والله ترددت كثير وفكرت كثير وشاورت كثير وعجزت اقرر

السلام عليكم ورحمة الله وبركاته
أخواتي العزيزات كثير كنتو لي عون الحمدالله وكثير أستفدت من نصائحكم وماعمري ندمت ابدا وماخاب من أستشار
لكن هذا الموضوع فعلا عجزت أقرر عجزت الاقي حل
متردده جدا
من جهه اللي تبيها بتدفع مبلغ ما أحلم فيه
ومن جهه أخاف اتحسف
انا عندي عامله لها تقريبا٦ أشهر
ماشفت منها شر الحمدالله مثل كل العاملات اللي اول مره يعملون تعبت في تدريبها التنظيف وغسيل وكي الملابس والحمدالله اتقنت هذا الشي بعد تعب وجهد طبعا طبخ ميح حتى أشياء بسيطه نفس تقطيع ما اخليها تلمس شي وبرضو اطفال ابدا ابدا مالها دخل فيهم وبرغبه مني طبعا
سافرت اسبوع خليتها عند قريبتي الله يجزاها خير
ورجعتها يوم رجعت من سفرتي والحمدالله رجعت بيتي وروتيني
اللي حصل جتني اختي ٣ أيام جلست عندي زوجها مسافر
شافت نظامي ونظام بيتي
دخلتها براسي بنت أمي وأبوي ههههههه
قالت يا جمانه ما اشوف له داعي الخدامه ابدا في بيتك
زوجك دوامين مايجلس بالبيت
الغدا ماتسوين غداء عشان زوجك بدوامه العشاء أساسي لكن خفايف شكشوكة ولا مسقعه ولا بيشاميل او من برى أحيانا
غير كذا مقفله على الغساله والنشافه الحرارية في حمام بالسطح وخليت للخدامه غساله عاديه ام حوضين لانها كم مره تعدم التوماتيك وتخربها ونصلحها بسببها
بيت ٣ أدوار الدور الثالث غرفه للغساله والنشافه ومخزن وغرفة خادمة مع حمامها الدور الثاني غرف نوم
الادور الارضي صاله غرفة معيشه مجلسين
قالت اختي قسمي شغلك ولا بالساعات اوفرلك وهذي سوي تنازل عليها وأستفيدي من الفلوس
مادري أخواتي رايكم تكفون والله لي تقريبا٤ أيام افكر بكلام اختي استخرت وماحسيت بشي شاورت زوجي قال بكيفك التعب عليك انتي مالي دخل
اطفالي بس٣
١٠ سنوات
٩ سنوات
٤ سنوات
والله متردده مره عجزت اقرر
خصوصا قريبتي اللي حطيتها عندها يوم أسافر قالت اذا قررتي تنازلين عنها انا ابيها بسعر تقديمها
والله محتاره جدا جدا عجزت اقرر
حتى قلت القريبتي خذيها أسبوع بشوف انا أجزم قالت لا تكفين يا تتنازلين عنها بقناعه تامه وبدون رجعه يا الله يهنيك فيها اما كل شوي لك رأي ومتردده لا والله مالي عازه فيها
انا شايله هم البيت متعب لانه كبير لكن لو بقسم الشغل بتمشي الأمور خصوصا الطبخ انا مو مره زوجي مرتبط بدوامه ومايجلس بالبيت كثير دايم برى
اما الاطفال اكلهم دايم ماياخذ مني وقت يا رز وملوخيه ولا مكرونه اشياء سريعه
والله مدري محتاره ابي اقرر
طبعا كنت قبل هذي العاملة مستغنيه جدا عن العاملات وماعمري احتجتهم الحمدالله وبيتي مثل الورده لكن كنت بشقه الأن اضطريت بسبب كبر حجم البيت
طبعا انت غير موظفه الله يرزقنا وإياكم الوظيفه العزايم تكاد تكون معدومه تجيني اميمتي ام زوجي فقط بين فتره وفتره ههههه
كل وحده تعطيني نصيحتها الله يسعدكن سعاده مابعدها سعاده وينولكن اللي في بالكن يارب