um sa3oodi
nmnm21
حبيباتي شكرا ع الدعم النفسي اللي تقدمونه لي الله يجعله في موازين حسناتكم واكيد "" من يتق الله يجعل له مخرجا ويرزقه من حيث لا يحتسب ""صدق الله العظيم

عزيزتي نجلونة .. أنا ما قدرت أقرا كل الردود خصوصا لما يكون فيها تجريح

أنا حالي تقريبا مشابه كثير لحال أم سعودي
أنا زوجة ثانية ولكن ولله الحمد إني مرتاحة خصوصا من ناحية أهله وزوجته الأولى وما بتصدقين إننا مثل الخوات وأكثر وعادي تلاقينا نتفق على زوجنا لو لقينا منه زعل أو أحيانا نفكر مع بعض إننا نصلح حاله في بعض الأمور اللي يكون مقصر فيها
ووضعي الاجتماعي قدام نفسي وقدام الناس عال العال مافي أي شي دامنا ما خالفنا الشرع

الحمدلله على النعمة لا أنا شرانية ولا هي شرانية واللي خلاني أوافق عليه من البداية هي الاستخارة .. وأخلاقه الزينة ..

فأول شي لازم تفكري في الاستخارة وتعتمدي كل اعتمادج على الله سبحانه وتعالى وهو اللي بيسهل طريقج .. ولازم تحطي مشاعرج في ثلاجة خصوصا في الفترة الأولى من حياتج وتحطي في بالج زين إن في وحدة ثانية تشاركج فيه ولها نفس حقوقج .. وإذا تعديتي على حقوقها بييج الجزاء من جنس العمل ..

بتمر عليج لحظات تتمني إنه يكون لج وحدج لكن لا تخلي الشيطان يقص عليج .. واتحملي المشاركة دامج رضيتيها من البداية .. وأبدا أبدا لا تفكري في سالفة إنه ألحين عندها ياترى شو يسوون .. ياترى رقد معاها وللا لأ .. إنسي كل هالخرابيط وصدقيني بترتاحي لأن التفكير والتعمق ييب الهم والنكد .. وصدقيني مع الوقت بتتعودين وبتحسين إن هالوضع حلو .. لأنه كل ما يبتعد عنج يزيد الشوق وتتجدد الحياة ..

هذا جزء من تجربتي حتى ربيعاتي يستغربون برودي وإني ما أغار من زوجته لكن أنا مؤمنة إن هالشي من رب العالمين لأني استخرته في البداية وهو مسهلها علي في كل الأحوال ..وأي سؤال أنا حاضرة .. وعسى ربي يوفقج للأفضل وتكونين أسعد زوجة في العالم ويرزقج الذرية الصالحة

صح كلام ام سعيد

كل ما يروح عنج للاولى فكري انه في الشغل او مسافر عشان ما تتضايقين لين يصير الموضوع عادي وتقتنعين انه لها حقوق مثل ما لج..

وصدقيني انه احسن للوحده يوم ترتاح من زوجها يوم او اثنين منا يشتاق ومنا هيه تقدر تاخذ راحتها تطلع السوق .. تزور اهل.. تسوي اللي تبيه في الوقت اللي هوه مش موجود فيه ... ومن ايي عندها هوه تاج راسها وهيه في خدمته

وبعد يوم الزوجه الاولى لها هيه بس... صح في الضرورات ممكن تتصلين عليه لكن لا تكثرين لانها اكيد بتتضايق... احترمي خصوصياتها عشان تحترم خصوصياتج

ونبهي على زوجج من البداية انه ما يذكرج لا بخير ولا بشر جدام عديلتج... وكذلك هيه... وبعد انه لازم يحط سيستم لكم انتوا الثنتين تمشون عليه وما تخطونه عشان محد ياخذ حق حد

وفي كل امورج الزمي الاستخارة والاستغفار وان شاء الله الله بيسرلج الخير

اختي الغالية umm saeed 2005
ربي يسعدك ويهنيك وانا ما استغني عن نصائحك ابدا ممكن بعد اذنك اراسلك ع الخاص ؟؟

اللي صارت زوجة ثانية او ثالثة او رابعة ما يصير نطلق عليها خطافة رجال او ما عندها ضمير اجل الصحابيات وامهات المؤمنين ينطبق عليهم هالمثل حاشاهم العبرة كلها في الزوج مش في الثانية