.
.
بسم الله الرحمن الرحيم
السلام عليكم ورحمة الله وبركاته
أخواتي انا بكتب لكم قصتي وابغى آخذ مشورتكم ورأيكم فيها أدري اذا قريتوها يمكن ماتصدقون لكن يعلم الله اني صادقة بكل كلمه كتبتها واني ماكذبت عليكم بحرف من اللي بقوله
زمان كنت اسمع قصص تتكلم عن المصالح بين الناس وان فيه ناس ممكن تتقرب منك لأجل مصلحة فقط وتبيعك اذا انتهت مصلحتها كنت احسب هالقصص ماتصير الا في الافلام والمسلسلات ومستحيل تصير على ارض الواقع حتى عايشتها بنفسي وعرفت انها حقيقة وممكن تصير حتى من اقرب الناس لك
انا يااخواتي كنت متزوجة من سنوات وعايشه مع زوجي حياة كويسه ومعقوله لكن كان فيه مشاكل وخلافات كثيرة بيني وبين زوجي .
واهلي عايشين في مدينة ثانية وكانت ظروفهم ووضعهم المادي مره سيئ , بالذات ان اختي الكبيرة كانت مطلقة وعندها اولاد وعايشه معهم في نفس البيت وترفض تساعدهم بأي شيء على انها موظفه ووضعها المادي ممتاز , بل كانت بالعكس تضغط عليهم وكانت في حرب مستمرة مع امي وخواتي اللي اصغر مني لأنها ماتعرف تحترم لاكبير ولاصغير ولاتسوي حساب لأي شخص ولايهمها احد , لدرجة انه ماكان بينا وبينها لاسلام ولا كلام وكان هذا بسببها هي وبرغبتها هي
وهذي المشاكل كانت في بداية زواجي وكنت انا دايما شايله هم امي وخواتي فكنت متحملة مسئولية خواتي وانا بعيدة عنهم يعني اذا جيت لهم البيت اشتري لهم كل شيء يحتاجونه واصرف عليهم لدرجة اني اروح بيتي مامعي ولاريال وفوق كذا كنت دايما شايله همهم عشان ظروفهم صعبه وبإستمرار اتواصل معهم عن طريق الهاتف وهم طبعا دايما ملتفين حوالي ويرحبون فيني وياخذون رأيي بكل شيء ودايما في ضحك وسوالف معهم ووناسه كانت علاقتي فيهم مره قويه وممتازه كل هذا عشاني كنت اصرف عليهم واعطيهم واشتري لهم واذا جيت لهم البيت اقوم معهم في شغل البيت كنت تقريبا واهبه نفسي وتفكيري وفلوسي لهم .
وكان كل هذا على حساب بيتي وزوجي اللي كان يتضايق من مبالغتي في هذا الشيء , والحقيقة اني ماكنت استقر في بيتي ولا كنت افكر بحل لمشاكلي مع زوجي ومالي طاري الا اهلي وبس , وفوق كذا مشاكل اختي كانت مأثرة على حياتي لان زوجي يعيرني فيها وياخذني بذنبها فأي شيء سمعه او شافه على اختي كان يحطه علي أنا .
وبعد كم سنه تصالحنا مع اختي وبدأت تتداخل معنا, وتتدخل في حياتنا, وكانت تصرفاتها فيها نكد بالذات لي أنا لأنها مقهورة مني لاني صرت الكل بالكل بعد ماهي قاطعتنا , ولاني متزوجة وشايفه الدنيا مع زوجي وهي مطلقة وعايشه حياة كئيبة بالرغم من راتبها الكثير, والحقيقة انها هي اللي قاطعتنا وفرضت على نفسها هالحياة,وانا كنت اتحمل تصرفاتها ونكدها واسكت وماقول شيء لأني مابغى اسوي مشاكل في البيت و مابغى اضايق امي اللي ماصدقت ان علاقتنا ترجع فيها .
ومع الوقت بدأت تقوى علاقتها بخواتي بحكم انهم في نفس البيت وصارت هي تصرف عليهم وتسوي لهم شغلات كثيرة وانا استمريت في موقفي الاول مع اهلي وكانوا هم كويسين معي ومافي أي مشاكل , وكنت وقتها عامله حسابي انه اذا خواتي تحسن وضعهم واكبروا واعتمدوا على انفسهم وماعادوا بحاجة لي راح اقلل من زياراتي لهم والتفت لبيتي وحياتي ومشاكلي مع زوجي .
لكن الوقت ما امهلني ولا جاء على كيفي وتطلقت في وقت ظروف اهلي صعبه وماهم فاضين لي وانا مابغيت اضغط عليهم واحملهم مسئوليات زيادة فتخليت عن اولادي وتركتهم عند ابوهم وانا الله يعلم بحالي لكني ماكنت ابين الشيء هذا لأهلي لان اشكالهم ماكنت تشجع انهم بيوقفون معي او بيساعدوني .
وصرت انا مطلقة وبعيدة عن عيالي وجالسه في البيت بحكم اني مخلصة دراستي وماتوظفت
وكلها فترة بسيطة وتحسن وضع اهلي ومعه تحسن وضع خواتي وساعتها ماعاد يسوون لي أي قيمة في البيت ولا أي وجود لدرجة انهم يمرون علي وكأنهم مايعرفوني لا سلام ولا كلام وشاطرين بس بالتأمر علي وكأني خادمة وحتى وحنا جالسين ومجتمعين مع بعض يسولفون مع بعضهم ومطنشيني واذا حاولت ادخل معهم في السوالف يحقروني ويقللون من شأني بكل شيء واذا طلبت منهم نطلع مع بعض مشوار يرفضون وهم يتفقون ويطلعون مع بعض بدون مايخبروني .
كل هذا بدال مايقدرون اني امر بظروف صعبه وبحاجة لوجودهم معي وانهم يلتفون حوالي لحد ماتجاوز هالظروف لكن هم مايهمهم لأنه ماعاد عندي شيء اقدمه لهم وماعادوا بحاجة لي ولا لوجودي معهم , وأمي ماكان موقفها بعيد عن موقف خواتي ويمكن الشيء اللي شجع خواتي يعاملوني بهالطريقة هوكلام أمي عني حيث انها هي وخواتي لم يعودوا يذكرون لي الا الشين والخطأ وبس . وايضا اسلوب اختي الكبيرة اللي كانت دايما تحاول تفرق بيني وبين خواتي حتى بعد ان تزوجت وصار لها حياتها .
وبعدها انا فهمتهم وعرفت انهم ماراح ينفعوني بشيء , وصرت اعاملهم بالمثل يعني ماعدت اكلمهم لأنهم هم مايكلموني وحتى بعد ان صار يمشي لي ضمان اجتماعي طنشتهم وماعدت اعرفهم بشيء لاني شفت حسدهم لي قبل مايمشي لي الضمان حتى على الشيء القليل اللي يجيني من اخواني
وهذي التصرفات قهرتهم وخلت المشاكل تكبر بينا ويوم حصل موقف وعاتبتهم ولمتهم على سواياهم قالوا انتي مصدقة انك مسويه فينا معروف حنا أصلا مانطيقك وانتي اللي تتلزقين فينا وحنا نشفق عليك عشان ماعندك أحد وكيف أنا ماعندي احد وأنا اللي كنت مهمله زوجي وعيالي وحياتي عشانهم , ساعتها حسيت اني غبية وانه انضحك علي في الدنيا وندمت قد شعر راسي على كل دقيقه قضيتها مع هالخوات وهم ماكتفوا بهذا بل قالوا عني ابشع كلام حتى الكلام الوصخ قالوه لي , وعيروني بعيالي عشاني تركتهم وهم يعرفون كل الظروف اللي مريت فيها , ودايما يرددون على مسامعي اني مجنونه وانجنيت ومن هالكلام عشان يبغوني اصدق اني مجنونه , ويتشمتون فيني بكل شيء ويضحكون علي عيني عينك كانت أيام صعبه علي لدرجة اني اعتزلت في غرفتي تجنبا للمشاكل و ماصرت لا اطلع ولا اروح ولا اتكلم مع أي احد واغرقت نفسي بالانترنت وصار هو كل عالمي وماصرت لا آكل و لا أشرب ولا عايشه زي الناس واهلي كان موقفهم انهم يقولون معقولة كلهم ضدك ولا وحده منهم معك وهذا لأنهم هم اصلا يحرضون بعض حتى اصغر خواتي اللي أنا شلتها على ايدي اول مانولدت وكانت تبكي يوم تزوجت وتركت البيت وتبكي كل ماروح لبيتي واتركهم صارت معهم ضدي .
جلست على هالحال فترة طويله يمكن سنتين او اكثر ووصلت لحالة نفسيه مره صعبه وأمي بدت تتقرب مني يوم حست بحالتي وأنا قررت أغير من حياتي للأفضل وكان بداية هذا اني اروح لدكتور ه نفسيه والحمدلله قدرت اروح وحكيت للدكتورة كل شيء صار لي في الحياة وساعدتني اني اتجاوز شيء من اللي أنا مريت فيه وصار وضعي أفضل وبعدها قدرت اني اتوظف والحمدلله تحسن وضعي .
وصارت علاقتي بأمي ممتازة وانا حرصت على الشيء هذا لأني قلت الوالدين هم اهم شيء في الحياة لذلك حرصت على علاقتي بأمي وابوي , وحرصت على علاقتي بأخواني لكنها في الحقيقه لم تنجح لأن خواتي حاولوا يفتنون بيني وبين اخواني ونجحوا في الشيء هذا على اني حاولت اني ماخليهم يوصلون للي يبغونه بس تعبت وماقدرت على هالشيء وصارت بوادر طيبه بالنسبه لعيالي وصرت اشوفهم واحاول اتواصل معهم عن طريق التليفون .
بالرغم من كل شيء صدر من خواتي , الا اني ماكنت جازمه انهم زمان يعاملوني كويس عشان لهم مصلحة معي كنت اقول يمكن أنا فارضه نفسي عليهم وهم مايبغون يردوني وهم بعد كانوا صغار , لكن الحين بعد ماكبروا وصاروا حريم لازالوا يعاملوني أسوأ معاملة لدرجة اني ماأمر من جنبهم الا ويبحلقون فيني بس يوم شموا معي ريحة مصلحة تغيرت معاملتهم لي وهذا لأني تعرفت على بنت معاي في الدوام وكان عندها واسطه وحاولت تتوسط لي في وظيفة حكومية , وطبعا وحده من خواتي لها سنين تشتغل في وظيفه قطاع خاص ويوم عرفت بالخبر سبحان الله تغير كل شيء حتى نظراتها لي صار فيها اخوه ومحبه ونست كل شيء صار بينا طول هالسنين نست الشتايم والكلام الوصخ اللي قالته لي نست كل شيء عشان بس عرفت ان عندي واسطه ويوم فكرت اني موضوعي فشل رجعت مثل أول وهذا الشيء خلاني أحزن على نفسي يعني هم ماكانو يحبوني عشان شخصي وعشاني اختهم هم مايجذبهم لي الا المصلحة وبس .
وغير كذا بيعاملوني ابشع معاملة حتى حريم اخواني على كثر مايسوون بخواتي وعلى كثر مايسمعونهم من كلام وعلى كثر مايجي منهم ويتكلمون فيهم عند الناس الا ان خواتي يضحكون في وجيهم ويحترمونهم ومايقولون لهم ولا كلمه وأنا اختهم اللي ياماوقفت معهم وياما سويت لهم وياماتفضلت عليهم والفضل لله مب لي الا انهم مايَعدون لي رمشة عين ويمارسون علي كل أنواع الضغط سواء بالكلام ولا بالافعال او بتحريض اخواني علي عشاني بس عايشه معهم واتنفس واكل واشرب وعايشه حياتي .أنا مع الوقت اكتشفت انهم اصلا سواء هم أو اختي الكبيرة كانوا يغارون مني وحاسديني لأني عايشه عند زوجي حياة افضل من الحياة اللي هم عايشينها بكثيرولأني انا الوحيدة بينهم اللي تزوجت رجال يحبني وكنت انا اختياره وهم مافي احد من الجماعه او من الناس اللي نعرفهم فكر فيهم وهم كانوا يتمنون انهم يتزوجون من العائله اللي أنا اخذت منها وكانوا يتمنون ان اخوان زوجي يخطبونهم لكنهم مافكروا فيهم ولاطروا على بالهم وهذا الشيء انا اكتشفته مع الوقت وبعد فوات الاوان بعد ماخسرت زوجي وضيعت حياتي عشان كذا خواتي اول ماتطلقت على طول تخلوا عني وتشمتوا فيني
أنا نفسي طابت منهم وماعاد لي خاطر فيهم أبداً وماعادوا يعنون لي شيء ولايمر على بالي اني في يوم راح ترجع علاقتي فيهم إلا يمكن من ناحية السلام اللي هو لله , وقلت لأمي اني مستعده انه يكون بينا سلام اذا هم يبغون عشان الله أولا وعشان أمي ثانيا اللي تعبانه من هالموضوع وعشان احط حد لهذي المشاكل وعلى حد كلام أمي انها مابلغتهم بالشيء هذا ومادري وش السبب .
لكن وصيتي لعيالي اذا كبروا واللي بسأل عنها شيخ انهم مايصير بينهم وبين خالاتهم غير السلام واذا هم يبون رضاي سواء كنت حيه أو ميتة انهم مايبرون بخالاتهم ولاينفعونهم بأي شيء مهما كانت حاجة خالاتهم لهم ومهما كانوا قادرين انهم يساعدونهم
هذه هي قصتي وعذرا للإطاله
وأتمنى اشوف ردودكم
.
.
ام شهد وفهد @am_shhd_ofhd
عضوة جديدة
هذا الموضوع مغلق.
يا اختي الله يفرجك هم ويعوضك خير
أرقي نفسك مو تقولي خواتك يحسدونك على زوجك أرقي نفسك يارب تزين أمورك وترجعي لزوجك
كلامي مو هم حسدوك العين حق أرقي نفسك وعليك بالاستغفار وصلاة الليل
أرقي نفسك مو تقولي خواتك يحسدونك على زوجك أرقي نفسك يارب تزين أمورك وترجعي لزوجك
كلامي مو هم حسدوك العين حق أرقي نفسك وعليك بالاستغفار وصلاة الليل
الصفحة الأخيرة
ان شاء الله ماشوف كدا بحياتي
ياختي خليك احسن منهم رغم انه شئ صعب
وحرقوا قلبك والله يعوضك خير عن كل اللي شفتيه احتسبي الاجر عند الله