هل تصارحين عريس المستقبل بأنك ...؟

بسم الله الرحمن الرحيم

أول شي .. السلام عليكم و رحمة الله و بركاته

ثاني شي .. احب أعبر عن اعجابي الشديد بالمنتدى الرائع مممممممممم لا لا
بل أكثر من ررررررائع و الأروع فيه بنات المنتدى المتعاونات و الخلوقات و مو بس كده
كمان قلوبهم على بعض :33: .... تبغوا تتأكدوا افتحوا أي موضوع و شوفوا التفاعل
و المشاعر الصادقة و النصائح و أحلى شيييييي الدعاوي الحلوة

عسى ربي ما يغير علينا

قولوا آمين


.
.

ايوه كمان نقطة تانية و لا تالتة و لا رابعة يالا عاااد عدي و أغلطي في المزايا
ما شاء الله اللهم لا حسد
ايش كنت ابغ أقول ...
البنات عصبوا :30: عاااااااا و بعدين معاكي انتي مكاوية و لا مكلمنجية ..
قولي اللي تبغيه و خلصينا ترى ماحنا فاضين للهرج الكتير

طيب طيب صبركم بالله ... كنت ابغ اقول كمان انو ما شاء الله كتير من البنات هنا يتكلموا
عن دراية كاملة بالموضوع و هذا يدل على ثقافتهم و إطلاعهم

طيب يا ستي .. تشكري بس توهتينا طولتيها و هيا قصيرة احنا عارفين هادي الأشياء من زمان
ايش دخل كل اللي قلتيه في عنوان الموضوع هاااااااااااه


يوووووه معليش يا بنات سامحوني بس من كثر ماني متحمسة نسيت الموضوع اللي دخلت
عشانه


يالله استعنا على الشقا بالله
وحدوا الله ... لا إله إلا الله ... و لا يحلى الكلام إلا بذكر النبي ... عليه الصلاة و السلام..

البنات... إييييييييش هادا يا بنتي إنتي راح تحكينا حكاية و لا راح تسألي ...
عضوة من العضوات المخضرمات: بنات ياللا خلينا نخرج من الموضوع ترى راسي صدع ..
مين تخرج معايا
أنا ... أنا
أنا أنا أنا
.
.
لا خلاص أتوب أتوب و الله راح أدخل في الموضوع

المهم أنا عندي سؤال محيرني و شاغل بالي من فترة
و هو هل تصارح الفتاة الخطيب المتقدم لها بأنها مصابة بتكيس المبايض؟؟
أنا في رأيي المتواضع إنو المصارحة ضرورية
يمكن فيه بنات اتزوجوا و اكتشفوا هذا الشي بعد الزواج
لكن أنا عارفة هذا الشي من زمان فأظن إنو ضروري المصارحة صح و لا لأ
و طبعاً انا اتوقع انو أول أهل الخطيب أو الخاطب نفسه ما يعرف هذا الشي عن البنت راح يحط ثوبه في أسنانه و يقول يا فكييييييييييييك. :23:


عموماً مو هذا الشي اللي يهمني
المهم بالنسبة ليا ما يلي:
ياللا كل وحدة تجهز ورقة و قلم و تستعد لقائمة الأسئلة الطويلة
أصحاب الخبرات يتقدمون و أصحاب المعلومات يساهمون و اللي ما هم من دول و لا دول
يمتنعون خخخخخخخخ لا تزعلوا قصدي يمتنعون عن الاجابة و ليس عن القراءة عشان
تعم الفائدة على الجميع ... شايفين كيف أنا حبوبة.. لوووووووول

قائمة الأسئلة الجهنمية:30:
تقولوا اختبار الله يعينكم ترى النجاح من 100 خخخخخخ:30:

س1) ما الضرر المترتب على الفتاة من عدم معالجة تكيس المبايض؟انا اعرف انو اللي تبغ تجيب نونو لازم تعالجه لكن وحدة زي حالاتي ليش تعالجه؟؟
رغم اني اتعالج منه من فترة يعني تقريباً من سنتين .. بس بدون نتيجة.

س2) هل عانيتي من تساقط الشعر عند إصابتك بتكيس المبايض؟؟هذا السؤال هو أهم سؤال عندي لأني أعاني منه كثير و أجمع أطباء الجلدية
على عدم وجود مشكلة لدي و لمن سألت دكتورة النساء قالت احتمال من التكيس
بنات ... انا قبل ما يتساقط شعري .. كان زمان ما شاء الله قمة طول و كثافة و لمعان
و ما كنت مهتمة بموضوع الدورة الملخبطة من يوم أنا عمري 13 سنة
طبعاً دحين النفسية عدم و أحاول أعالج التكيس بأي طريقة لعل و عسى انو يرجع شعري
زي ما كان. ربنا قادر على كل شي.

س3) كم كانت تغيب عنك الدورة (اللي عندها تكيس)؟؟
بالنسبة لي على كيفها مرة 3 شهور مرة 4 مرة 6 شي يفجع صح:07:


س4) بالنسبة للبنوتات كيف كان العلاج؟؟أنا طفشوني بحبوب منع الحمل .. رغم اني كنت معترضة لأني ما اتزوجت
لكن ما باليد حيلة أوامر الدكتورة.
المشكلة انو الدورة تنزل مع انتهاء الكورس ... لكن بس اوقف الكورس ما عاد تنزل

يعني تيتي تيتي زي ما رحتي زي ما جيتي
أو على قولة القائل كأنك يا ابو زيت ما غزيت

وااااااااااااااااااء يعني بس تلعب في هرموناتي بالحبوب اللي ما تتسمى على الفاضي.

لا و كمان في النهاية و الأخير تقول لي اني ليش قلقانة خليها جات جات ما جات ما جات
بالله ايش رايكم في كلامها؟؟



بنات ساااااااااااااااامحوني
عارفة إني طولت
** انتي مو طولتي انتي انهبلتي في نافوخك .. أحد يتكتب موضوع عشرمية صفحة

وااااااااااااااء
طيب ايش اسوي قلت انزل كل اللي محيرني في الموضوع عشان ارتاح

** يعني عشان ترتاحي تصدعينا .. يا شيخة روحي منك لله

خلاص السموحة يا الطيبين و ما عاد أعيدها

و جزاكم الله خير مقدماً على الوقت اللي ضيعتوه عشاني
و جزاكم الله خير أكثر على إجاباتكم اللي اتمنى إنها تريحني عسى ربي يريح بالكم دنيا و آخرة.
:13: