخت ام ولودي مشكورة على دعائك . والأخت الفردوس المفقود أشكرك وبالنسبة للتصوير أنا فعلا صورته أكثر من مرة وهو سكران وشاف نفسه واستغرب من شكله وطريقة مشيته وحركاته بس عادي يرجع ويشرب . والأخت MONSAF مشكورة حبيبتي ومثل ما قلت صورته بس شني بسويها مرة ثانية وصدقيني إني مو مقصرة معاه بشهادة الجميع . وإلى الأخت أم محمد 1404 الله يعطيج العافية . وأختي الحور عين مشكورة على دعائك الله يعطيج العافية . والأخت انترنت نت أنا ما قلت عنه مدمن والدليل بشهر رمضان يصوم وما يمسكه أبدا ويعرف إنه حرام وهو وده يتركه بس هو يحس إن هالشي هو الوحيد اللي يريح باله من التفكير والكسل اللي قاعد يحس فيه والخمول لأن بس يشرب يتنشط ويطلعنا بس هالشي مو مريحني يعني ما يقدر يستانس إلا إذا شرب وإذا ما شرب يصير خمول وما له خلق يروح مكان ويظل نايم ومن ناحية الشيوخ هو يسمع لناس معينين وإذا كان مصري ما يحب أبدا يسمعلهم عنده الشيخ خالد المذكور اللي يحب يسمعه وهو عارف بأمور الدين ومن الناس اللي يسمعوا القرأن بس بالخفية حتى أنا ما يحب يخليني اعرف إذا كان قاعد يصلي أو يسمع قرآن أعتقد هذي راجعه لأبوه من كثرة ما كان يطقة على الصلاة ويكرهم فيه علشان شذي يحب كل شي يسويه بالخفية . أختي اللين كله ادعيلي إنه يروح والله يمكن تتغير فيه شغلات وايد وبالفعل هو فكر هالسنة يروح بس تراجع مع إنه مسوي عمرة مرتين والحين قاعدة أقنع فيه نروح المدينة بالعطلة إن شاء الله . أختي سمرة وزي القمر مشكوره حبيبتي بس هو مو مدمن أبدا يقدر يتركها بأي وقت بس المصيبة أصحابه كل ما يتعرف على أحد يطلع يشرب يعني ما شفت إلا كم واحد بس من أصحابه متدينين وما يشربون بس الباقي كلهم يشربون وأنا كل ما يتعرف على واحد من هالنوع أحاول أكرهه فيه وأطلع مليون عله علشان يتركه . وأختي أم الخطاب مشكورة حبيبتي فعلا استعنت بصديق وهو مثل الأخ ويعرف كل شي عنا وحتى مشاكلنا يدخل فيها ويصالحنا ويحبنا وايد وأنا أعتبره مثل الأخ الكبير وعرف السالفة والحمد لله دايما يقعد وياه وينصححه وأحيانا أشوفه متغير وأحسن وبعد فترة يرجع مثل ما كان . وأختي تناهيت مشكوره حبيبتي أنا صارلي ثلاث سنين أسمع سوره البقرة يعني أول ما أقعد من النوم والكل يطلع أشغل سورة البقرة وأشتغل وأردد من وراه والحمد لله حفظت منها جزء كبير وصدقيني وايد أسولف وياه وأقرأ له مواضيع وأجيب قصص وأقرأ له ودايما بحاول أهون عليه مصيبته مع أهله بس هو مو قادر ينسى الإساءة منهم وللحين ييب طاريهم أبوي سوى شذي أمي شذي أخواني شذي يعني الحين عمرة44 والكل يعرف سالفته وزهقناها من كثر ما يقول والكل متعاطف معاه بس صارت اسطوانه وحفظناها . وإلي LOLIPOP أشكرك وايد بس المشكلة مثل ما قلت من أصحابه يعني أحيانا هم اللي يشجعونه وصدقيني وايد قاعدة أحاول كل ما يتعرف على أحد منهم أبعده وأطلع فيه مليون عله وعله علشان لا يصير في احتكاك قوي وياهم .
ودي أقولك اشلون رجع للشرب بعد ما كان منقطع ثلاث سنوات . قبل سنتين سافرنا سوريا وهو عنده حساسية تطلع بكل جسمه وياخد دواء بس يخليه ينام ويتكاسل ووقت السفرة ما حب ياخد دوا الحساسية علشان لا ينام وتخرب سفرتنا ويت في باله إنه يشرب بس بيرة وفعلا وقت اللي شرب ما طلعتله أبدا الحساسية طبعا لأن هالشي يعمله ريلاكس ويهدي باله من التفكير لأن حساسيته من التفكير وإذا كثرت بتصير صدفية وهو بخاف من هالشي وهو بيعتقد إنه هذا هو العلاج ووعدني إنه ما يشرب لما نرجع بلدنا لأني وايد زعلت وكنا راح نتهاوش وفعلا لما رجعنا ما شرب فترة أسابيع وبعدين رجع لأن واحد من أصحابه شجعه على الشرب ورد عليه مرة ثانية بس أنا ظليت فترة ما أقعد معاه ولا أكلمه وأبكي ويشوفني ويعصب مني . المشكلة كان خفيف يشرب بس الحين زاااااااد وااااااايد والمشكلة لما يشرب يصير دمه ثقيل وسخيف ولعبه ثقيل ويضرب على غشمره بس ما يدري إن هالشي يدايق يعني مو قادرة أتحمل سخافته ونكته البايخة وحركاته السخيفة ومو بس شذي أي شي يصير خطأ مني حتى لو سهو يكبرها وما يقدر يسكت ويبدأ الإهانات والمسبات والندم واللعنه ويقولي إن أنا دمرت حياته بزواجه مني ويسب أهلي ويبدأ بالمسخرة السخيفة .
يعني مثل أمس شوفوا شنو صار . يه من الدوام شان يشرب قبل الغدا وأنا قاعدة أحضر السفرة صار دمه ثقيل وصار يطق راسي على غشمرة ويطالعني ويضحك علي باستهزاء جدام بنتي الكبيرة ويضحك على شكلي أو على شعري أو أي شي المهم إنه لازم يستفزني ويزعلني ما أدري والله شنو قصده بس غشمرته باااااايخة وأنا أكرهها حييييل . واحنا على السفرة ناكل حاولت أتغاضاه بس ما قدرت صار يضحك وبدون سبب شان أطالعه وأقوله بس خلاص صارلك ثلاث ايام على هالحال وأنا قاعدة أحاول أتحمل . لأن قلت هالكلمه شان يعصب ويقولي قومي من السفرة وما خلا علي مسبه أنا وأهلي وقالي إنتي قاعدة تتحمليني ثلاث أيام بس أنا متحملك 18 سنة وشان يدخل غرفته وسكر الباب وتركته بس زعلانه وطول الوقت كنت قاعدة أبكي وادعي بس مو بإيدي ولما قلت لأخوي قالي أنا غلطانه المفروض هو كان يضحك وأنا بعد أضحك مثله . بس بصراحة ما قدرت وضعفت مع إني وايد أسمع منه كلام وأسكت بس هالغشمرة السخيفة تنرفزني وما أتحملها أبدا . ولا أعرف اشلون أتصرف وياه وهو بهالحالة والله احترت قاعدة أسوي كل اللي يبيه خصوصا وقت ما يشرب علشان لا نتزاعل بس ماكو فايدة دلوني الله يخليكم .

أختي دمعة مبتسمة أشكرك بس هو ما يحب يسمع أشرطة ومثل ما قلت هو عالم بأمور الدين وهو بنفسه وده يترك بس تفكيره والظروف المعيشية واللي حواليه يحس إنه مو مرتاح ودايما يحس مو أنا الزوجة اللي يبيها علشان شذي يشرب بس الله كريم وهو الوحيد اللي قادر على كل شي . إلى أختي أم حمد القطرية أشكرك وايد حبيبتي وإن شاء الله أسمع هالشريط وأسأل من وين .

الله يهديه ويعينك عليه
اللي نسمع ان متعاطي هذا الداء لايستطيع تركه بسهوله فنصيحتى لك تتصلي بقسم مكافحة المخدرات
من غير ما يدري عنك ، صحيح انه سيتعب وستتعبين معاه ولكن احتسبي وباذن الله سترتاحون بعدها
جميعا ويعود لطبيعته ، وهذاهو الحل الاخير ان لم تجدي المحاولات والله يوفقك للاحسن والانفع...........

الله يهدي زوجك. بالنسبة للمشكله هذه فصعب الوحده تغير زوج مدمن على الخمر ولكن انت دورك هو
1- الدعاء باستمرار ولا تيأسي
2- انكري المنكر بالطريقه التي تناسب شخصية زوجك ولا تحسسينه أبد انك استسلمت وراضيه وأقلها انكار المنكر بقلبك.
3-لا تكلمينه وتناقشينه إذا هو شارب لأن االنتيجه ما بتكون لصالحك وبيضرب ويسب وهذا اللي ما تبغينه
4- لا تعاندينه وترفضين تعطينه حقه الشرعي مادام هو من النوع العصبي لأن بيتمادى ويعاندك زياده خاصة انك تبغين تساعدينه بس انتهزي دائما الفرص لتذكيره بالله وبأن الشئ اللي يسويه كبير وانك خايفه على صحته والشرب يجيب أمراض الكبد وممكن ضغط الدم خاصة انه عصبي ولكن وهو في حالته الطبيعيه.

هذا ما أراه ولكن تذكري ان الهادي هو الله وحده والتوفيق من عنده.

اسأل الله العظيم رب العرش العظيم ان يفرج همك
ويهدي زوجك هداية لاضلال بعدها