والله بعد كل الي قلتوه ما عندي شئ اقوله غير الله يجزاكم خير والله يغنينا عنهم عاجلا غير اجل ولكم تحياتي

موضوع قمة في الروعه

يسلمووووووووووووووووووووووو

السلام عليكم

كيفكم بنات ؟!

حبيباتي والله كل شيء بالترتيب والاستعانة بالله قبلها يصير سهل أنا أول كنت أشوف البزران لحالهم هذول أزمة بقوووة عيالي صغار وورى بعض لا وواحد فيهم مريض كل أسبوعين وهو في المستشفى وبمدينة غير مدينة أهلي..

بس بصراحة كنت أشوف إني طول اليوم هالكة نفسي شغل وماأحس إني أنجزت لييييش لأني اكتشفت إني ماني منظمة وقتي ولامرتبة شغلي وكنت استغفر الله العظيم في تلك الفترة أأخر الصلاة كل شوي أقول لاخلصي ذي الشغلة وروحي صلي رتبي ذا وروحي صلي ..

أول شيء طلعت فيه :
المحافظة على الصلاة في بداية وقتها (خير الأعمال أداء الصلاة في وقتها ) الله راح يباركلك في نفسك وعملك ومالك وعيالك وزوجك .
2) المحافظة على الأذكار (أذكار الصباح والمساء وأدبار الصلوات وأذكار الإعانة الي علمها الرسول لفاطمة عليه الصلاة والسلام تسبيح33 وحمد33وتكبير 33) والله يابنات لها أثر نفسي عجيب الأذكار وحاولي تذكرين الله وإنت تشتغلين ربي يبارك لك وتكوني مرتاحة ماتعصبين كل شوي على عيالك ونفسيتك زفت من الشغل وووووو ..
مشكلتنا إننا بعيدين عن الله ونبي الله يعيننا مانستحي نرفع يدنا لله ونطلبه العون وحنا مقصرين ماراح نقدر نأتي بكل عمل على أكمل وجه لكن نحاول نغطي نقص أعمالنا مع الله بأعمال أخرى (صلاة الضحى , الأذكار , قراءة لو سطرين من القرآن , الوتر لو بركعة)

3) التبكيير .. والله يابنات للبكرة بركة عجيييييييييييييبة هذه دعوة من النبي عليه الصلاة والسلام (اللهم بارك لأمتي في بكورها ) والله شغل الساعات الي تقضيه في بقية اليوم في النهار يآخذ منك وقت أقل بكثير وتحسي براحة يعني مو بركة وقته فقط بل بركة نفسية .
(عرفت ليش كان يومي يضيع في الشغل كنت أحب أنام الضحى وأقوم أسوي الغداء والشغل أبدأ فيه بعد العصر ) بس بعد الثلاث نقاط هذه عرفت وين الخلل لازم أصحى بدري واستعين بالله وأحاول أحسن علاقتي بربي وخاصة الأذكااااار والمحافظة على الصلاة بوقتها ثم بعد ذلك وضع جدول صحيح أحيانا ماألتزم فيه بس استفدت منه أني أرتب أفكاري وأقسم وقتي وهذا بحد ذاته مكسب مهم .

طبعا الردود كثيرة وودي أرد على كذا وحدة بس الوقت ماراح يكفيني ..

أبرد على الي تقول بعد ماراحت الشغالة عيالها قاموا يحوسون البيت ويوسخونه .. هذا بسبب اتكالهم على الشغالة يعني هم عارفين إن وراهم أحد يلم حوستهم عشان كذا بيحوسون ويحوسون ولا راح يلمون إلى لما يكبرون وهم كذا ..
بس إنت أجبريهم يرجعون كل شيء مكانه وخليك فوق رووسهم حتى لو أخذ منك وقت الوقفة فوقهم لاتساعدينهم بس وجههيهم وحاولي ماتصارخين عليهم وكل ماسوو كذا سوي معاهم نفس الشيء والي يكون نشيط فيهم ويرتب زين أعطيه شيء يحبه شكولاته أوأي شيء بسيييط وراح يبدأ التنافس بينهم والغيرة وبعد ماتعلمون خففي عنهم الدعم المادي عشان مايتعودون كل شيء بمقابل وإذا مافي مايسوون بس هذا إذا كبروا شوي وخلي الدعم نفسي وتشجيعي ..

في موضوع للأخت صندوق مصندق ( رهيب اسمك :) ) عن كيف نقضي على هذه الظاهرة << والله مدري الاسم كذا ولا أنا مألفة :)
المهم تتكلم عن ضرورة أشراك البنت في أعمال المنزل ونعلمهم يتحملون المسؤولية الله يجزاها الجنة
وفعلا هذي نقطة مهمة للبنت بالذات وحتى الأولاد نشركهم على خفيف يعني غرفته دولابه ينظف المكان وراه وغيرها ..

بس عندي مشكلة اللحين بنتي البكر 9 سنوات صايرة تتملل من شغل البيت ياليت شغل البيت إلا صايرة تحوس وترتيبها أي كلام وكل شوي جيبي شغالة ليش إحنا نشتغل ( الصراحة كل الي حولنا عندهم شغالات وتشوفهم كيف مريّحات فرااااجتني ) مشكلتي أنا حااارة يعني أكلمها عن أهمية الواحد يكون مرتب ونظيف كيف نخلي أحد يرتبنا وينظفنا ليش الله ماخلق لنا يدين عشان نخلي غيرنا يرتبنا بس بصراحة الشي الي ماكلمتهم عنه ولا قدرت مخاطر الشغالات (لأني أحسهم صغار ممكن يسوي لهم رهبة من الجنسيات الأخرى خاصة وإنهم مسلمين وحنا نروح الحرم ونختلط فيهم وماأبي أنمي فيهم التعنصر ضد الآخرين فما أعرف شلون أتعامل مع بنتي أحسها كبرت وممكن أتفاهم معاها بس هي قراقة كل وتسوي ناصحة لأخوانها ولسانها مفلوت فالي أقوله لها ممكن يحكها لسانها الين تعلم إخوانها الصغار خصوصا وإن عندي ولدي 5سنين صاير خوااااف من البنغالية ماصار يطلع الشارع يصيح لو شافهم وهذا مشكله لحالة ..

فالسؤال نشرك بناتنا معنا لكن عشان مايرجونا بين فترة وأخرى (جيبي لنا شغالة وريحينا ) وماأبي هالفكرة تكون براسها أصلا أبيها تحس بمسؤولية الترتيب والنظافة وإنها جزء منها هي .. (نبي حلول الله يجزاكم الجنة )

هذه مشكلة تربوية تواجهنا كثير لأننا مجتمعات مترابطة (العربية ) فإذا بتربي عيالك على شيء يشوفون غيرهم ويتعبونك في الشيء فيا إنه يجي بالقوة (وهذا كثير) أو بالإقناع وهذا في حالات على حسب الطفل ومدى أهمية الشيء عنده ووووو