السلام عليكم ورحمة الله وبركاته

بنات وايد حلوة فكرة التجمع هذه :) انا عندي استفسار ومحيرني وهو اني انا حملت بعد 6 سنين بعلاج وعميلة واراجع بدار الشفاء وكنت ناوية اولد فيه لحد ماسمعت من اهل زوجي عن اكثر من قصة عن عدم تهياتهم للاطفال الي ممكن يكون فيهم اي مرض او اي مضاعفات من الولادة يقولون مانتحمل المسؤولية لازم نودي البيبي الحكومة بصراحة خفت:( وغيرت راي قلت اروح الصباح وصرت اراجع بالحكومة والخاص اخت زوجي ولدت بالهادي والثانية بالسلام بس الي بالهادي طلبت عملية تجميل بعد الولادة صار لها8 شهور وللحين تشعر بالالم :09:
بالصباح عندهم استعداد للبيبي خاصة ان عندهم تحاليل معينة تقول صديقتي الي تعمل بقسم الوراثة انهم مايسونها بالخاص بس بالحكومة بس الي مرددني للحين ان الدكتورة تقول ان القابلات هم الي يولدون واذا تعسرت ينادون الطبيب المناوب وتخيلوا بكر وتسلم نفسها للقابلة يوم اقول الشفاء ويوم اقول الصباح ارجوكم افيدوني بخبرتكم جزاكم الله الف خيرررررررررر

عبقريه كويتيه هلا والله اختي انتي نفسي اول وحده تحمل في البيت المهم :)شوفي انا محد مدحلي مذركير الكل يقول غسلتين والزباله ولاند مارك وايد مدحولي اياه وسرير البيبي انا شريته من أنار موجود في البستان وبيني وبينج كل شي تلقينه في لاند مارك واذا تبين تجهزين حق نفسج عندج انور وطاهر وقاسم كل هالمحلات موجوده بالمهلب ونصيحة مني جهزي وخلصي شغلج من الحين عشان تفتكين واذا تبين محلات حق حلو البيبي انا اليي عجبني صج صج (ريبيل ) عندهم شغلات راقيه وايد وايد موجود في حولي عند باتشي وبابايز وسوري قرقت وايد اكيد دوختج :)

هلا والله فيكم كلكم نورتونا بوجودكم بنات اللي على وشك ولادة ومازهبت جنطتها خل تزهب وما أوصيكم المشي عالبحر بس بشرط تكونين حافية القدمين (شفيني قلبت ) علشان تسهل ولادتكم عن تجربة لأن يساعد بتوسيع الرحـم
حبيبتي Om-7eDaR الصراحة آنا ما شفت الكفرات اللي بالغانم بس بروح أشوفهم .
عبقريه كويتيه انتي إذا جهزتي كل شي خلاص خلصتي بعدين شطبي على الكريمات اللي يحتاج لها البيبي والمميات والصابون والشامبو ولا تنسون زيت الأطفال علشان يدهن بليل ويتسبح الصبح راح
يرتاح وااايد وبعد عندكم الأدوية العربية حق الياهل إذا حاشه عوار بطن
واللي داشة بالشهر التاسع ادور لها برنامج حق النفاس وتزهب الأغراض اللي راح تتنقع فيهم
من الحين احسن

أما الأخت roro78 حبيبتي عموما كل المستشفيات الخاصة ماعندهم استعداد إذا الياهل طلع فيه شي
لاسمح الله فإذا انتي طمنوج بالسونار مافيه شي اولدي بخاص على الأقل انظف وفيه اهتمام لأن هناك ما يعطونج بال مثل الخاص يعني إذا ناديتي عمج اصمخ وغير الدم اللي عالأرض عموما إنتي فكري وقرري قبل لا ايلج الطلق
إنشالله تولدون بالسلامة وآنا بعد وياكم

اختي رورو راح اقولج نفس اللي قالوا الخوات انا سمعت ان الحكومي في استعدادات وتجهيزات اكثر من الخاص بالنسبه للبيبي وبالنسبه للحامل يعني اذا لا سمح الله تعسرتي او صار نزيف او شي الخاص ما يحبون يتحملون المسئوليه ينقلونج اهم على طول للحكومي بس ما ادري انا كل اللي اعرف ولدو بخاص عشان جذي راح اكون نفسهم .

اختي ام حيدر مشكوره يا عمري على النصيحه وبشوف ريبيل انا مره جربت محل حلو ما ادري شنو اسمه صاحبته كويتيه حبوبه حيل المحل هذا موجود بالسالميه بالاس ( سنترال بلازا ) اللي بشارع سالم المبارك واغراضها حلوه وراقيه اخذت مره منها حلوه حق وحده حامل وكان قيمته 50 دينار بس شكله كان وايد غريب وكوول وراقي .


انا ممنوعه بالنسبه للشامبو والكريمات حماتي قالت انها هي بتيبهم حق البيبي بس انا بعرف هل في كريمات لي انا عشان ايبهم ؟؟ ومن ناحيه النفاس يا ريت اللي عندهم خبره يقولون لنا عن برنامج حلو للنفاس نمشي عليه عشان نعرف شنو نشرب وشنو ننقع والله يعينا ويهون علينا كلنا يا رب :)

حبيبتي انا ممنوعة مشكورة ياحبي وماقصرتي انتي والاخت عبقرية وانا معاها بالسؤال عن برنامجكم للنفاس
اما عن الولادة بستخير واشوف الي ربنا يسخره لي هوالخير وعموما الف شكر واذا في احد من البنات مجرب الثنتين الحكومة والخاص يقولي شنو الفرق طبعا انا متاكدة بالخاص اهتمام اكثر اكيد لانه بفلوس بس الي افكر فيه واضحي علشانه براحتي هو جنيني مو مصدقة واشوفه واخاف عليه اكثر من نفسي واحدة يابنات تراجع بالشفاء ولما ولدت عندهم طلع البيبي فيه شي بالقلب وطول الوقت ماقالولها مع انه يبين بالسونار المفروض وبعدين تضاعفت الحالة للبيبي وصارت اشياء للدماغ وحاليا حولوه لامريكا لبوسطن وحالات غيرها سمعت عنها وانا طار عقلي من مكانه هذا الي رددني