هل المحبه والنفور من الله؟ولا تحصيل حاصل

يعني لما اخوك ولااختك يحطون صورة عرض بالواتس لعيال اختك الثانيه وعيالك لا
هل هالمحبه من الله ولا مثلا عاجبينهم اكثر ولا ايش
لما اخوك يهدي اختك ولا العكس وانتي ولا احد يتذكرك لو باي شي رغم تكرر نفس المناسبه !
لما اختك ترافق بالمستشفى مع اختك الثانيه وانتي محد حتى زارك لما كنتي بالمستشفى الا مرة وحدة عشردقايق لرفع العتب بس
هل هذا الشي محبه من الله تنوزع على عباده ولا اسباب ثانيه؟

لما عماة عيالك يحطون مباركات لعيال اخوهم الثاني ومدح وعيالك محد يتذكرهم هل هذا محبه من الله ولا كيد وقهر


لما خالتك ولما عمتك تكلم خواتك تعزمهم وانتي محد يكلمك بس يوصون امك ولاخواتك قولولها تجي
هل هذا محبه من الله وزعها على عباده وانتي محرومه منها

لما يصير تسجيل بدورات ولا معاهد وتتفاجائين محد بلغك وتسالين ليه
يكون الجواب الاكثر الما في العالم (يوو والله ولاجيتي في بالي)
يعني نسيا منسيا وانتي بينهم حيا

وش يكون اسمه؟!؟!
لما ابوك يلاعب عيال خواتك واخوانك وعيالك مايشوفهم خالص
لما يتذكر الكل بحلويات وايس كريم وعيالك لا وتتفاجأين من ردة فعله لما يقول حطوها بالثلاجه لحد مايروحون!!يعني انا وعيالي
لما امك تبوس وتضم بعيال اخوانك وخواتك وعيالك لا ولا
وش يكون اسمه هذا

لما يتواعدون يطلعون مكان وانتي محد يبلغك وش يكون هذا

قلت اكيد البلا فيني لان مو معقوله كل الناس غلط وانا صح
تجرأت وسألت كذا وحدة بكذا موقف
بتلميح مرات وبتصريح مرات ثانيه
وش سبب تجاهلكم لي!
وش سبب نفوركم مني!
وش سبب عدم زيارتكم لي!
*ليش ماعزمتوني
*هل اذيتكم بشي بقصد اوبدون قصد
وش سبب وش سبب وش سبب؟!!!
تكون الاجابه
*والله مانتبهت
*والله موقصدي
*والله ماجا في بالي
*يتهيألك
*وغيره من الاجابات اللي تزيد حيرتك



يعني وش سبب نفور هالعالم مني ومن زوجي وعيالي

ابيع نص عمري واعرف السبب