ياحدقه يانبقه

بسم الله الرحمن الرحيم


حبيت اشارك معاكم يامصرقعات ياحلوين وانا بدي احكيلكم حكايه صغنونه زيكم هدي الحتوته سمعتها من ستي (جدتي)واليكم بها .........................

كان يامكان في قديم الزمان وسالف العصر والاوان كان في ابوا عنده تلات بنات وفي يوم من الايام كانت بنته الصغيره تكنس حوش البيت وكان ساكن جنبهم قصر السلطان خرج ولد السلطان وشافها وسالها قالها ياحدقه يانبقه كم في الشجره من نبقه وردت عليه وقالتله يا
قاري ياكاتب كم في السماء من كواكب فنقهر منها ولد السلطان وقال للخدم جيبولي ابوها
وجاء الابو وطلب من الابوه انه يحل الفزوره وقاله ابغاك تجيني ضاحك باكي ماشي راكب
وراح الابو البيت حزين:44:وجاته بنته الكبيره وقالتله ايش فيك قالها مافي شي وجاءته التانيه وبرضوا قالها مافي شي وجاءته بنته الصغيره واصرت على ابوها الين قالها وقالت لابوها جيب حمار وحط رجل على الحمار ورجل على الارض وشم البصل وتنزل دموعك واضحك وكدا تصير راكب ماشي ضاحك باكي وانقهر ولد السلطان وجاء تاني يوم وسال البنت الصغيره وقالها ياحدقه يانبقه كم في الشجره من نبقه وردت عليه ياقاري ياكاتب كم في السماء من كواكب وانقهر منها وطلب من ابوها يجيب مويه لامن بحر ولامن نهر ولاموية مطر ونفس الطريقه سالته الكبيره وقالها مافي شي والتانيه الين جاءت الصغيره وسالته وقالها قالت نجيب
تكرونيه ونخليها في غرفه تعرق ونحط العرق في كاسه وراح وداء الكاسه لولد السلطان وجاء تاني يوم وشاف البنت الصغيره وقالها ياحدقه يانبقه كم في الشجره من نبقه قام قالتله ياقاري ياكاتب كم في السماء من كواكب وحلف ليعجز ابوها وقاله جبلي عيش (خبز ) لامن دقيق ولاعجين وحزن الابو وبنفس الطريقه جاءته البنت الكبيره والتانيه وقال مافي شي وجاءته الصغيره وقالها قالت نجيب الفصفص الدبه(الابيض)وفصفصوه هي واخواتها ودقوه وطحنوه وعجنوه وسوا منه العيش وودا الابو لولد السلطان وانقهر ولد السلطان وجاء اليوم التاني وقالها ياحدقه يانبقه كم في الشجره من نبقه وردت وقالت ياقاري ياكاتب كم في السماء من كواكب وقال الا اعجز ابوها وقاله جبلي بناتك التلاته حوامل فحزن الابو وقالتله الصغيره لاتشيل هم جابت خروق وحطتها في بطونهم وقالت للكبيره ادا سالك على ايش تتوحمي قوليلوه على تفاح وقالت للتانيه قوليلوه على برتقال وسالوها وانت قالت مالكم دخل وراحوا مع ابوهم لبيت ولد السلطان سال الكبيره انت على ايش تتوحمي قالت على تفاح وجبلها صندوق تفاح وسال التانيه وقالها وانت على ايش قالت على برتقال وسال الصغيره وانت على ايش تتوحمي قالت على كمثرى من حجر قال ولد السلطان في كمثرى من حجر وقالت اجل في حرمه تحمل من دون ذكر واتزوجها ولد السلطان وتوته توته خلصت الحتوته)

ان شاءالله تكون عجبتكم :06:وهذي اول مشاركه لي معاكم والحكايه باللهجه المكاويه