نفاس المصريات

السلام عليكم يابنات المنتدى كلكم
انا فى موضوعى دة اريد ان نتجمع نحن المصريات النفساء وتقول كل واحدة مننا كيف تقضى او كيف قضت فترة نفاسها لأنى كل ما ادخل المنتدى الاقى الاخوات العربيات بيعملون جداول ويمشون عليها
وفيها اشياء اسماها غريب اول مرة اسمع عنها وكمان بيتجنبوا بعض الاكلات ويأكلوا البعض الأخر
وانا من مصر لاافعل مثل كل هذا
فاقلت لية مانتلمش احنا المصريات ونشوف كل واحدة بتعمل اية
وهابتدى انا اولا اقولكم انا بعمل ايه فى الأربعين يمكن افيد حد من الأخوات
اولا : انا ولادتى كانت قيصرية وقعت فى المستشفى ثلاث ايام ماكنتش باكل فيهم خالص عشان البنج عملى كسل فى الهضم وقالولى من اليوم الثانى اشرب سوائل فقط ولما روحت البيت ماكنش ليا نفس للأكل اول اسبوع ودة خلانى اخس بسرعة فبعد عشر ايام من الولادة نزلت حوالى عشرة كيلوا
المهم انا الدكتور قالى عشان اخس ابعد عن السكريات تماما وفعلا عملت كدة ونزلت كمان اتنين كيلوا وانا دلوقتى فاضلى اسبوع واخلص الأربعين وفاضلى 5 كيلوا وارجع الى وزنى قبل الحمل بس دول ثابتين بقالهم مدة ومش عايزين ينزلوا
انا نظامى فى الأكل باكل خضار كتير ولحمة وفراخ وسمك وسلطة وقليل من الأرز
بس دة بالنسبة الى الأكل وكمان انا مش باكل بسمنة خالص بالكل كل اكلى بزبدة او زيت
اما عن المشروبات حلبة ، ينسون ، نعناع ، لبن ، عصائر فريش وكمان مشروب اعشاب سكيم لأدرار اللبن .
بس هو دة الى بعملوا فى النفاس وكل اكلى ومشاريبى مش محددة الوقت وملهاش جدول بس اهم حاجة ملتزمة بيها الحلبة كل يوم عشان الرضاعة
ياريت الأخوات المصريات كل واحدة تكتب تجربتها وتقول بتعمل ايه ؟ وفيه حد بيطبق جداول مثل العربيات ؟واذا فماذا استفادت ؟
وياريت ذا فيه حد بيعرف يرتب الدردشة المصرية دى يعمل كدة عشان انا خايبة اوى فى ترتيب مناقشة المواضيع
ويالله يابنات تفاعلوا معى فى الموضوع المهم دة .