يابخت من جمع راسين بالحلال .. قصتي الحلوه دعوه للضحك ..

السلام عليكم ورحمه الله وبركاته ..



كيفيكم ياحلوات ؟

اكيد بخير دام اني بخير ههههههههه


اتشووووووووووووووو


الحمدلله قولوا يرحمك الله ترا جد عندنا برد يا لطييييييييف ودي اني الحين اسكن في مكه نتدفى شوي ..


المهم حبايبي كاتبه لكم قصه طبعا خياليه ودي تتونسون فيها شوي من تأليفي وإخراجي وانتاجي يلا اشوف كل وحده تجيب لها حليب بالزنجبيل واتجمعوا حول الدفايه مدري المدفأه مدري وش يسمونها خخخخ ولا تنسون بطانياتكم عاد لاتقولون ما قلت لكم . وان حبيتوا فلا بأس بأبو فروه وفي روايه اخرى كستناء مع اني لسني احبه كثيرا ..


في يوم من الأيام كان هناك بيت سعيد في حي سعيد في مدينه سعيده وتسكنه عائله سعيده في كوكب السعاده ( ابشركم انتهى موال السعاده خخخ )

في هذا البيت تسكن بطله قصتنا الفتاه الطيفه الظريفه صاحبه الطله النظيفه نهى صفقوا لها هييييييييي ..

استيقظت نهى من نومها صباحا واتجهت الى فتحه في الجدار فيما يسمى بالنافذه وجلست تتمغط قليلا عند هذه النافذه فإذا بها تسمع صوت شخص غريب حست انه يناديها طلت نهى راسها من الشباك من زود اللقافه نسيت وجود الزجاج على النافذه فإذا بها تخبط جبهتها الظريفه تتسبب في طلوع زعرورة صغيرونه كوسام لقافه خخخخ جلست بيد تفرك جبهتها وباليد الثانيه تفتح الشباك وهنا شافته لأول مرة نعم ..

شافته ..



ابيض ..


انيق ..


وسيم ..


له نظرات قويه ...


له حضور قوي ..



يلبس وانتو بكرامه جزمه سوداء بكعب




راااااااااااااائع في كل شيء يعني اتعب في وصفه هذا على كلام نهى ..


ايه نسيت اقولكم شيء مهم ..


يلبس فروه او جبه اللي تبون ما قلت لكم انيق ؟! ..


من زمان وهي تحلم بواحد يخطبها في مثل جماله ..


آآآآآآآآآآآآآآآآآآآآآآآآآآآآآآه يا بخت اللي بتاخذه

جالسه نهي تكلم نفسها وهي تشوفه الا طنت في راسها هذيك الفكره اللي ما هي بصاحيه ليش ما أسأل ابوي عنه ؟ يمكن يعطيني وجه واعرف سبب وجوده هنا ؟؟ بس لازم اجي لأبوي بشكل مختلف ..

ونزلت نهى عند ابوها اللي جالس بالصاله وتسأله سؤالها الذي طالما ارقها حتى ما خلاها تغسل وجهها بعد ما صحيت من النوم ..

نهى : بابا حبيبي ألف مبروك العريس الجديد ..

ابوها : !!!!!

نهى : بابا وش فيك ؟

ابوها : أي عريس ؟ وبنظرات متسائله لأمها فيه شيء صار وانا مدري ؟

امها : لاو الله ؟؟

نهى : بابا يعني تستهبل والا شكلك كذا ؟

ابوها :

نهى : آسفه لا والله مو قصدي بس انا شفت ذاك المزيون اللي في الحوش قلت يمكن تعرف عنه شيء .. قلت اقولك اياها بصيغه سؤال ظريف دايم يقولونه في المسلسلات مبروك العروسه الجديده وتطلع سياره قلت انا اقول مبروك العريس الجديد وسبحان الله انه طلع خروف مدري خروفه ..


ابوها !!!! يوجه كلامه للأم .. الحين بنتك هذه صاحيه ؟ البنت نامت زين والا فيها شيء ؟؟

الأم : لا طال عمرك ابشرك نايمه زين وهذه الآن هي في أحسن حالاتها ..

الأب : يالله العوض منك يارب مدري وش ذا البنت اللي عندي تفكيرها مدري وش يبي ؟؟ احسها ممكن تكون ؟؟!!!

نهى : حلوه ؟

ابوها : لا مو هذا قصدي ..

نهى : ملكه جمال ؟

ابوها : يابنتي بعدينا عن الجمال هالنقطه بالذات منتهين منها من يوم ولدتك امك !!

نهى : طيب نابغه ؟

ابوها : الا هذه تحتها مليون خط ..

نهى : طيب وش رايك في عبقريه ؟

ابوها : انتي ما مليتي من مدح نفسك ؟ جاني غثيان من هالمجامله ..

نهى : بابا ؟؟؟

ابوها : وعلى طاري بابا والله مو لايق يابنتي ودي تغيرنها ابوي برضه عشان الغثيان ..

نهى : ؟؟؟؟ ما فهمت ..

لكنك بابا وتظل طول عمرك بابا ..

ابوها : صحيح وهذه غلطه عمري اللي طول عمري اندم عليها ..

نهى : اكيد كان ودك تجيبني من زمان .. من القرن المدري كم

ابوها : صحيح صحيح عشان ازوجك هتلر وارتاح ..


نهى : على طاري الزواج ابوي الخروف اللي بالحوش وش نوعه ؟ خروف والا خروفه واذا خروفه لايكون تكون حامل ؟ بعدين يجي البيبي ما يلقى امه وينحرف ويتعقد نفسيا ويصير كل يوم وهو في قسم الشرطه لا يا بابا تكفى طلبتك لاتذبحها وهي حامل ..


ابوها : اعوذ بالله من الشيطان الرجيم اقول تبون شيء ؟ ترا انا خارج ما عاد اقدر اجلس هنا ولا دقيقه حاس عقلي بيروح مني ..


الأم : لا يا ابو مشاري الله معك اهم شيء عقلك عاد يكفينا واحد ما عنده عقل ..

نهى : ؟؟ وداعا يا أبي ..

ابوها : مطرقا رأسه يفكر في حال بنته الغريب ..

نهى : ماما ..
الأم : وش قالك ابوك ما قال نادينا زين ؟ قولي يمه ..

نهى : طيب ياماما بقولك يمه ..

يمه بروح عند الخروفه اللي برا اسولف معها شوي ضيعفه احسها تحس بالوحده مثلي ..

امها : الله يعين هالمسكين عليك .. روحي

نهى : يمه صدق يعني هو خروف ؟ والله مو باين كنه خروفه ههاهاها ..


امها : تصفق يدا بيد .. مافيه امل ..


نهى المسكينه حست بأنها هي والخروف على قولها من نفس الفصيله حتى ان الحاله النفسيه هي موج وده عند الطرفيه بنفس الشكل !!!

نهى : السلام عليكم .. كيفك خروفي الجميل ؟ نمت زين والا لا ؟

الخروف : ؟؟؟!!!!!
نهى : اقول اتكلم اتكلم يعنني ما اعرف اتكلم تحسبني ما شفتك يوم تهذري مع نفسك امس ؟

الخروف : !!!!!!!!!!!!!!!!!!!!!!!!!!

نهى : يمه والا تكون جني ؟ وبغت تنط الا ومسكها الخروف مع يدها .. يا بنت الحلال انا مو جني انا خروف حقيقي بس مستغرب انك تفهمين لغه الخرفان ..

نهى : ما عليك اعجبك انا قدها وقدود .. يلا قول وش فيك ضايقه الدنيا فيك وزعلان ؟

الخروف : والله ما ادري وش اقولك ؟؟ الحقيقه ا ...

نهى : لحظه مادام فيها سالفه طويله خليني اجيب شيء وارجع ..

راحت نهى صلحت كوبين حليب بالزنجبيل مثل اللي نشربه وجابت معها بطانيتين ومروحه يد ومخده ؟؟

رجعت للخروف وبدت تلبسه البطانيه اللي شكرها عليها من كل قلبه قال لها : الحين عرفت كل شيء جبتيه ليش جبتيه الا المخده والمروحه ليش جايبتها ؟
قالت نهى : المخده عشان اذا تعبت من القعده اتكي .. والمروحه اذا حسينا بالحر تبرد شويه ..

الخروف :


طيب كيف عرفتي اني بردان ؟ قالت : من عيونك ..

انحرج الخروف وحمرت خدوده قال كيف يعني ؟

قالت : شفت عيونك تتراقص عرفت انك بردان ..


الخروف ؟؟ كان وده يرمي عليها بطانيتها وفي نفسه : والله انها ما فهمت هالبنت لغتي الا وهي من بني عمي لايمكن تكون بشر اجل البردان تراقص عيونه ؟؟ لكنه استحى واخذ البطانيه وجلس في هدوء واخذ يحكي ..


الخروف : انا من يوم فتحت عيوني على هذه الدنيا وانا حولي بنت عمي شوشو ..
نهى : الله حتى انتم تدلعون بناتكم ؟ الخروف ايه ايه بس لاتقاطعين ..

المهم انا وشوشو هذه من صغرنا وحنا نلعب في الوديان وبين المروج الخضراء والأنهار الصافيه نلعب ونمرح ..

نهى : الله ؟؟ ما قابلتو هايدي تراها هي وولد عمها بيتر هناك ترا نفس قصتكم سبحان الله .. اقول بدينا نصب ؟ مو عشانك ابيضاني تكذب على عى بالي اوروبي ؟؟ ترا ما عندنا الا عشيبات في نواحي متفرقه
والباقي الراعي يجيبه لكم من البقاله ..


الخروف : بقاله ؟ أي بقاله يا ام بقاله ؟ وبعدين احترميني ترا انتي ما بعد عرفتي مكانتي بين ابناء عشيرتي ..


نهى : الله والعشيره قطيع من الخرفان التايهه مصيرها الجزار تحسب نفسك ابو زيد الهلالي لو كان فيك خير كان دافعت عن نفسك ماجيت هنا؟؟

اقول بتخليني اكمل والا بأمشي ؟
نهى : لا يرحم امك كمل محد معطيني وجه الا انت ..
الخروف : اجل لاتقاطعين .. ولا تكذبيني انا توها زبطت معي القصه لاتلخبطينها .. المهم اتفقنا انا ورورو على الزواج ..

نهى : رورو ؟ من هذه رورو ؟

الخروف : احم احم لا هذه بنت ثانيه كنت اقابلها يوم ابو شوشو يمنعني من شوفتها ..

نهى : يالخاين ؟؟ خلاص ما ابي اسمع انا بروح

الخروف : لا يرحم امك انتي خليني اكمل لك القصه .. لكن عندك ولاعه ؟معي سجارة ودي ادخن ادخل مزاج شوي ..
نهى : ياللي ما تستحي على وجهك الحين يطلع لحمك بسطرمه مدخن ؟؟ انت ما تعرف انه يجيب السرطان ؟ شعارنا في البيت لا لا لااااااااااا للمخدرات ..
الخروف : اقول بس لايكثر الله يخلف على امن جابتك ..
نهى : ماعليك زود ..
الخروف : المهم اتفقنا انا وشوشو على الزواج وقررنا يكون زواجنا مع عيد الأضحى عشان يكون عيدنا عيدين وننشد عيدنا عيدين بشوفه حبايبنا واهلنا ياعسى افراحنا كلها عيدن سعيد ونهى تدق رقبه هلا ورى سرى .. .. لكن للأسف انا اخذوني من عند اللي احبها وجابوني هنا شوشو تنادي وانا انادي شوشووووووووو جاسررررررر
ونهى كذا .. آآآآآآآآآآه يامعزتي العزيزه .. نهى : وع ياذوقك ما لقيت الا معزه ؟ قال الخروف عاد هذا المتوفر لو فيه احسن ما مانعت ..

نهى والحين المطلوب ؟ قال لها الخروف فكري معي كيف ممكن اوصل لشوشو ؟

المهم قامت نهى والخروف معها رايحين جايين تعبوا من كثر التفكير وحفيوا بعد يعني كانوا يمشون طريق رايح جاي وهم حفيانين .. المهم ولعت لمبه فوق راس الخروف قال لقيتها ,,
نهى : لقيت الحل ؟ قال : ايه قالت : وش معنى حتى الخروف يقدر يفكر وانا لا ؟ قال : اقول اعطيني وضوئك لاتصيبيني عين لا اتزوج ولا اهلك ياكلوني .. قالت : طير ياعمي ما بقي الا هي .. اخلص عطنا الزبده ..
قال الحل الوحيد انك تفتحين الباب وتخليني اخرج من هنا ..

نهى : والله فكره لكن كيف توصل تعرف الطريق ؟ قال لها ايه اشم لييييييييين اوصل مكاني في سوق الغنم واقابل شوشو ..

نهى : مو تقول في الجبال الخضراء والأنهار الصافيه ؟

قال لا كنا في الخارج واستوردونا .. ( صرفها خخخخ )

نهى طيب لكن توعدني ما تخون شوشو ؟؟ قال : اوعدك ..

فكت نهى الحبل وفتحت الباب للخروف وودعته وعيونها تفيض بالدموع في وداع مؤثر للخروف الذي قضت يومها معه وشوي تمسح في عيونها بالمناديل وشوي تشوف الخروف وهو يبتعد عنها بعيدا بعيدا لين وصل الى وانيت يحمل في صندوقه خروف آخر وقف الخروف صاحبنا عند هذا الوانيت واخذ يرمق الخروف اللي داخل بنطرات اعجاب ودخل ابو الشباب للصندوق بمساعده طفل على مرأى ومسمع من نهى اللي تنهدت

وقالت وهي تمسح دموعها : أخيرا لقي شوشو ..

سكرت نهى الباب ولقيت الأم في انتظارها عند الباب وبيدها شيء نحيف ظريف والباقي ما يحتاج اقوله





هاه ياحلوين ان شاء الله تكونوا انبسطتوا من هالحكايه ؟ يلا حبايبي الله يسعدكم الردود الزينه لاهنتوا ...