سلام ياجماعة
انا ما شاركت معكون غير من فترة قصير بس حابة و الله اتواصل معكون
سلام للجميع

أهلين يا بنات
أهلاً بنت العاصي
يسلمولي بنات حمص، اي والله ذكرتيني برفيقتي لهلأ على اتصال والحمد لله وشكرا على القصيدة روووعة
أهلين مزون
أنا ولادتي إن شاء الله بأول ديسمبر
Syrian girl76
مية أهلا وسهلا فيك معنا وأنا اللي بعرف أديش مشغوولة يا حلوة وتسلملي أحلى رفقة معك

على فكرة بنات نحن تعرفنا على بعض عن طريق المنتدى يا الله انتو شدوا حيلكن كمان لأن شكلكن كتار بالخليج قصدي بكل بلد في ما شاء الله عدد منيح

شام
اي شو هالنشيدة الحلوة والله كلك ذوق ما شاء الله بتجنن ويسلمو على الموقع
وأنا بوافقك بالرأي بخصوص التأقلم لأن عن جد شي عن شي بيفرق والله يختارلنا الخير كلنا

بنات كلنا عنا نفس القصة
أنا زوجي قبل ما يخلص دراسته رجع على الكويت منشان البدل والحمد لله تخرج ودفعو طبعا بعد 5 سنين ولا تنسو تعقيداتهن
lolia
هلا عزيزتي ، هالمرحلة من العمر كتير مهمة هون بيبلش الولد يخزن ويتعلم والصراحة لا تستقلي بإمكانياته وبيفهم كل شي
أنا بنتي حفظت كتير من السور الصغيرة بهالوقت وأناشيد كمان وكل شي بقلها ياه من تعليمات حافظتهن
وأهم شي تعملي العلاقة معها صداقة

ديرو بالكن يا بنات

السلام عليكم يا بنات
اعذروني على الانقطاع
الله وكيلكن بيتي عايم
عم نشتغل بتزبيط المنتفعات خصوصا التواليت أكرمكم الله كان منزوع والسيفون عم بيفيض وقصة وسيرة والله كرهت حياتي بهل كم يوم
لأ وفوقها في جماعة منعرفهم بدهن يرجعوا عالشام عم ينهوا أمورهم وقاعدين عنا هلكم يوم وجايبين غراضهم لعنا وزوجي عم بيساعدهم وأنا مطووشة طوش والله عجئة وولاد صغار وما عم بعرف كيف النهار عم يمر علي ......لادراسة ولانت ولاركونة ولاغيره
الله يفرجها
سلامي للجميع وراجعتلكن للرد على جميع السوريات تئبشوني أبش
وللرد على ساجدة اللي بعثت لي رسالة تهديد (صورة وش خايف ومرعوب)
وبئلها وحياتك ما عم بهرب لإنك طلبتي تتعرفي ......وبعد ما إسأل زوجي العزيز وإذا وافق إلك علي نزلك صورة الهوية تبعي ورقم التلفون عالعام ......ولي.....ولييييييييييي إجو مشرفاتنا العزيزات يطئؤولي برغي...
سلامات وقبلاتي للجميع
المطووشة تامو

أهلين يا تامو ....

الله يكون بعونك يا رب

والله صعبة كتير الله يهون عليك امورك ويعنيك

والله ضحكتيني على قصة البرغي ....

نور الدرب .الله يسلمك ولا شكر على واجب

الحمد لله انه عجبتك

اهلين بنات

نورتي الموضوع تامو والله يكون بعونك يارب

مريت على السريع مشان ساجدة ما تزعل ...لي رجعة ان شاء الله