ماشاء الله تبارك الله يا ام قيس

يسلم هالذوق ياام قيس والله يخليلك فراشاتك الحلوين ويبلغك فيهم ولمساتك مميزه وناعمه
الله يعطيني بنت واسوي لها غرفه حلوه زي بناتك

اختي ام قيس الله يجعلة بيت عامر ومبارك بيكم
والان نجي للآسئلة :
1- بالنسبة للصبغ المجلس وباقي البيت المتر بكم واذا ممكن تدليني على مكان الصباغ .
2- بالنسبة للجبس ايضا مكان ورقم الجباس والمتر بكم .
3- نظام الموسيقى من وين شريتيه لانه من زمان نفسي في كذا .
والأهم وين ساكنة لاني بطب عليك للعلم انا ايضا ام رغد ونفس مواليدك
وفي انتظار الباقي

ما شاء الله اختي ام قيس بيتك روعة الله يهنيكم اياه ويخليلكم بناتكم.
بغيت اسألك وين المحل اللي في الخوض اللي سوى الجبس ؟
وايش اسم المقاول ؟لانه عجبني بنائهم مرتب وحلو .
وكيف لما تختاري الديكور تراويهم صور ولاكيف؟
اسفة على الاسئلة بس عجبني البيت وعندي افكار ناوية احطها في بيت المستقبل. :)

حبيباتي غلا الروح ونكوشه اشكركم وانا وايد فرحانه بيكم وانتوا من احسن المتابعين

حبيبتي الهدى
1.الصبغ امتاره اسعارها مختلفة شي 1.5 ريال وفيه 3 ريال والرسم اللي بالمجلس حسابه غير مو بالامتار يعني حسب الشغل وتقييم الرسام على فكرة شغله حلو ومرتب وموغالى ترى هذه احسن الاسعار اللي حصلناها وبيتنا كله عمله لنا تقريبا 1500 ريال عماني طبعا هذا مع صبغ الديكور مو الحائط بس
2.الجبس لكل شي سعرة يعني الجبسمبورد متره 7 ريال والديكور العادي 1.5 والخط الناعم اللي في السقف ( البتي ) 5. ريال والزوايا اللي بنهاياته الوحدة 5. ريال دوائر المراوح الوحدة 5 ريالات والليتات الوحده 4 ريالات لانها اصغر بس الاقواس والفتحات اللي بالجدار سعرها مو بالمتر حسب تقيمه هوه وكامل البيت عمله 1400 ريال تقريبا
3. الموسيقى عملناها مع شركة يديرها احد الشبان العمانيين المكافحين اللي بنوها خطوه خطوه
4. الارقام برسلها لك على الخاص لانه اعتقد ممنوع تبادل الارقام وانا من سكان الحيل الجنوبيه بمسقط وبرسل لك عنواني على الخاص وياحيابك في اي وقت ان ما شالتك الارض تشيلك عيونا وعلى فكرة مصادفة حلوه

حبيبتي دعاهاالحق : المقاول ما شاء الله عليه ما عليه كلام بس مشكلته مع الكهربائي اللي يتعامل معه شغله مومرتب وايد بس صراحه تعاملهم حلو وشغلهم احلى
وبالنسبه للديكور هو معه كتالوجات وبالنسبه لي فضلت اراويه الصور اللي عندي لانه ديكورنا بغيته متميز وطبعا بعد الاتفاق بيخليك تختاري نماذج النقش اللي تبيها
والارقام برسلها على الخاص لما يرجع زوجي لانها موموجوده معي الحين

وملاحظه:
قبل الخريطه لفوا على البيوت اللي توها تنبني بتستفيدوا وايد منها ومن افكارها موشرط تاخذوا الفكرة بحذافيرها بس ممكن تلهمكم بفكره احلى وما شاء الله فيه بيوت روعه