يازين الطيبين

هاقصه قريتها وحبيت انقلها لكن,عشان توسعن صدوركن
وحدة تقول :
الله يرحم زماننا تراي اقولكم قصتي وانا قريبة عهد ولكن للأسف الجهل
..
الكلام تقريبا عام ١٤٠٨هجري
عمتي اصغر مني وساكنه معنا وهي قعدة جدتي ومدللتها جدتي
يعني اذا الدنيا برد ماتصحيها جدتي للمدرسه تغيبها..
واذا ماشبعت نوم تخليها..
اخذه راحتها
وانا وخواتي اهلي قدسية الدراسة عندهم ..
محرّم الغياب😢😢
ملت عمتي وفصلت عن المدرسه من يوم هي برابع
وانا كل سنه اعيد السنة ...
مشكلتي اكبر خواتي وماكان احد يدرسني يوم صرت بالمتوسط واثري انا اكبر من اللي حولي فرفضت ادرس انتظام
درست المتوسط (منازل) وكالعاده مافلحت انتظام بابتدائي
افلح منازل😢😢
كان تذكرون نظام المنازل ....
كبرنا
وعمتي فنانه بالخياطه تخيط فساتين لبنات الجيران والاقارب
وجاء يوم قالت أمي ان فلانه بنت الفلان بتتزوج وان امهم تعبانه وقالت : (اغديس) يا ام فلان تتكفلين بجهازبنتي و تراها نفس مقاس بنتك فلانه اللي هي أنا😳😳
وماشاءالله الاقمشه تجي والعمه تخيط وانا اقوس بها الفساتين
والجزم اعزكم الله
والبلايز والتنانير والتيورات يوم طور التيورات تشرى ..واقوس واذا صار المقاس يرفع
بغرفة السطح
وانا ياغافل لك الله اطارد بالحوشه والغبره و ياما حلبت البقره بالمزرعه و ياما ناديت بنات جيراننا نلعب بشحنة عند باب اهلي وسط المزرعه
والله ماازيدكم ولاحرف انه هذا الحاصل
وكان لاهلي
ديوانيه كبيره بطوالع بريده وحوش كبير..
قالت عمتي ان زواج بنت الفلان بيحطونه بديوانية اخوي
الي هي ديوانية ابوي
معنى الكلام
اننا ننروح اسبوع
كلنا (حملة )ننغسل الزوالي ونكنس ونغسل الحوشه والممرات جهة الرجال والحريم
والله وانا اتصدرهم بالكرف
غسلنا كل الزوالي وننشرهن بالحوش باقي اسبوع على العرس
🍃🍃🍃
بعد كذا يوم
قالت امي ان العرس عقب يومين
واقوم انا وخواتي وعمتي و( نمتر)الحوشه نغسلهن والحمامات والممرات والعمومه يركبون عقود الانوار ويصلحون اللي خربان من النجف ويشيكون على خلاطات الماء
ما أدري وراه مايجيب عمال المزرعه يغسلون وينظفون 😡😡
جهل او سنع بنا بزود
المهم كل شئ سويناه لو هي المعاميل جليناهن وجهزناهن لايصيرن هاجرات..
ابد قبل العرس بيوم
جاء القهوجي وحريمته واقوم انا و امي و نستقبل حريمته ونقهويها ..
جاية تتشوف المحل الي بتطبخ بُه القهوه والشاهي
يوم صار مسيان ويجون خوالي وخالاتي وجدتي
يوم صلينا المغرب وتنادين
امي بغرفته واثر جدتي من امي على طرف سرير امي وتقعّدن بجنبه☺
واميمتي الله يجعلها بعلييين
تعبط بيدياته ماتدري وش تقول
قالت جدتي الله يحرم وجهها عن النار
قالت : ماشاء الله يابنيتي
تدرين انتس كبرتي والبنت لاكبرت ماله الا الستر وستره تزويجه
وانتِ
باتسر ان شاء الله عرستس على ولد الفلان
ولاودنا نضيق صدرتس نعلمتس قبل بوقت طويل
واميمتي تعبط بخشيشته تداري عبره خنقته😢😢
واخم امي 😱😱
واقعد اصيح واصيح واصيح وخبري اني اصيح
ماصحيت الا الصبح
بسرير اميمتي نيمه
الحمدلله ليلة مباركه نومة طيبه
كرف وفضى رأسي من الصياح
نمت نومة سنه
واصحي واسترجع احداث البارح
يعني الليله عرسي
وشوشتي الطايره
وشطوبي الله يكرمكم
وشهابتي
لوبي دسامه من قبل راحت من كرف الاسبوع بالديوانيه😢
خدي متشقق من شخف الهواء
ياربيه مادري منين ابدأ 😭😭
واقف قدام المرايه واصيح
وين وجهي 😭وانا امس استقبل القهوجيه
واستقبل خالاتي وحريم خوالي
وطول الشهر اللي راح مغير أقوس الفساتين والملابس😭
وترقى امي معه خبيزة لي مااشتهي بس استفرغ من القهر والصدمه
وتغصبن
وتجيب لي الليفه البيج الخشنه وجليسوليد الاحمر الحلو الثقيل
قالت ادخلي تروشي وتدهني بالكريم كل جسمك علشان الا جا الظهر تشوفين جسمتس
واصير كالدميه بالدبره من الصدمه انفذ مايملى علي
واتحلس واتملس ويجون الضيوف ويمتلي البيت
بس احسن مابهم
مااحد يشوف العرّيسه ولا اقرب الناس
الا أمه واللي بتمكيجها وتسرحها
طبعا كوفيرتي
بنت جيراننا فنانه بهالامور
جت مع اذان المغرب ومكيجتني وسوت لي تسريحه النفخه مافي غيره هاك الوقت 😂😂
والعيون كافخه من الصياح تقل جمره
وكبدي تحوم والنفسيه دمار
ويذن العشاء
والكحل يسيح من الصياح ويعاد
وعلى السالفه
وتجي جدتي وتعطين العلم الجامد ويبدأ قلبي يوجعن من الروعه
😱😱😱😱
بديت افكر صدق من هو العرّيس ؟؟؟
امس من الصدمه ماسمعت من هو ؟؟ومن ولده ؟؟
تخيلتوا بيدخل مادري من هو
واسال بنت جيراننا واشوى صارت تعرفه وتعلمن من هو
مافي مجال اقبل او ارفض ...
خضوع متناهي
كل الامور مفروغ منها ماعلي الا الاستسلام
والحمدلله
تزوجنا ووفقني ربي
وهاأنا اكتب لكم وزواج بكري ووحيدي من الذكور
وجمارة قلبي
باول الاجازه
والحمدلله ماضرتنا
الشهابه ولاالشوشه 👰🏻

يازين الاوليين