(( وحشتموني مووووت أقلطوا نسولف شوي))

السلام عليكم ..



لقد عـــدنا..>> بشري جدتك :o

المووووووووووهم كيف المصرقعات كلهم وعساهم بخير وماهنا خلاف

وكيف إجازتكم وكيف عودتكم وكيف أهلكم وربعكم وعسى ماهنا أحد أنقرض (فال الله ولا فالك يالبومه) ..:32:


أولاً : واااااااااااااااحشني هالقسسسسسسم موووووت واحشتني الصرقعه أكثر وأكثر..

وثانيا كل عام وأنتم بخير ومن العايدين وسنة حلوة ياقميلات.. مب القمل العايدي (جميلات) جايبتها بدلع مالت على شوشتن مهب فيني (يهين)


ثالثاً / ولاااا ماهنا ثالثاً هنا موضوع راح وقته لكن ماودي أخلي هالصفحه سلام وعناق (مصدقة نفسي) كخخخ نخش في الموضوع أحسن هوبلااااااااااا:


مره من المراير كنت جالسة أطقطق فيها أصابع رجيلات وميمتي الله يحفظها ...<<< أمي تعتبر هالشغلة مساج مب طبيعي وتقدر صاحبة هالوظيفه إذا ماقامت تستلكع بأداء هالوظيفة..

مالكم وطول الشرح الزبده ..


إني قمت أتميلح عند أمي يمه وش رأيك في الإجازة أيها أحلى هالوقت ولا من أول أحلى وش كنتم تسوون في إجازات منذو مبطي ..أكيد كنتم تقضونها برى المملكة ياوميمتي >> يهين برى المملكة أصلا هم معرفوا البلدان المجاورة إلا يوم طلع التلفزيون كخخ أستغفر الله وأتوب إليه بس من الشماتة ..:23:

المهم إني أدوخت رأس أوميمتي في ذاك الوقت تقولون أسوي معها مقابلة في التلفزيون على شاكلة وش رأيك بسياحة الداخلية ولا الخارجية وأيها تشجعين وهي الله يحفظها وتقول ماأعرف غير تشجيع النصر والهلال (الناس وين وحوارنا وين ) أمي الله يحفظها عساها تعرف المحافظات اللي عندنا وبس يحليلها أمي وش حلات الجلسة معها ..

ندخل لصلب الموضوع ..

وهو طلبي لوميمتي أني أسافر مع أخوي وحرمته لأبها وتراهم يا يمه مب مؤيدين السفر للخارج ويكرهون اللي يسعسعون للخارج >>> والله لو يحصلك كان حطيتي رجلك للخارج ..
تدررون أن هالرحلة عاد مب مصادق عليها إلابعد التلزق وتحبيب الخشوم والرأس ..

المهم أمي أمعصية تروحين معهم ماتستحين على وجهك الرجال يبي ينبسط مع زوجته وعيالة وأنتي ناشبتن بحلوقهم متى تعقلين وتعرفين أن ذبة الوجه مب زينه وأنا أمك (أنا وبكل بلادة حس عادي يايمة أنا متعودة على المذله وذبة الوجه من يوم عرفت أن مابه أمل أنكم تسافرون إلا في الشديد القوي وحدكم الولاية (كخخخ تراها ديرة جداني وهي مشفره اللي يبي يعرفها يدفع رسوم ) :oمن زينك انتي وولايتك الحين تدرون عاد أن حتى هالسفريه أنقطعت رجل أمي منها من يوم ما مات جدي وخالي ..
قالها أبوي وشو له تروحين وماعندك أهل هناك(صعيبه حالة اللي ماعنده أهل) كخخخ أبوي يقولها أنثبروا برياض ولاتحطين أنتي وعيالك في بالك أنه تمر إجازات عشان ماتولع قلوبكم من القهر >>> ناس متبرمجه خلقه لكن صبر جميل أنا الحمدلله مؤقتاً ناشبة في إخواني إلى أن يجي فارس احلامي (أمحق أحلام تجي من وراك) المهم أما أنا نسفح انا وياه ونلف هالعالم ولا نمشي على سياسة الوالد الله يحفظه وهذا الأحتمال الأقرب والعلم عند الله..


مب كأني دخلتكم في أموري العائلية البحتة:32: >>>الله يخلف عليك إلا قولي انقطعت القربة كلها ...
آها عاد أها ياويلكم أن طلع علم لغير بنات حواء >>>> مسويه فيها أن العدد قليل لكن الشكوى لله دائما ثقتي بغيري كبيرة واللي بقلبي علىلساني على طول >>>>> يهييييييييييييييييين...


وش كنت ابي أقولكم بضبط والله مدري لكن أشك وأطرز أنها كانت تتمحور عن قضاء آخر أسبوعين في العطلة >>>> ومسميتها إجازة ورحلة ليييييييه :oوناشبة لخلق الله ليه ومسويه زحمه ليه ماودكم إني أصفق نفسي كود إني أعقل شوي ..


لكن مب مشكله بكمل السالفة الله لايعوقني بشر >>>>>> كخخخ راعية طواله بسم الله علي ..

المهم أن أمي تبي تقنعني أني أنثبر واخلي أخوي يروح لم حرمته وعياله ويسافر معهم في جو عائلي وأنا ناشبتن فيهم أروح يعني أروح ..

وأمي تقول لي ترى بنروح عنك للإستراحه مسويه فيها بتصرعني بها المفاجأه تدرون عاد هالإستراحه حقت شباب عائلتنا متقاطين فيها وأهلي ناشبين في هالشباب أنهم ينقلعون منها نص يوم عشان نقضي إجازتنا فيها >>> وأنا أقول مالت عليها من إستراحه كلها نخلتين وبعوامل التعرية صارت أغرب نخلتين أشوفها بحياتي ولا غرفها كلها ريحة شباب معفنين ولا مسبحها صاير أصفر وحالته مشكاها لرب العباد والله أن المسبح البلستيكي أكشخ منه وماودي أقولكم عن الزرع اللي مسوين فيها أنه ملعب كرة قدم لون الزرع صاير أصفر وليته دار على مدار هالزرع في هالملعب إلا بقعه فيها زرع وبقعة متآكلة بشكل فضيع المهم أن هالإستراحه تلوع الكبد ولا جات في بالي .. أجل أعيف أبها عشان هالأستراحه المعفنه إلا تبطووووووون عظم ..

الزبده إني سافرت لأبها بعد جهد جهيد يااااااااااااهي شيء ياااااااهي طبيعة لدرجة إني ودي أن أحد سارقني من أهل أبها عشان أعيش فيها من جد ونااااااااااسه وعالم عايشه في جو مب صاحي مب مثلنا الشمس مسويه فينا الهوايل اللهم لاعتراض لكن جو أبها من جد غير,,

ومابي أقولكم وش حجم شنطتي لأنه مابقى من ثيابي الشتوية شيء ماوديته معي لأبها :oكخخخ (صح أن الجو فيها رايق بس مايحتاج أن نحشي شناطنا من ملبوسات الشتاء لكن وش علم الطعوس اللي على شاكلتي ) هع هع..


تصدقون عاد أني ودي أضف وجهي وأنهي هالموضوع البايخ لأن الإجازه أنتهت وأنا رجعت من أبها والحين أكتب لكم هالسطور وأنا في الرياض مشغلة المكيف بالعربي ماله داعي هالموضوع >>> توها تستوعب في النهاية كخخخ..:23:

عموما حبايب قلبي ترى وصلنا لنهاية طفوا الأنوار وسكروا الباب وراكم زين .

اما العنوان تسحيبة أحس إني ماعطيتكم مجال لسوالف عموما خذو راحتكم..

وحيااااااااااااااااااااااااكم دوووووووووووم مع:

دبليو دبليو دبليو.عشوقه فضاوه .كوووم وفي رواية (نت)