كوبونات الراقية تسجيل الدخول

سنا بدر الدجى

ياذا الموظفات اللي كل من طمعان برواتبهم .. فضفضة

الأسرة والمجتمع •

ما ادري ويش اقول ومن وين ابدا ؟؟
ترى فضفضتي مررررره طويله..
بس ابيكم تحسون بمعاناة الموظفات وخصوصا المغتربات يومن الكل يقول انتو معكم رواتبكم

لما تخرجت كنت ما ابي الوظيفة قلت ابي اجلس شوي بالبيت انتبه لعمري وبديت احفظ قران واخذ دورات كمبيوتر
والسنة اللي بعدها تمنيت الوظيفة خصوصا اني بديت ازهق من القعدة بالبيت
وتتوفى امي باخر السنة وانا اخر العنقود وكل اللي بالبيت متزوجين الا انا واختي اللي قبلي

فسودت الدنيا بوجهي..الحمدلله على قضائه لكن جو البيت كان متعب نفسيا

ابوي تعبان من وفاة امي واختي كمان..لكنهم يغيروا نفسياتهم بسبب طلوعهم برا البيت وانا ما اقدر اغير نفسيتي لأن المفروض الناس تجيني مو انا اللي اجي
ومو مفروض علي كمان اضحك مراعاة للظرف اللي فيه...قسم عادات ما انزل الله بها من سلطان...
واختي بالذات جننتني كانت عندنا بنت اختي تدرس بالكلية وكل ما ضحكت انا واياها اختي تمر وتقرفنا وتقول انتو ما عندكم احساس تضحكون واحنا عندنا ميت << اصلا شكينا انها انهبلت
وهالكلام بعد وفاة امي يمكن بشهرين

وفعلا تمنيت من ربي اني اتوظف وصرت اتحين اوقات اجابة الدعاء وكل ما قابلني احد يدعيلي بالزواج وانا اقولهم تكفون ادعولي بالوظيفة هي اللي ابيها متنفس لي على الاقل


والحمدلله ربي رزقني بوظيفة في هجرة وليست قرية ولا يمكن السكن فيها فسكنت بقرية قريبه منها ومن جد كنت تعبانه لأن الطريق للهجرة صخري غير معبد والسيارة اللي كنت اركبها الله المستعان شكل القطن تبعها مو فيه او من استهلاكها نايم المهم انو صاحب السيارة فارش على كراسي السياره كلها بطاطين..على اخر السنة فهمت ان السيارة ما فيها قطن
بس تلبيسه... عشان كذا فارش السيارة بهالبطاطين تخفف علينا من الجلسة على السست

وغير اني كمان لما ابغى انزل لأهلي بعد اطلع من القرية اللي انا ساكنتها طريق مو معبد 40 كيلو ومن ثم اوصل للاسفلت..
عن جد سنة ما في زيها تعلمت منها اشياء كثيره والحمدلله قدرت اثبت نفسي واكتشف قدراتي

ولكن سيارة اخوي تكسرت من الطريق وصااارت رجه..الله يعوضها غيرها..وكله من ورا هالسواق اللي كل شوي ينكبنا ومافي احد يودينا غير الاهل ووطبعا كل مره اخو وحده من اللي بالسكن
وما انسى بهذي السنة كان في اجتماع ولازم انزل للبلد ومانا لاقيه احد يوديني طلبت على الاقل بس احد يوديني للاسفلت واخواني ياخذوني ولكن ما احد قدر وبالاخير اضطر اخوي يجيني هو وعيلته بسيارة ابوي ويصير لنا حادث بالطريق
وتلفت من ورا هالحادث السيارة ومو مهم السيارة قد ما احنا مهمين المهم اني ذكرت اخوي وعيلته بالحادث اللي صار لهم قبل كم سنة ومات فيه ولدهم وانا لما صحيت لقيت اسياخ حديد( اسياخ الرواق اللي يدقونه بالبر )تدق براسي لحظتها تذكرت الصدقه اللي عملتها قبل كم يوم..بس ما جا ببالي اني محسودة على الوظيفه..
وكان يومتها ابوي مسافر لأنها هذي اول جرعة كيماوي ياخذها اخوي
وما قلنا له الا اليوم الثاني عشان ما يقلق واصبعي الى الان متضرر من هالحادثه على الرغم من مرور 3 سنوات عليها

وطبعا بعد هالمعاناة ما نقلت وظليت كمان للسنة الثانيه ولله الحمد مدة شهرين ثم جاني ندب لباقي السنة بقرية قريبة اروح وارجع والحمدلله احسن من السكن
واثناء جلوسي هناك كل من في الديرة عرف اني توظفت وهاتك من الكلام يالله طبعا فلان الفلاني بناته كلهم يتوظفوا عشان ابوهم
واااااه من هالكلمة ويصيبني انزلاق غضروفي بظهري
والحمدلله على قضائه..

لكن اللي حسدتني ما تدري اني عانيت من ورا هالانزلاق...سببلي نزيف يستمر لأشهر ثم ينقطع مع زيادة مفرطة بالوزن..وامي متوفيه لمين اشكي وكمان المستشفى عندنا خرطي..كذا مره اراجع ما يعطيني اي فايده

وهاتك نصايح من الدكتور ممنوع الانفعالات..الاجهاد..التوتر.. المشي من طرق وعرة
وحتى لما وصفلي العلاج الطبيعي مرتين عملته وصابني نزيف من وراه فلما بلغته وقفه عني ..قالي لا تعمليه هذا فيه خطورة على صحتك..

وطبعا صدر بحقي تقرير طبي يتضمن حالتي الصحيه اني ما اقدر على مسافات طويله ولا حتى سفريات متواصله..يعني بعز شبابي طحت..والسبب ناس ماهي مقتنعه باللي رزقهم اياه ربي..ويمكن يكون امتحان..ما يدري الواحد
وطبعا حتى شغل البيت ما اقدر عليه وصعب اختي تمسك البيت كله وما كان عندنا شغاله
واستقدمتها على حسابي لظروف..

وما جات الا بطلعة الروح
لا واستقدامها تعقد
مره يقولون لنا ان الدوله اللي بنستقدم منها الطريق لها اتقفل لمشاكل
ومره يقولون لنا ما تطلبون بنت لأن البيت ما فيه زوجه للأب والام متوفيه
ويوم عدلنا شرط الزواج

يرجعون يطلعون لنا كمان سالفه ان ابوي استهلك العدد المتاح له من العماله اللي على كفالته ولازم يقلل منهم واحد اويحول كفالته لشخص اخر عشان الشغاله تجي على كفالته

واستقدام شغاله على كفالتي ما اقدر لأن شرطهم يكون الاب مطلق او متوفي..الحمدلله والشكر قرارات غير قابله للتعديل

وبعد هالحوسه والحمدلله واخيرا جت الشغاله برمضان يعني بالاجازة
فراحت سنة وانا تعبانه
ولله الحمد جاني نقل لقرية 90 كيلو بس برضو تعتبر احسن من الهجرة اللي كانت 200 كيلو
وكمان جاني ندب والحمدلله لقرية اقرب بكثير ..صحيح ان فيها ضغط بس فعلا ما شفت العافية الا فيها اثاري الطرق الطويلة يوميا متعبه وانا ما كنت منتبهة
وطبعا لا انسى اختي نرفزتني ورفعت ضغطي وسببلي نزيف..استمر 4 شهور يخف يومين ويرجع يستمر
الين ما صحتي انعدمت وشعري طااااح وبانت فيه فراغات وبشرتي بهتت وكنت اتعب ويصيبني هبوط بالضغط وخفقان بالقلب ..واثاري الدعوه انيميا وما دريت الا يوم جيت اعالج شعري
والحمدلله انا الان بطور العلاج..وهذا كله بفضل الله ثم بفضل الصدقات اللي كانت نيتها الشفاء وتيسير اموري

ولا زلت تعبانه من ناحية ظهري فمزوالة الاعمال اليومية ما اقدر عليها وحتى لو ابي اراجع مستشفيات يلزمني سفر والسفر المستمر ما اقدر عليه لأنه يلزمني بالغياب وبالتالي الضغط بالعمل
............................................................................................
ايضا عانيت ان الكل ينظر لي نظرة اني وحده من الاميرات لمجرد اني توظفت

ليه هي المعلمه غير عن الناس..اجل الطبيبة وش تكون

ولا الصحوبيات ما تجي الا من ورا الوظيفة..ما ادري هي مصلحه ولا بريسيتج

ولا يومنك مو فاضيه تزوري
كل من ينقدك انت مو فاضيه
ولا شفتي حالك علينا بعد ما توظفتي

اشياء كثيره تفهم بالغلط

لكن هذا كله كان بالنسبة لي علاجه بالطناش

لكن اما انه يتقدملي واحد عن طريق رسائل الجوال وبدون ما يقول اسمه ويقول اسمي نصيا وانو يعرف ابوي ويعرف اني موظفه هذا بحد ذاته بجاحه
والطامه عارف انه قبل اسبوع كنا مسافرين ولوين مسافرين..

طبعا حتى لو اعطيت الرقم لاخوي ولا بلغت احد من اهلي وش يفيد اذا هو عرف اسمي ..وما قصرت بلغت الاهل..
وفعلا تعبت يومين وكنت خايفه انه ينتشر رقمي والرقم هذا عزيز علي
وحتى نوم ما قدرت انام يادوبك اخذت مسكن حتى قدرت انام واحتسبت عليه ربي

وكلمت وحده من صديقاتي قالت ما عليك طنشي يا كثر الرسايل اللي جتني بهالطريقة وما ارد عليهم

فمن كلامها اكتشفت ان يا كثر الرجال اللي يعملون كذا
طيب انت ما ترضى احد يلعب باعصاب اختك..
اجل وهي موظفه وش بتسوي

حسبي الله عليهم يلعبون ويفشلون بدراستهم وبالاخير ما يبون الا موظفه تصرف عليهم ويطلقونها..يعلقونها..يعذبونها على كيفهم..وكله عشان الراتب

لا وكمان طلع يا كثر المعلمات اللي الرجال يتعاملون معهم بهالشكل..استبداد

وقبل فترة برضو تقدملي واحد رسمي لكن طلعت زوجته الاولى معلمتي بالابتدائي
وانا طبعا رفضت لأنه متزوج وغير ان زوجته معلمتي...بجد ما قدرت اتخيل الموقف ولو لدقيقة..
وكمان تقدمولي غيرهم كلهم وظائف برواتب قليلة جدا وعشاني معلمه

وغير اللي تقدملي طالب واصغر مني بالثانوي ..ما ادري يبيني اصرف عليه ولا ادرسه ولا ايش اسوي ما ادري
استغفر الله

لو انه مثلا ياخذ مبلغ من المال ويشتغل فيه ما قلنا شي لكن المصيبه ان الراتب كله يروح
وعند اي مشكله سحب عليك سيفون وراح ياخذ اللي يبيها

من جد قلة حيا وابتزاز وانتهاز

وبرضو بعد هذا كله الناس ما ترحم
وكأنها تلمح ليه ما اتزوجت..
هو بكيفي
اذا جماعتي ما هم راضيين فيني لأني مو بمستوى الجمال اللي يبونه
وانا اصلا مو عاجبيني لأنهم متخلفين من وجهة نظري ومو بس انا كمان غيري من صديقاتي لهم نفس هالنظرة..
وبقية اهل البلد يبوني عشان راتبي بدليل ان رواتبهم قليلة او عاطلين..

...........................................................................
اذكر موقف حصل لي انا واختي مع جارة ما تجي للديرة الا من فين لفين..وهي صريحة بكلامها قالت انتو ليه ما تنخطبوا << كنت اقول بنفسي شكل الناس بدت تتكلم عني انا واختي
فذكرتلها انا واختي ان الموضوع نصيب
قالت انا ادري نصيب بس معقول موظفات واخلاقكم ماشاء الله وشايلات البيت وشايلات ابوكم واخوانكم اللي يجونكم بالاجازات ولا احد قـدّر
ولا فيكم عيب ومستحيين ؟؟
قلتلها ولله الحمد ما فينا بلاء ولا عيب بس شروط الجماعه بالديره غير ويوم قلنالها استغربت قالت هالشروط ما هي عندنا..قلتلها ترا بكل مكان هالشروط ما هي فيه..لكن بس عندنا بالديره هالتخلف..يا حليلها قالت انتو بس اطلعوا للناس ويصير خير..

واحمد ربي اني ما اتزوجت اقلها مرتاحه حتى لو كنت مريضه
وعلى الرغم من اني بحاجه له لكن الانسان ما يدري وين الخير له
..........................................

يالله فضفضوا عن انفسكم يا موظفات
17
5K

يلزم عليك تسجيل الدخول أولًا لكتابة تعليق.

تسجيل دخول

وحشتنى امى
وحشتنى امى •
وش اقول وش اخلى هذا انتى موظفه حكومى اجل اللى بالقطاع الخاص وش تسوى المفروض مايحسدونها لانها مو دايمه وكل ماسويت شى قالوا موظفه وعندها راتب ومااسمع الا بكل مجلس وحده تترزز وتصمم كم راتبك ياربيييه وش تبى براتبى ولا تسالى عنه خليها على الله حتى يوم املكت طلع طمعان براتبى ويبيى اسدد ديونه وفركشت الزواجه ابى رجل يسدنى ولا يكون عاله عليه بس وسلامتك ترى كل الموظفات طايح حظهم وربى اللى جالسه بالبيت تلبس وتكشخ وعندها ذهب احسن منا والله يعطينا خير هاذى الدنيا ويكفينا شرها
a7la-fashion
a7la-fashion •
ههههههههه ابي اتوظف واللي يطمع يطمع
العنود 1405
العنود 1405 •
اااااااه ياختي جبتيها ع الجرح والله مثل ماقالت اختي ماشاء الله تبارك الله انتي حكوميه مو مثلنا قطاع خاص ( اللهم لا حسد ) بس انا الشركه اللي فيها داخله من تبع ارامكوا يعني ماشاء الله راتب ماعليه كلام والحمد الله ع كل حال والله ان اقرب الناس لي حاسديني ع وظيفتي وراتبي مع العلم انهم موظفين وموظفات بس الراتب يفرق والله انها جاني حسد قوي منهم لدرجه اني صرت تعبانه مره ودائما يطري علي الموت لا والمشكله اذا جاني خطاطيب سئلو عن الراتب بعنبوهم يوم انهم ماهم قادرين يفتحون بيت ليه يعرسون دام الحرمه اللي بتصرف على نفسها طيب ماختلفنا تصرف على نفسها في اشياء لها وخاصه ماهي ملزومه انها تصرف وتحط بالبيت .... اذكر وحده من قريبنا هي ماشاء الله معلمه وزوجها قطاع خاص وتعرفين الراتب غير تخيلي انه يعتمد عليها في كل شي مصروف للبيت وغيره مااقول الا الله يصلحهم يارب يارب ياكريم انك ترزقني الزوج الصالح اللي يسعدني ويقوم فيني ولا يطمع براتبي يارب ياكريم
سنا بدر الدجى
سنا بدر الدجى •
العنود 1405 العنود 1405 :
اااااااه ياختي جبتيها ع الجرح والله مثل ماقالت اختي ماشاء الله تبارك الله انتي حكوميه مو مثلنا قطاع خاص ( اللهم لا حسد ) بس انا الشركه اللي فيها داخله من تبع ارامكوا يعني ماشاء الله راتب ماعليه كلام والحمد الله ع كل حال والله ان اقرب الناس لي حاسديني ع وظيفتي وراتبي مع العلم انهم موظفين وموظفات بس الراتب يفرق والله انها جاني حسد قوي منهم لدرجه اني صرت تعبانه مره ودائما يطري علي الموت لا والمشكله اذا جاني خطاطيب سئلو عن الراتب بعنبوهم يوم انهم ماهم قادرين يفتحون بيت ليه يعرسون دام الحرمه اللي بتصرف على نفسها طيب ماختلفنا تصرف على نفسها في اشياء لها وخاصه ماهي ملزومه انها تصرف وتحط بالبيت .... اذكر وحده من قريبنا هي ماشاء الله معلمه وزوجها قطاع خاص وتعرفين الراتب غير تخيلي انه يعتمد عليها في كل شي مصروف للبيت وغيره مااقول الا الله يصلحهم يارب يارب ياكريم انك ترزقني الزوج الصالح اللي يسعدني ويقوم فيني ولا يطمع براتبي يارب ياكريم
اااااااه ياختي جبتيها ع الجرح والله مثل ماقالت اختي ماشاء الله تبارك الله انتي حكوميه مو مثلنا...
امين يارب العالمين

ليتهم يقدرون ان الحياة تعاون
لا والله ما غير نتكل على الحرمه ويا ويلها لو تكلمت

حسبي الله عليهم

حتى وحده من خوياتي يومننا قعدنا نحكي عن السواقين قامت تتكلم عن سواقهم

قسم بالله تقول يوم ركبنا معه يوم من الايام لقينا عيونه حمرا ويقول ان العيار عندي زايد حبتين ويا دوب اشوف الطريق..طلع الاخ سكران..
غير المصايب والبلاوي اللي سواها معهم
وغير ان معه مسدس ورشاش..بالله وين الامان اللي الكل حاسدنا على رواتبنا

وحتى لما يغيروه ما يلاقوا احد يرضى يوديهم
ولما لقوا طلع كمان محشش

ويالله بالعافية لقوا مطوع ورفعوا السعر مقابل الامان

ومشكوراااات على المرور
ليالي الحنية
ليالي الحنية •
يحليلك يا سنا والله انك جيتي على الجرح << متعينه بقرية ومتغربه الحمدلله على كل حال اي والله

بالنسبة للخطاطيب عندي قحط من كم شهر لا عاطل ولا صاحي ولا غيره مدري وش فيني :(

مع اني جميله الحمدلله ، بدون غرور ، بس قحط بهالسالفة مع غني والله العظيم ناقصني اشيا واجدة

مايكملها إلا الزواج ، بس مسألة يجيني عاطل ما بقا إلا هي :06:

يختي اصوم اصوم وافطر على بصلة اهئ اهئ اهئ اهئ ، يختي مايستحي اللي يجي يخطب وهو لا وظيفه ولا

شييييييي ؟؟؟؟؟؟؟؟؟؟ وجع ان شاء الله يعني يقول مدرسة وعمرها 30 بتقبل فيني ومابتصدق على الله ايييييييه يالدنيا

الله لا يحدني على عاطل ولا واحد راتبه قليل ، يختي ابي رجال يقوم ببيته مثل خواني المتزوجين :16:
ماشاءالله لا إله إلا الله أظن لو واحد منهم قالت له حرمته بصرف على البيت غير يسطرها ،

يابخت حريمهم بس ، الله يستر من هالرجال ، انا ديني ودين الرجال اللي يعتمد على راتب مرته وهو لا

اخلاق ولا مال ، وبعضهم عنده قروش بس بخللللللللل الله لا يبلانا بسسسسسسسسسس

طيب انتي يا سنا كم عمرك ؟؟ بخطبك لأخوي بس تراه عاطل :35:

ههههههههههههه امزح

لا جد كم ؟؟