اول مرة اضع يدي على حماصة في حياتي ...ليه التسذب؟؟؟:)

وهذه ليست قراوة ولكنها بساطة...

او قولوا قرواة وش المشكلة يعني؟؟؟ماعجبتكم؟؟؟


:)


المهم واجي اركض ماصلحت الفطور...

ماسويت شي اول شي بسويه اني افطر على توست محمص...


بس المشكلة ماكان عندي زبدة دهن او اي شي..قلت ميخالف بدهنها بجبنة سينز بري حقت الفيجتاريان...



واممممممممممم...

وهي اقوم واسوي فيها فطاير دجاج وبيض وحركات حركاااااااااات على قولت ريحانوووه....:)

ويقوم رجلي ماتحمل الصدمة يوم شاف فطاير التوست الشهية حقتي... :)


وفقد القدرة على النطق لمدة خمس دقايق...


آخ يازين هكالايام الملحّطة...


لاوكل شوي من ال(فضاوة+قرواة) اروح احمّص توستين واقعد اقرمطهم احسبنه بسكوت...

:) آخ ياملحي وبس...


عاد يوم جا دور الفرن المكرويف ....قلت لرجلي يارجيلي والله ماله داعي المكرويف صح يسهل الحياة بس ماله داعي ....

بيني وبينكم انا متعودة على المكرويف في الرياض ...واصر رجلي هنا يجيب قال متتب متحملة بدونه صدقيني ...ان امابغيت اناد ندفع كثير عشان مكرويف واحنا كم بنقعد يعني في برايتن ماغير تسع شهور..

نبي نحمل ونالد ونجي بس...


بس مكرويفنا كان ب25 بوند ...ماتتخيلون يعني بحوالي 180 ريال سعودي او اقل...

ونوعية اصلية بالحيل وزيييييييييين....

بس طبعا تاخذينه والتوصيل بعر..والا ان بغيتي تشيلينه بيديك شيليه ماعليهم منك..

قمنا شلناه من عندهم شاله ابونا وان اقول والله ان يقطع قلبك خل اشيله انا انشط منك ...

وهو يرمقني بنظرة عميقة حاقدة ذات مغزى ويكمل طريقه..


هذا جزاتي ابي اخفف عنك هالفرن اللي يقطع القلب ؟؟


:)


ولأني في السعودية ماتسوقت انا ورجلي لأغراض شقتنا اللي الله يذكرها بالخير...

فماحسيت بلذة التقضي والتسوّق للبيت مع رجلي....

صح فيها نفخ وهواش وطق وطقيق بس ممتعة...

خصوصا لما تقعدين تشيلين كيسين وهو كيسة..بعدين ياخذ منك كيسة ويصير معك كيسة وهو كيستين...

بعدين يجي يقول هوف تعبت خوذي شيلي ....

ويصير معك آخر شي ثلاث اكياس...

مافي لذة ولامتعة زي هالهبال والركض قدام الانغليز


المشكلة انهم يستغربون من تصرفاتي خاصتن اللي عاقلين وكبار وشياب واللي بغوا من الكبر عتيا...

ويقعدون يضحكون علي لما يشوفوني اونون على ابونا أو أطامر وأهرجه بصوت عالي زي العنز الي مقضوبتن اذنها ...

تسني في صحارى ولافي غرناطة مول...

وهو ينزرني ويهاوشني ويقول اقصري صوتس فضحتينا قدام خلق الله....

ياحبي لك يارجلي...


_أقول انثبري واعقلي لايجيك العقال هلحين...
..............
:)


يتبع

الصلاة الصلاة....وماادراك مالصلاة ..يوم جينا للشقة اول ماجيت وانا على النية ...

لاعندي لابوصلة ولاغيرها ولكن لو اعرف بس وين الجنوب فيه كان عرفت القبلة...

تعرفون خريطة بريطانيا تشير الى ان الجنوب هو بحر المنش...وابد لفي شرق فقط وتتجهين لم مكة...


بس وينك يالمارينا عن بيتنا؟؟

المارينا شاطئنا يسمونه مارينا...مادري ليه :)


قمت انا شفت طيور نورس جايتن من هكالشنق...

من جهت الباب الزجاجي..حق الصالة...

قلت انا اها اجل هذا هو المارينا ...ومادام ذا الجنوب فذا الشمال وذا الشرق ومن هالحكي...

تبون الصراحاة انا صليت على النية في البداية لأن ماعندي بوصلة ولاعندي نت ولاكان حددت القبلة من خلال موقع الاخوة المسلمين في برايتن..

عاد يوم صلينا لنا كم يوم ويجي رجلي قلت حبيبي ماادري هي قبلتنا صح ولا قبلتك اللي حددتها لي بالرياض (نكبني نكبة يوم قبلة الرياض :) )...

وهو يقوم يهاوشني بلا وسواس ...

قلت عاد يابونا ذي صلاة مب لعب عيال قم جب بوصلة ولا شف لي صرفة...والا والله لااجيب لك الهيئة...


آخر شي قال ل قومي جيبي الخريطة عشان اثبت لك ان حدسك كان في محله...


واقوم اطير اجيبا...

قال شوفي هذا بيتنا...ويحدد الكورنر اللي حنا فيها والشارع ...قال ها...وين المارينا؟؟؟


واشوى تطلع القبلة صدق...


عاد هي ترا لو صليتي وانتي مضيعة القبلة لفترة طويلة مايلزمك اعادة الصلاة وهي مقبولة ان شالله لأنه أينما تولوا فثم وجه الله...


قال لي رجلي اخاف انتس ساحرة ولا شي ولاش يدريك عن القبلة بالحدس كذا..



قلت له لاوالله منب ساحرة....


إلا والله من الطاعة.....:):):)




........................



يتبع...

رهيييييييييييييييييييييييييبه والله بدووره كملي الله يقطع ابااليسج ...:)

ماشاء الله عليج ماشاء الله عليج قابلية رهيبة في الكتابة وجذب القارئ لأكمال مجريات الاحداث وبأسلوب فكاهي رائع
ماشاء الله على خفة دمك(قبل شوية قريت قصة العيد مع مورين وضحكت ضحك خصوصاً من قالت لك انك عراقية ) الله يبارك بيج يا اختي وينولك اللي في بالك آمين يارب

أقول تراتس أبلشتينا
كل شوي طامرتن لي في محل أدور مواضيعتس
قري ياحرمه خليتس في موضوع واحد
شوفي يوزرتس إسود من كثر ماأدور مواضيعتس
حطي مواضيعتس كلهن في توقيعتس خلينا نعرف نقر
بس والله ضحكتيني ياحبي لتس
أجل ثلاجتس مغربلتس أنا دون منتس
أعوذ بالله مايمديني أغسلها إلا وتربص بالماء
ينزل من الفريزر الظاهر
ولو نقول لأصحاب العماره يشوفون لنا صرفه رجعنا السعوديه وهم مابعد دقوا علينا

أييييييه ايه ايه
ترا أنا زيتس أول مره أشوف الحماصه هنا في كندا
أعرفها بس ماقط شفتها على الطبيعه إلا هنا
بس والله ماأقط أبدعت فيها زيتس
والحمدلله انا يوم وصلت كندا وإلا الشقه جاااااهزه من مجاميعه
والثلاجه مليانه الله يجزاهم الجنه اللي عبوها

ورجلتس تسنه رجلي يقول إذا مر يوم ماكلت رز تسني ماكلت شي


على فكره ترا توتس على البرد
أصبري ليت تجي في العشرين تحت الصفر
العام أنزل درجه وصلت لها كانت حول 28تحت الصفر
أقول أنا ألاحظ شي
إذا رديت عليتس أعجز أسكت
الظاهر اني أطلع حرتي وثرثرتي كلها عندتس
يالله ترانا مستنين الباقي