الله يعطيك العافية على موضوعك الجميل والحساس في نفس الوقت ومهم لكل ربة بيت ، لكن أنا أضم صوتي لصوت الأخ وردي وموف كل كلامها صحيح ( أن جربت سنة بدون شغالات لكن ما أستفدت شي غير تعب بدني وجسمي وما أصابني من ألام مفاصل ووظهر وغيره ) وكل دا ويا ليته عاجب كل يوم إتهامات تقصير شكل . أختي العمر يخلص لكن شغل البيت ما يخلص وهذا ما يمنع إني أجيب شغالة وعيني عليها أما ما يخص إحتياجات الزوج والأولاد مالها شغل فيها أي شغلها محصور فقط في نظافة البيت حتى الطبخ مالها شغل فيه وأتفرغ أنا لراحة زوجي ومذاكرة أولادي وتربيتهم التربية الصحيحة بإذن الله .

أمونة القصيم

هذي فكرة أعتمدتها بعد تفكير بالحلول تخفف من أعباء الشغل ..

البزران عندي في البيت صرت أشتري لهم ترنقات خفيفة ياشورتات أو طويلة أو بيجامات أشكالها حلوة مو شكل بيجامات تقليدية والبنت الكبيرة(9سنوات) أجيب لها قمصان قطن قصيرة بس مو مرة قصيرة عشان نعلمهم الستر .. المهم لبسهم كله ناااعم وحلوو وأقطان للبيت .. هذي أفضل في الغسيل مع المجفف ماتحتاجي كوي طبقي وحطيها في الدولاب .. يعني حتى لو جاك أحد فجأة لبسهم حلو ونظيف يعني بالله الواحد بيقعد في بيته دايم على ستقة عشرة جينزات ولا بناطيل واقفة ولا تنانير قصيرة ليش الأزمة ذي الأطفال يبغوا شيء مريح يساعدهم وهم بيلعبوا وأفضل شيء لك ولهم وبنفس الوقت شكله حلوو قدام زوجك ولو جاك أحد بعد ..

ولبس الخرجات ارفعيه عنهم خلي لكل واحد درجين (واحد للبس البيت والثاني للخرجات) وحتى لو انحاس درجهم لما يجيوا يسحبوا اللبسات يصير درج واحد ترتبيه وخليه هو يرتبه وأنت ساعديه وإذا كان صغير إنت رتبيه وهو يساعدك يناولك الملابس ولا يحطها المهم أشركيه عشان يتعلم .. ولبس الخرجة راح تستهلكي واحد في الأسبوع أو اثنين آخر الأسبوع أغسليهم وأكويهم مباشرة وماراح يكون عندك كوي غير لبس الخرجات بالنسبة لهم يعني خف الشغل عليك كثيييير ..

توتة توتة :

بالنسبة لغسالة المواعين صحيح سمعت عن الثلاثة إنها أفضل شيء بس (أريستون) يقلون أعطالها أكثر من الثانيات إضافة إلى إنه ماعندك التحكم بالرف الي فوق أو الي تحت أنا كنت ناوية أريستون بس غيرت رأيي على إل جي الكبيرة مو الصغيرة بإذن الله .

بالنسبة للغسالة الأوتوماتيك أنا عندي كليفنتور صراحة رووووعة بس اهم شيء خذي الي تتعبأ من فوق مو من الأمام لأنها تنظف أحسن من الي تتعبأ من الأمام (عن تجربة) كنا في سكن وكانت غسالتنا تتعبأ من الأمام والآن أنا عندي الي تتعبأ من الأعلى .. إضافة إلى إنه لازم تعرفين إن بعض الغسالات لو تبغي تعيدي دورة الغسيل مايمديك تكب الموية أو ماتشتغل إذا خليتي الباب مفتوح بالنسبة لي غسالتي تشتغل والباب مفتوح وماتكب الموية إلا إذا قفلتي الباب (تصير واقفة) وأيضا ماركة ميتاج والباقي ماأعرف .

بالنسبة للنشافة شوفي أهم شيء في درجة التحكم بالحرارة أو لا لأنها مهمة حتى ماتعدم لك الملابس بعضها ماتستحمل درجة حرارة عالية (تبهّت,, أو تنمش,, أو تنكمش)

والغسالات الي أعرفه كلها درجة تنشيفها أعلى شيء 80 أو 85 بس يعني مافي تجفيف100% إذا تعرفي نوع اكتبيلنا إياه .. فاشتري الي فوق بعض أوفر بالمساحة وأرتب لك وأريح مرة وحدة ..

بالنسبة لمحضرة الطعام من براون عندي حلوة بس 6*1 أحلى منها وأنا حقتي قديمة من أيام زواجي يعني لها عشرة سنين وأبشتري اللحين بإذن الله 6*1 ..

بالنسبة لقدر الضغط برضوا عندي من زواجي وهو ماركة (سب) فرنسية مرررة ممتاز ..

بالنسبة للمكواة البخار أنا للآن مترددة بين الكبس والي زي المكنسة وماني حريصة مرة عليها لأن ثياب زوجي وغتره البيضاء يكويها برى بقي بس لبس الخرجات حقت عيالي وملابس زوجي الداخلية هي الي يبيلها كوي وطالما إني أسبوعي أكوي فمايكون متراكم الكوي لبس البيت لهم ع الدولاب على طول وأنا ماني موظفة وأخرج مرة بالأسبوع .

بقيت مكنسة السيراميك في نوعين (هوفر ) و (بيسيل) وأنا مايلة أكثر لهوفر يمدحونها أكثر ومريت ساكو قبل فترة وكانت هوفر أرخص وهي بحدود ألف وميتين وبيسيل كانت ألف وستمية الفرق بينهم 400 ريال .. بس قلت أبستنى تخفيظاتهم وأروح أشتريها إن شاء الله




فيه نقطة يابنات الي تقول الشغالة ماتقارن بالأجهزة .. وبنفس الوقت تقول الطبخ والأطفال عليّ .. أبسألها شلون تجي ذي ؟!
إذا تبين الشغالة للتنظيف بس طيب إنتي غسلتي مواعينك وملابسكم بالأجهزة وجففتيها وطيحتي عنك نص أو ثلاث أرباع الكوي والطبخ كذا كذا إنت بتطبخين وش بقي مسح السيراميك خذي هالمكنسة وماضرك دورة بسيطة بالبيت ماتآخذ منك بالكثير لو كان بيتك كبير ساعة وغسل الحمامات كل يوم سريع ومرة وحدة بالأسبوع تنظيف عميق مايآخذ منك الحمام ع السريع أكثر من ربع ساعة مسح المطبخ إذا ماأنكب شيء مو لازم كل يوم تغسليه مسح سريييع مع الأسطح وبس كلها نصف ساعة بالكثير والكوي مرة بالأسبوع وراح يكون خفيف لبس البيت أغلبه في الدولاب إذا ماكان كله على حسب نوعية ملابسك .. يعني مع وجود هالأجهزة الشغالة وش لازمتها تشتغل ساعتين وباقي اليوم تريّح .. وحتى لو تعبتي يالأم مرة بالأسبوع على التنظيف العميق لكل شيء ماهو ضارك ولا كاسر ظهرك بالعكس ترتاحي نفسياً إنت الي منظفة وتعرفي كيف نظفتي مو شغالة تضحك علينا مهما كان مارح يهمه تجتهد يهمها راحتها أكثر من إنها تكون أمينة ومخلصة بعملها ..



بالنسبة للأطفال شوفوا الجانب يروحوا يتسوقوا وأطفالهم معاهم بس حنا يالي مكبرين المسألة مافيها شيء تروحي تتسوقي ومنها هم يتمشوا ومايحتاج التشنج في عملية التسوّق

عموما خرجات السوق مو كل أسبوع ولا كل شهر أحيانا يمر شهرين مانزلت السوق حتى السوبرماركتات الكبيرة (بنده وجيان وكارفور ووو) مو كل مرة أبقضي أروح لها كتب الأغراض له وهو يروح يجيبها وحيانا أروح معاه إذا أبشترى شغلات للحلى والخرابيط ..
ولو بغيت أروح أزور وحدة والد و تعبانة أو عندهم عزاء أروح لهم وهم مع أبوهم بالبيت شوي ماأطول وعذري للناس البزران مع أبوهم ماأقدر أطول منها أديت الواجب وماطولت (بعدين العذر هذا يريحك مايخليك تلتزمين كثير)

فليش أجيب شغالة على شغلات نادرا ماتصير ؟!!!!!!!!! ..

مو معنى ذا أنا حارمة نفسي من الطلعات والروحات إحنا كل سبوع نطلع نتمشى الجمعة (خرجة عائلية ) والخميس زيارة لأهلي وأهله بين فترة وفترة نروح لهم يانمر والدينه ولا تكون الجمعة بالاسترحة بس مو لازم كل أسبوع ..
متى تكثرالطلعات؟ بالإجازة ممكن تسيرين على صحباتك قريباتك وساعتها إنت عندك سعة بوقتك شوي أكثر من باقي أيام السنة وفي هذي الفترة البعض تقدري تآخذين عيالك عندهم والبعض ماراح تقدري تآخذيهم خليهم عند أبوهم ولو كانت زيارتك قريب نومتهم أحسن يعني قبل العشاء وتكوني مجهزة عشاهم وبعد العشاء يتعشوا ويناموا يريحوا حتى أبوهم وماتنقلب الشغلة عليك .. يعني في حلول لو انحطينا في الموقف أما نفكر وإحنا ماحنا في الموقف صعب أو نفكر وحنا مو متقبلين الفكرة ماراح نطلع بنتيجة أبداااااااااا لو جبنا كل الحلول المنطقية ..

جزاكم الله خير سبق وقدمت الشكر لصاحبة الموضوع الرهيييب كثر الله من أمثالها

وحابة أضيف أمر هو أن المسألة للأسف الشديد صارت متوارثة ولازم نلقى حل لهالأزمة من ناحيتي جبت خمس شغالات من بعد اول طفل لأني اسقط و لأني في بيت اهلي كنت مرتاحة طيب ليه ؟؟؟

ليه نريح البنت وتطلع فاشلة و ماهمها غير شكلها و دراستها و بس للأسف أنا اعاني من هالنقطة تزوجت والقهوة ما اعرف كيف يصلحونها ؟؟

والرز و غسيل الملابس وغسيل الحمام كل شي الحين صعب صعب بزيادة علي ..وليتني كملت دراستي ماخذت لا هذي ولاهذي ..

واشوف وحدة موظفة وقبل تجيب اطفال كانت جدا مرتبة و نظيفة و نشيطة ببيتها ماشاء الله لاقوة الا بالله رغم سمنتها .. لأنها ماتعودت على الخدم ..

وبصراحة مهما العاملة كانت أمينة و حبوبة ماتضمنين الحركات الي هي تعتبرها عادية جداً وأنت تقرفين منها مثل تقبيل الصغار في أقواههم ...

وإذا منعتها بلطف وقلت لا يافلانة لاتسوين كذا .. و رحت ورجعت لقيت الطفل ريحة فمه غريبة جدا .. وتبدين تشكين وتستثقلين وجودها


ومهما تعلمين وتتعبين من وراك تكتشفين لو راقبتي انها تمسح الارض مثلا بممسحة المجلى و اشفنجة تخصصينها مثلاً للأسطح بالمطبخ تتغافلك و تزيل فيها علكة ناشبة بالحمام ههههههههههههههه اقول مثلا مثلا يعني ومن وراك علووووم خاصة الي تنام الصبح وماتراقب و الله شفت العجب والقرف من وراي شي عجيب مافيه حل الا تحرقين دمك اربع وعشرين ساعة وراها وراها وحتى لو كاميرا ممكن تسوي اشياء بغرفتها وتنزلها وتضيفها للتوابل لأن عندهم اعتقاد ان الشخص الي ياكل من قذرهم تكرمون يصير يحبهم بزيادة معلومة تأكدت منها بنفسي فبلااااش الجلسة على قلوبنا و الحد من حريتنا كفااااية ..من قلب اقولها كفاااااية استباحة لخصوصياتنا ..

ياليت فيه باليومية عالأقل نصير نوصل حل وسط لا نهلك ولا نتعلم الكسل والفشل اعذروني انا صريحة بزيادة


و فيه أمور كثيرة عانيت منها جدا من العاملات لكن ما أبغى أقلب موضوعكم غيبة

الله يستر علينا وعلى الجميع وأسأل الله يغفر للجميع و بس ..


نقطة ثانية فيه حديث انكتب غلط بالموضوع بس للأسف مو متذكرة اسم صاحبته او الصفحة الي هو ( من ترك شيئا لله عوضه الله بخير منه ) لكن الاخت كاتبته بلفظ غير وغير المعنى بعد .. وبحثت مالقيت نص الي هي كاتبته ارجو من صاحبة الموضوع او المشرفات البحث عنه لأني ماوجدته ..


بارك الله بالجميع ..

والله إن موضوعك رهيب وياليت يثبت ,,, أنا عن نفسي ولله الحمد مسوية لي جدول برنامج لتنظيم وتنظيف البيت ومرتااااااااااااحة بالمره عقب ماكنت أنوااااااااااع الحوسه والكسل قبل الجدول لأني ما أدري وش أبدي من الحاجات والأشغال ,,, أما بعد الجدول الصراحة إرتحت وصار عندي وقت فراااااااااااااغ ,,,
أهم شي بتنظيم الوقت والشغل (((( الجدول ))))