أهلين بنات شو أخباركن
سلامات للأطفال المرضانين
وأهلا وسهلا بالبنات الجدد نورتوا، سالي أهلين فيك نورت
شام يسلمو على هالخبر وبالنسبة لسؤالك أنا أكتر شي بحب ملتقانا والأطباق الساخنة ههههه بس هلأ من الوحام ما أسترجي شوفو أبداً
وشكرا للي سألوا عني ............... :) شكرا طولكرم68 وآية الأمورة سلامات لبنتك
أما قصتي فهي بتضحك بس أنا كنت عم أبكي وقتها من الرعبة
محسوبتكن بخاف كتير من الكلاب والحمد لله هون بكندا أهم من البشر وبنايتي بالذات ملياااااااااانة
المهم كنا بالسرداب عم نصف السيارة وأنا سبقت زوجي رايحة حتى اطلب الأصنصير بعرفو بيتأخر
فسمعت صوت ناس جايين فقلت بنطر زوجي حتى يجي وفجأة التفتت ورايي ولقيت كلب أسود وبشع ومو مربوط كمان وطبعا ممنوع هالشغلة
وهو شافني وكأني قاتلتلو قتيل وركض وهو عم يعوي وراي وأنا صاروخ أركض وهو يلحقني وصرخ وأبكي
وطبعا أنا حامل وأصلا تعبانة كتير فأغمى علي ... تخيلوا
وزوجي صار يصرخ عليهن لصحاب الكلب أنه ليش مو مربوط وأنه إذا صرلي شي هنن المسؤولين لأني حامل طبعا هنن اعتذروا وماتو من الرعبة
وطبعا تشنجت وما بقى أقدر أمشي وبس عم أبكي جن جناني
والصراحة كتير اكتئبت بقى منشان هيك طولت الغيبة
أنتو شو أخباركن؟
سكرة هانم أنت سورية ما قلتيلنا ولا شي عنك؟؟؟؟؟
إم آدم
إذا رحت مو معقول ما تمري على مطعم بوابة دمشق على طريق المطار من أحلى وأطيب المطاعم
أول شي في أكل متنوع يعني مو بس عربي حتى أجنبي وصيني وغيرو وكمان مكان للألعاب وللصلاة
وعندك من المطاعم القديمة مطعم دمشق القديمة روووووووووعة قعدة شرقي على الآخر
وهو يمكن بالحميدية ولا تنسي تطلبي اللبن العيران تبعهن مع الثوم المدقوق
وببلودان عندك أروع مطل من مطعم جنة بلودان وفي مطعم كرم العلالي هدول أهلي جربوهن
وبعين الفيجة جربت أنا أبو وليد وأبو وحيد والاتنين المشاوي والكبة المشوية تبعهن روووعة
وبالربوة في كتير وأنا مجربة توشكا هو حلو بس ما حسيت كتير أكلو متميز
وإذا بدك الأكلات الشامية الظريفة كليها بالشام نفسها، في مطعم قعدتو كتير عادية
بشارع العابد اسمو المطعم الصحي بس أكلو كتيييييييير لذيذ
أنا متذكرة هالشغلات لأن آخر سفرة عالشام كانت من 3 سنين فأغلبها جديدة
بنات أنا كتير قلقت على ساجدة شو وينها؟؟؟؟
سلام

اهلين نور سلامتك حبيبتي من الرعبة وديري بالك عا حالك وعا حملك زكرتيني بموقف ما بنساه كنا رايحين انا وجوزي لعند وحدة ايطالية دكتورة بالجامعة المهم هاد وقت كنت حامل ببنتي الاولى من شي 3سنين ونص كنت متجوزة جديد المهم كانت مقعدتنا عاطاولة وحاطة سناك وجنب الغرفة يلي قاعدين فيها كان المطبخ وهي عندها كلب و قطة حابستهم هنيك لانو جوزي قلها انو انا بخاف من الكلاب بعدين راحت على المطبخ وخلت الباب مشقوق وما بلاقيلك الا الكلب مد راسو وركض باتجاهي وحط راسو بحضني هالحنون وانا اتجمدت من الرعبة وراحت الواني فهي اجت بسرعة واخدتو وقعدت تعتذر وبعد ما بعدتو عني نطيت لعند جوزي ودموعي تشر وقلبي حيوقف تنذكر ما تنعاد وبالنسبة لسؤال شام اكتر قسم هو ملتقانا وبعدين الطبخ والحياة الاسرية واستفدت من المنتدى بشكل عام من كل اقسامو والله يجزيهم الخير للقائمين عليه

حبيبتي في جهاز بالنسبة للكلاب بيطلق صوت لا نسمعه فقط الحيوانات (أمواج فوق صوتية) ويجعل الكلب يثبت في مكانه ولا يتحرك وحجمه صغير وأظن أنه متوفر في كندا..
وديري بالك على حالك يا قمر

ألف سلامة عليك يا نور الدرب والله أقلقتيني عليك بخصوص هالكلب ومتل ما قلتي الكلاب اهم من البشر
لازم تشربي من طاسة الرعبة

كيييييييييييييفك بنات

ياربي ...لك نور الدرب موقفك فظيع الله ستر ما صار لك شي ...والحمد لله على سلامتك

اي انا جارتي بالعمارة الي جنبي عندها كلب اسود وضخم و كل ما شافني بصير ينبح وينط وكان صار له شي ...بقى كل يوم الصبح وانا طالعة لاخذ الاولاد على المدرسة بصير ينبح وانا بصير نط ...مع انه مسكر عليه البوابة بس بضل بخاف واحاول اتشجع قدام اولادي بس جواتي عم سب امريكا وكلابها ..... بتصدقي اول مرة ولادي ما رضيوا يعدوا وانا اصرخ فيهم ولك تعالوا ما رح يقدر يجي لعندكم تقول لي بنتي بركي نط من فوق ....ومرة شفت صاحبة الكلب تمنيت قول لها كلبك شي يوم رح يجيب لي سكتة قلبية "لا سمح الله"

ومرة كنا على البحر وانا اخذت الاولاد على الشاطئ ليغطسوا رجليهم وكمان ما لاقي الا كلب كبير وضحم كتير عم يتمشى جنبنا على الشط ...والله ارتعبت بس نبهت ولادي ما يركضوا لان بعرف ان اذا الواحد ركض بصير الكلب يركض وراه المهم المساكين اتجمدوا وهو عم يعدي من جنبهم صورتهم وبعتت الصورة لاهلي ...كانت بتفرطضحك كل الاولاد مشمرين عن ايديهم ورجليهم وعم يستعدوا للهرب

على فكرة اهلي قالوا شو هالكلب هذا ؟ هذا حصان مو كلب هههه

وفي مرة كمان كنا رايحين مشوار وسبقت زوجي وطلعت مع الاولاد على السيارة وانا جوا عم استناه شفت كلب مفلوت عم يمشي قدام باب بيتنا .كنت بدي اتصل نبه زوجي بس ما لحقت كان زوجي طلع واول ما سكر الباب ركض لعنده الكلب ووقف عند رجله وصار ينبح بقوة وانا والاولاد بالسيارة عم نصيح ..زوجي مشي بكل هدوء لعند السيارة وانا عم قول ماشاء الله على الشجاعة الي عنده واول ما دخل على السيارة وسكر الباب صار يلهث ويقول ياربي حاسس قلبي رح يوقف شو هذا ...طلع ميت من الرعبة بس عم يتظاهر بالشجاعة قدام الاولاد والجيران هههههه وضل فترة عم يريح اعصابه قبل لا يمشي

معلش الظاهر انا نسيت حالي ونازلة قصص وحكايا بس ترى صار لي زمان ما حكيت مع حدا

يلا اجيب لكم موضوع وبعد ما بشوف ردودكم بقول لكم قصتي بها الخصوص

اذا الحارة عندك عملت كراج سيل بتروحي بتتفرجي شو عندهم ؟؟ وهل مرة عملتي او فكرتي تعملي معهم كراج سيل؟؟