هوشه زوجه اخوي يوم العيد ياهي قومه القيامه ببيتنا وراحت وماعاد رجعت 😓💔

مرحبا صبايا كل عام وانتم بخير بعد الزحمه
باقولكم سالفه صارت يوم العيد وباترك لكل وحده تقرا موضوعي رايها
بيام خطبه بنت عمي اللي هي اللحين زوجه اخوي جت عمتي وقالت ترى بنت اخوي ذي راعيه مشاكل وانتم بكيفكم عاد حنا مانعرف عنها كثير بس اغلب اللي سالناهم يمدحونها ويمدحون اخلاقها وتوكلنا على الله وتزوجها اخوي بالبدايه صرنا نعاملها برسميه وبصراحه وجهها مايساعد على انا نعاملها برسميه مبتسمه بشوشه وتاخذ وتعطي بالسوالف محترمه ماتتدخل بخصوصياتنا وبعد سنه صرنا نعاملها عادي ومثل اختنا مرت ثلاث سنوات والبنت طيبه مرره ماشفنا منها الا كل خير عكس كلام عمتي
اعجبتنا انها ماتنزل اذ جينا عند امي لين نعزمها ونلزم عليها عندها كرامه بزياده تقول انا ماحب اثقل على احد واذ صارت امي ماعندها احد يوميا تنزل مع قهوتها
واذ اعزمت امي جاراتها تسوي السفره لها كامله من والى
المهم امي تعبت مره من المرات راحت هي رافقت لها اسبوع كامل بالمستشفى وتركت ولدها عند اهلها وامي خلاص طيرتها فوق تقول كانها بنت لي بالمستشفى من قلب تخدم امي وصارت البنت بعيونا ملاك
بالعيد جت عمتي اللي حذرتنا منها كان عندنا غداء المهم عمتي ذي ماعندها اسلوب من زمان ومتعودين عليها قالت فلانه تقصد مره اخوي قالت ابوك بيضحي بكره قالت لا ثالث عيد ان شاء الله قالت اييييييييه ابوك بخيل يحتري ترخص الاضاحي عشان يضحي طبعه مايخليه من يومه وتقوم القيامه على هالكلمه وتغسل شراعها وتهزئها وانتي فيك ومافيك وانتي انشغلي بنفسك مالك شغل بابوي واذ على البخل ترى زوجك بعض السنوات مايضحي ولاعاد تجيبين سيره ابوي على السانك ولا بتسمعين كلام مايرضيك
صارت هوشه قوووويه يالله هدينا الوضع وهي اصلا اخذت ولدها وراحت بيتها وقتها الحمدلله ماكان احد موجود غيرناولا كان صارت سوالف
ويوم جاء الليل وداها اخوي لعيد اهلها وسكت ماعلق على الموضوع بس يوم عرف ابوي زعل وقال هالكلام ليه يصير ببيتي واخوي ارسل لها اعتذري من عمتي انتي زودتيها ومن هالكلام وعيب عليك تراها عمتك بالنهايه كلام طويل
كتبت له بالحرف الواحد لو على طلاقي ماراح اعتذر
واخوي خلاها عند اهلها للحين وهي ولا جابت خبره وامي عاد زعلانه مرره على اخوي تقول هذي بنتي ومارضى عليها
بصراحه حنا مصدومين من رده فعلها وشلون صار اسلوبها كذا بين يوم وليله ماندري كيف نتعامل مع الناس اللي كذا وليه صارت كذا بين يوم وليله