السلام عليكم ورحمة الله وبركاته:
دى أول مشاركة لى وبصراحة أنا مكسوفة ، لأنى باشارك وسط مجموعة من المحترفين. فياريت تعجبكم. وبخصوص الصور أنا آسفة لأن بنتى مسحت كل الصور من على الكاميرا قبل ما انزلهم على الكمبيوتر هأحاول اتصرف بأذن الله. أنا هبدأ بالسلطات واذا عجبتكم نكمل باقى الاصناف.
أولا: السلطات:-
1- سلطة الخرشوف أو الارض شوكى:
10 قلوب خرشوف مقطعة أرباع.
علبة ذرة صفراء مصفاة من الماء
فلفل ألوان قطع مكعبات كبيرة - مشروم طازج مقطع ارباع
جزر مبشور - ممكن اضافة بطاطس مسلوقة ومقطعة مكعبات.
الصلصة: وهى الصلصة اللى بستخدمها مع معظم السلطات
2 م ص زعتر ( من اللى بيستخدم للسندوتشات)
ملح - فلفل أسود
2/1 م ص مستردة - 2 م ك صويا صوص - 2 معلق كبيرة سويت آند سور صوص أو كاتشب
2 معلقة كبيرة عصير ليمون. زيت زيتون.
نخلط مكونات السلط مع بعض فى طبق تقديم. نخلط مكونات الصلصة فى برطمان ونرجها جيدا ونحطها على السلطة ونقلب كويس وتقدم فورا.
2- سلطة التونا والافوكادو:
2 علبة تونة مصفاة من الزيت
فجل أحمر مقطع شرائح رفيعة - ثمرة أفوكادو ناضجة ومقطعة مكعبات
- حبة كاملة من الخس الرومانى المفروم.
الصلصة:
ثلث كوب زيت زيتون - 3 م ك خل ابيض - 1 معلق كبيرة مستردة - ملح وفلفل أسود - م ص ريحان مجفف.
تخلط مكونات السلطة مع بعضها، وكذلك الصلصة ونضيفها للسلطة وتقدم.
3- سلطة الدجاج والسبانخ:
صدور دجاج - ربطتين أو ثلاث سبانخ طازجة - صنوبر محمص- حمص مسلوق ومصفى.
كينوا ( وهى عبارة عن نوع من الحبوب يسلق زى الرز تماما لكنها غنية بالحديد - والكالسيوم -الالياف - قليلة النشويات وغنية بالبروتين فهى أعلى أنواع الحبوب فى نسبة البروتين وهى بديل مناسب جدا يستخدمه النباتيون للاستعاضة به عن اللروتينات الحيوانية، للمقيمين فى الامارات ممكن تلاقوها عند سبينيس)
الكينوا منجم للعناصر الغذائية المفيدة ومناسبة جدا لدايت. ممكن لو ملقتيهاش تستخدمى كوسكوس أو برغل وان كانوا مش بنفس القيمة الغذائية.
الصلصة : مقدار من الصلصة اللى استخدمتها فى سلطة الخرشوف.
الطريقة:
- نقطع الدجاج مكعبات ونرشه بالملح والفلفل، ويشوح فى شوية زيت زيتون
- نغسل السبانخ ونجففها ونشيل العروق. ونحطها على البخار مدة دقيقة، يعنى بس تطرى مش تطبخ وبعد كدة نقطعها بايدينا بشكل عشوائى.
- نسلق الكينوا ونصفيها من الماء.
- نخلط كل المكونات مع بعضها ونضيف السلطة ونرش الصنوبر على الوجه.
4- سلطتى الخاصة(من وحى سيزر سلاد):
فلفل أحمر واصفر وأخضر وبرتقالى مقطع مكعبات كبيرة
خس رومانى مقطع باليد (علشان نحافظ على العصارة داخله)
ملفوف ( كرنب) صينى هو شكل الخس لكن ورقه أجمد وافتح
خيار مقطع مكعبات كبيرة
شراح زيتون أسود نوعية جيدة
شرائح ديك رومى مدخن ومقطع مكعبات كبيرة (ممكن مرتديلا دجاج أو لحم أو شرائح سلمون مدخن)
4 م ك كابر مصفى - 3 م ك جبنة بارميزان مبشورة
الصلصة:
3-4 م ك مايونيز - زيت زيتون - 1 م ك باربكيو صوص نوع قوى
3-4 م ك كاتشب - عصير ليمونة - 3 م ك صويا صوص - ملح - فلفل - 1 م ص توباسكو - زعتر
الطريقة:
نخلط مكونات الصلصة فى برطمان ويرج جيدا.
توضع مكونات السلطة فى طبق تقديم ويضاف لها الصلصة قبل التقديم مباشرة.
5- سلطة الفاصوليا الحمراء:
علبة فصوليا حمراء نغسلها ونصفيها
علبة ذرة نصفيها
فلفل ألوان مقطع مربعات صغيرة
مشورم طازج شرائح
جبنة شيدر مقطعة مكعبات
جبنة موتزريلا مبشورة
سلامى
بصل أخضر مقطع حلقات
توست مقطع مكعبات صغيرة ومحمص
جوز( عين جمل) مقطع قطع كبيرة
مقدار من الصلصة المستعملة فى سلطة الخرشوف
الطريقة نخلط جميع المقادير ما عدا التوست وعين الجمل، نضيف الصلصة ونقلب ثم نضيف التوست وعين الجمل.
6- سلطة معجنات الرافيولى:
1 باكيت رافيولى جاهز محشى جبنة ( الافضل لو انك بتعرفى تعمليها فى البيت طبعا لكن أنا مش باعرف)
3 كوب وردات بروكلى
2 جزرة مقطعة شرائح متوسطة
2 بصل أخضر مقطع شرائح
1 طماطم كبيرة مقطعة مكعبات
2/1 من صلصة الرانش (دريسنج جاهز فى الاسواق)Ranch salad dressing
ملح - فلفل
الطريقة:
- اسلقى الرافيولى بالطريقة العادية، قبل 3 دقايق من رفعه من على النار اضيفى له الجزر والبروكلى
بعد 3 دقايق شيليهم من على النار، حطى البروكلى والجزر فى ماء بارد مع ثلج لوقف الطبخ وبعد كدة صفيهم من الماء
- اغسلى الرافيولى بالماء وصفيه
اضيفيهم لبعض مرة تانية مع البصل الاخضر والصلصة مع التقليب بحذر، دخليهم الثلاجة لمدة ليلة كاملة مع تغطية السلطة ببلاستيك.
قبل التقديم اضيفى الطماطم ولو حسيتى أن السلطة ناشفة زودى 1:2 معلقة لبن وحركى ببطء.
7- سلطة الحمص مع الجبن الفيتا:1 كوب حمص مسلوق ومصفى
1كوب جبنة فيتا مقطعة مكعبات
1 كوب طماطم شيرى(طماطم الصغيرة)
Cherry Tomato
خل - ملح - فلفل - 1 م ك ريحان مجفف- عصير ليمون - زيت زيتون - 2/1 معلقة فلفل بابريكا
تخلط الصلصة ونضيفها للسلطة وتقدم مباشرة.