والله تعبت ... ساعدوني بنات

السلام عليكم ورحمة الله وبركاته بنات
أعاني كثير من موضوع أتمنى تتفاعلو معاي وتصبرو علي


من ثلاث أشهر تقريبا جاني خبر وفاة جارتنا وغير حياتي كلها - ربي يرحمها ويغفرلها - هي مو كثير قريبه مني بس مدري ليش انصدمت بخبر وفاتها كثير وجاني نفس الصاعقه على قلبي ،، أصابتني حالة خوف فضيعة مع دقات قلب سرررريعه مره وخفقان لدرجة حسيت اني رح أموت وراها وأتبعها


والله ما ادري كيف أتصرف أو كيف خرج من هالشي اللي صار لي فجأة ، بديت أقرأ على روحي وأدعي الله يخفف علي لين ما شوي هديت ... بس من ذاك اليوم وأنا حياتي انقلبت كلها وصار فيني خوف شديد وخفقان قوي وثقل على القلب والصدر ودقات قلب سريعه وهالشي يصيرلي طول الوقت سواء بالدوام أو بالبيت صبح أو مسا
وبدأ مسلسل المستشفيات اللي ما رضى ينتهي لين يومكم هذا من ثلاث شهور لليوم
عملت فحوصات شاملة للقلب والصدر وتلفزيون للبطن وتخطيط قلب أكثر من 5 مرات ومنظار للمعدة وأشعه شاملة للجسم والتنفس وفيتامين د والغدة وكل شي كان سليم ولله الحمد


بس نقص بسيط ف فيتامين د ومستمره في العلاج وغازات ف عروق القلب وكورس العلاج أو الأدوية خلصو وما زالت الاعراض مستمره
شكيت أن الموضوع يكون فيه عين أو حسد
أرقي نفسي دائما ورحت عند كذا شخص ثقه يرقيني وأخذت ماي مقري عليه وعملت خلطة السدر والملح واستمريت عليها 4 مرات بشكل متواصل


ولا زالت الأعراض موجودة سواء النفسية منها مثل الخوف والقلق والتوتر مع الاعراض الجسدية ومنها خفقان في القلب ونغزات في الصدر بالجانب اليمين واليسار ومثل الغصة القوية ف الصدر و حرقة شديدة ف الفؤاد


وحرقة الفؤاد هذي بروحها سالفة وهذي أخطرها عندي
والله يا بنات تعبت كثير من حرقة الفؤاد اللي ما عرفت لها سبب ولا لقيت لها علاج لفيت عمان كلها عشان ألقى علاج والكل يقول سببها حموضه مع اني متأكدة انها مو حموضه لاني جربت الحموضه بس هذي شي ثاني غريب ومختلف
يجيني بكل وقت حتى لو مو ماكله شي فيه بهارات وسبايسي وسبق واخذت ادوية عن الحموضة بس ما تغير شي


حرقه وسخونة غريبه متعبه أحس فيها انها القاضية خلاص
تعبت منها
لما تجيني يصير لا حول لي ولا قوة الا بالله
ما اعرف اتصرف معاها او كيف اسوي بذاك الوقت


مع حسره ف الصدر قوية
أحس بدنو اجلي


حتى لما اطلع أي مكان احس الحياه ما صار لها طعم مثل اول




بديت اعالج نفسي نفسيا قلت يمكن السبب نفسي
استمريت على رياضة المشي وتمارين الاسترخاء والحمد لله خف موضوع الخوف والقلق عندي كثير بس بقى اني لما اسمع بخبر وفاة احد اعرفه أخاف كثير وتجيني النوبه




أكثر وقت احس بهالاعراض لما اصحى من النوم خصوصا نومة الظهر او العصر بحكم اني ارجع البيت متأخر ع الساعه 3 مسا
حتى اني هجرت النوم مع اني من محبينه بس ويش اسوي




مشكلتي اللي اريد اتخلص منها الحين ألم وحرارة الفؤاد القوية اللي ما لقيت لها علاج
غير عن هذا الاحاسيس اللي تجيني فجأة باني بموت او الغصة اللي تجي ف قلبي واحس اني خلاص مفارقة الدنيا


بنات والله تعبت


نسيت اخبركم اني رحت عند حرمه تمرخني قلت يمكن السبب الاعصاب ف لمست منطقة السره ولقت فيها عرض ينبض قالت لي ان مشكلتك هنا
هالعرق أحيانا يزيح عن مكانه ويسبب الاعراض اللي تصيرلي من خوف وتوتر ونغزات وضيق نفس
ويصير كذا بسبب صدمة أحيان


حاولت تعالجني وتمسح العرق عشان يرجع مكانه ويوقف نبض بس لسه فيه نبض احس
مستمره على قراءة وسماع البقرة والرقية دايما


بنات اسفه على الاطاله
ساعدوني ويش اسوي لاني بحاله ما يعلم فيها الا الله خصوصا من حرارة الفؤاد الغريبة اذا عندكم ادوية لها خبروني


ربي ما يوريكم الا كل خير وسعاده