بسم الله الرحمن الرحيم
حبيباتي ..أول مرة أكتب مشكلتي في هذا المنتدى
وأبي منكم الحل ...ممكن بعضكم يقول مشكلة هينة وعادية
وأنك تكبري السالفة ...
بس اللي أنا أحس فيه أكبر من جذي..
وهاكم سالفتي اللي تتعبني ..
زوجي صار لنا متزوجين سنة وكم شهر وأهو أكبر مني بكثيرررر يعني أهو بنهاية الثلاثينات
المفروض يكون فاهم الحياة عدل ..أهو ماله مراهق أتعب أعلم فيه
بقولكم على طول تزوجته وأهو مديون ..أنا من عيلة غنية ولله الحمد ومتعودة الرخاء بس بعقلانية ..وأهو راتبة زين بس المشكلة ثلاث أرباعه يروح حق الدين اللي مقترض من بنك وسلفة من مكان ثاني وهكذا مايصفى لنا بالشهر غير ألفين تقريبا ..تروح من بنزين وأغراض البيت ..ويجمع حق أجار البيت ..
وأنا موظفة بس جديد وراتبي على قدي يعني بس حق لبس وخرابيط بنات وقطة أهل ومكفيته ..بس والله إن ثلاث أرباع زينة البيت مني ولا أقصر بشيء ناحية زوجي..
بس أهو مبذر وبخيل ...وشلون تجي هذي..؟؟
بقولكم لو أقوله عطني فلوس لو مبلغ بسيط 100 ريال أو 250 ..يقولي شحقه وأنا ماعندي وقاعد أجمع
وأنت بس تصرفيهم حق ملابسك وأنت متعودة على اللبس الغالي وليتك تروحين حق أسواق رخيصة بس تروحين حق أسواق ماركات ( المشكلة أنا بصرف من فلوسي شو مدخلة ألبس ماركة وإلا أبو ريالين ) وهذا اللي باط جبدي ..
ولا مطاعم ولا أسواق ولا يحزنون وإن رحنا أنا اللي طالبة هالشيء وأنا اللي أدفع طبعا من نفسي اتقاء لمنعه من الذهاب وأحيانا أطفشششششششش وأبي أغير خصوصا أنه ماعندنا جهال والحمد لله على كل حال ..رأسي براسه بهاالبيت ..!!
المهم طالع لي من قهري كل فترة وفترة يشتري شيء حق البيت أو حق نفسه خرابيط مالأمها داعي ..وغالية وهذا القهر بعينه وعلمه ..
بيتنا كامل ولله الحمد واليوم طالع لي يشوف بالإعلانات تلفزيون مدري كم بوصة ويقول بغيره وبقط حقنا لأهلي ..
وغير أهله هذي سالفة كوم ..يمكن نص ديونه من شراه للخرابيط اللي مالها داعي لأهله 4 ثلاجات مقاس كبير والبيت مافيه غير 5 أشخاص,
وكل يوم يبون يبدلون شيء يدقون على زوجي واهو يدفع الرجل الهمام ..
لو هي استكانات شاي والله يجيبها ..وأنا ياناس ماأبي يبخل على أهله ..لكن يجيب الشيء العدال اللي يحتاجونه ..مو كل شيء يطق بروسهم يجيبونه ...المشكلة ماعندهم دخل ثابت ..واهم بس عطني.. سول لي ..جيب لي..ياناس يبي يغير تلفزيوننا الجديد ويشتري ليزر ب3000 من وين يجيبهم ؟
والديون ..وكل شيء أطلبه لا ؟؟
فهموني كيف أخلي زوجي يعتدل بالدفع أمس رحت أشتري مفرش السرير ..
وقلت له بنأخذ مفرشين ويوم جاء وقت الدفع قال الهندي بــ400 وقام التفت علي يقولي يالله ادفعي..ويوم فتحت شنطتي ماحصلت إلا أمية 100 قام قال ماعندك أبدا قلت لا خلهم أروح أسحب وأرد قامطلع الفلوس من بوكه ودفع والله حتى الهندي طالعني وضحك وهو يقولي معاه ..وكأنه منتقده ..!!
تكفون ياخواتي أنا بأول الطريق ..ناس تقولي لا تصرفين ولا ريال خليه يتعود ..وناس يقولون راح تتعبين وياه ..المشكلة أهو كريم في أشياء لأهله والبيت وبخيل معي ..
قلت له بهد الوظيفة راس مالها ألفين قال إلا مافي زيادة هديها وإلا فيه خليج فيها ؟؟!!
يعني ماقدرت أعرف له ..
أنا اللي باط جبدي أن صرفيته دايما على أشياء ثانوية وخرابيط تكون عندنا ويروح يشتري أحسن منها .. وأغلى ..وأحنا بشقة على قدنا ..في أي يوم من الأيام صاحب الشقة ممكن يقطنا برى ..!!
يعني فكر بالمستقبل ..مافي..ونسيت أقولكم الضعف بالنسبة للإنجاب من ناحيته ..وأنا ولله الحمد سليمة ..وماينفع معنا غير طفل الأنابيب وسويتها قبل كم شهر ومن فلوسي دفعت 10000 وأهو 4000 حق الأدوية والإبر..
المفروض أهو اللي لأن الدنيا قدامنا وماندري عن الأقدار اللي تواجهنا ..لا وبعد أنا أدرس ودراستي تتطلب مصاريف حق الكتب والتصوير واللي منه ..
تكفون يابنات تراه غاثني ..وفيه أشياء كثيره أعاني منها بس بسكت وبحاول وأهو كم مرة نصحته وقلت له عن قصص ناس فلسوا وانسجنوا بسبب الديون ..وجبتها بالتلميح والغمز واللمز ...صار يخبي علي ولا يخبرني كل شيء بالسر ..
حتى أحيانا أفقد من أغراض المطبخ ومن بكرى ألاقي أشاء جديدة يقول مليت من الصحون هذي والاسكانات هذي..
والله يستر لا يبدلني بعد أنا ويقولي مليت منج ..
الله يستر عليكم دنيا وآخرة تراني بموووت من القهر ..كل شيء يخصني أصرفه على نفسي وأشياء كثيرة بصرفها على البيت من نفسي غير السفر لمكة والشرقية تكون بفلوسي من سكن وأكل ومشتريات وأهو مايبقى من راتبه شيء ..كله يروح حق نفسه وأهله ..والله يعنني
..تكفون يابنات ساعدوني ياخبيرات ..عطوني حل أستخدمه معاه أخواتي يقولون لأنه كبير ماتقدرين تربينه ..أنا ماأبي يصير خاتم بصبعي أبيه يصير معتدل وعاقل ..لاضرر ولاضرار
والله إني ببكي كل يوم غير هذي ا
لسالفة سوالف ثانية يقهرني ..
ومالي غيركم بعد الله لأنه حتى خواتي وهلي ماصرت أقولهم شيء..وإلى الله المشتكى ..
رحــيــل @rhyl_9
محررة برونزية
يؤسفني أني أصل لعرض مشكلتي فمن الطبيب المداوي منكم يابنات الله يرحم والديكم .؟
28
2K
يلزم عليك تسجيل الدخول أولًا لكتابة تعليق.
اللاسف اختى هذى داما مشكلت الموظفات انصحك نصيحه عوديه انه هو الذى يصرف ولاتصرفين من راتبك شى على البيت لاانه من واجباته هو الذى يصرف لاانتى دائما بينيله انك مامعك فلوس والله اختى بكره بتعضين اصابعك ندم ياماسمعنامن المدرسات ومشاكل الازواج والرواتب
PR
•
الله يفرج همك يارب
اختي لاتخلين زوجك يعتمد عليك في المصاريف حتى لو لنفسك هو الرجال وهو اللي لازم يصرف
اختي لاتخلين زوجك يعتمد عليك في المصاريف حتى لو لنفسك هو الرجال وهو اللي لازم يصرف
الصفحة الأخيرة
وشوفي قولي له ينظم راتبه يعني قبل ماينزل الراتب خليه يقسمه هذا حق الديون وهذا حق مصروف البيت وهذا يصير معه بالبوك لوإحتاج شيء صدقيني هالطريقه حلوه..
أما سالفة أنه يشتري ويبذر في أشياء تافهه صدقيني كثيييييير اللي أعرفهم كذا
بس إن شاءالله إذا جاكم عيال بكره بيعرف وشلون يقتصد..