وضعي مع اهل زوجي

بنات ابستشيركم بشي
شيروا علي الله يسعدكم او انصحوني انا اشوفكم زي اخواتي واستفيد منكم
الموضوع ومافيه اني ساكنه عند اهل زوجي بغرفه وسكني مؤقت طبعا لان زوجي عنده دوره عسكريه ف مدينه ثانيه وانا مضطره اقعد عندهم عشان عيالي ، المهم جلست عندهم وشفتهم مايبوني متضايقين برغم اني شاده ع نفسي وعيالي وضاغطه نفسي بسبب لاازعجهم ومع هذا كله ضايقين مني ومحسسيني اني ثقيله
والله يابنات انظف غرفتي بالدقيقه والممرات اللي عندها والحمام تكرمون واعطر وابخر كل شوي واغسل الممرات والدرج من فتره لفتره حتى لو مو عيالي اللي محوسينها وعندي بغرفتي دافور وقهوه وشاهي واغراض بسيطه مااطلع عندهم الا نادر جدا يمكن ف الاسبوع مره مرتين احيانا ولا مره متحمله الجوع عشان مااضايقهم
ومع هذا ماشوفهم متقبليني او راضين
بقول لكم حركات قهرتني وعلموني هي تزعل او انا حساسه
لما جيت عمتي اعطتني مفتاح الغرفه وقالت امسكي عيالك عندك لايقعدون طالعين نازلين انا مااحب الازعاج .وتخيلوا انه انا ف غرفه بس حتى الحمام تكرمون مشترك وماعندي بهالغرفه تلفزيون ولا لاب توب لعيالي يسليهم ولا اي شي ولما اخليهم يطلعون لجدتهم وعماتهم شوي يغيرون جو يطردوهم ع طول او بالكثير يخلوهم نص ساعه ويقولون خلاص انزلوا ويقفلون باب الدرج عشان مايطلعون عيالي وانا انقهر مووت وش ذنب عيالي اطفال ينحبسون ف غرفه زي السجن طيب ليش مايتحملوهم فتره بسيطه وتعدي واللي يقهر اكثر ان ام زوجي وخواته قدام زوجي بوجه يعني ان حنا نحب عيالك ومستحيل يخاصموهم او يطردوهم ومن وراه بوجه هو يجي الويكند واذا سافر يقلبون ع عيالي المشكله بيت عمتي ام زوجي مليان اطفال ومايطردون الا عيالي وربي يابنات عيالي هادين مررره مررره لو قلت مزعجين باقول معهم حق بس هادين ،انا نفسي اعرف ليه هالمعامله
وزياده لما اطلب بروح المطبخ يصرفوني يقولون قدامك عيال مايصير تطلعين
انا ودي اطبخ معاهم واشتغل بدال م اجلس كذا للملل والطفش وبنفس الوقت ماابي اكون ثقيله اثقل عليهم هم يطبخون ويعطونا وبس
لكن مو متقبلين ابد
وزياده موقف صار قبل شوي قهرني ف بيت عمتي وحده من خوات زوجي متزوجه ومعها عيالها صغار واخت زوجي صغيره ف المتوسط وبنت اخو زوجي ف الابتدائي
ف لما جات بنتي اللي ف الابتدائي تطلع اسمع اخت زوجي اللي ف المتوسط وبنت اخوه ف الدرج يقولون لاتدخلين روحي لامك وقفلوا الباب بوجهها ونزلت تبكي ياعمري عليها تقول ليش يخلون بنت عمي الصغيره وانا لا انا طفشانه ابي العب معهم شوي انقهررت انقهرت يابنات ماتتخيلون مستحيل يسوونها ف وجود زوجي واللي يزعل اكثر انه البيت فيه اطفال اللي هم عيال اخت زوجي وعيال اخوه اش معنى يطردون عيالي بس ،لو قلت مايبون اطفال او يبون هدوء بقول ماعليه لكن البيت مليان
انا افكر مع نفسي اقول معقوله مايرحمون ذولي يدرون اننا بغرفه بس ومقفلين علينا باب ولا اي اداة ترفيه ومع هذا مايرحمونا او ينادونا معهم للقهوه او يجون عندي؟؟
علما انه لنا مشاكل قديمه مع بعض من فتره طويله جيتهم بعدها كلمتهم وسلمت واهديت لهم وحاولت احسن لهم بس مااش ماهم متقبليني ؛وفؤه ثنتين من حمواتي مسويات مشكل معهم من فتره قريبه ومشاكل كبيره مو بسيطه وعادي يكلموهم ويزوروهم ويتحملون عيالهم عادي بس انا لا!!!
هذا شي من اشياء كثير اشوفها منهم انصحوني اعطوني ارائكم خففوا علي ضايقه فيني بقوه
واعذورني لو طولت او كلامي ملخبط بس اكتب من غبنه ووحده وضيقه وكل شي ..