الله يكون في عونتس..
الغربه ...هي عجز الانسان عن فتح ذهنه والبحث عن مصادر اخرى للتواصل مع ذاته قبل التواصل مع الاخر..
اقول كل هالوقت صلاة جمعه ببريطانيا؟؟؟؟؟؟
عودي فقد ملت اعيننا الانتظار ..ولا عندكم ويك اند وطالعين ..؟؟؟؟؛<<<<<لقافه

هي بتجي شووي
احتروها تجي قبل صلاة الظهر عندهم :) يعني الصبح عندي يالله نحتريتس

:3_10_6:
الحكاية ويك اند اكيدة الجماعة طالعين :hhheart:

ننتظررررررررررررررك :S_45:

أي والله ويك اند يااخوات....

أما كان ويك إند:)


خرافي ياعالم...


خلوني اهرج لكم شوي عن الويك إند وبدّورة لما تسمع بالويك إند...........ز


..............................



يقولكم كان ياماكان ....وكنا بالفندق اول ماوصلنا برايتن وكان خميس ليلت جمعة...


خبركم كنا ساكنين بمنطقة كلها كنايس وانا كلما طلعت نتمشى والا كنيسة سانت جورج مدري سانت بول واطالع في بناءها واحجارها وتاريخها واللوحات المحطوطة عليها...


بيني وبينتسن انا مهتمة بتاريخ اوربا القرون الوسطى...(منتيب سهلة ياقرون الوسطى:) )


المهم ويجي يوم السبت وكنا ندوّر شقتن نسكن بها ويوم أنشد أبونا قلت يالله نروح ندور شقة...


قال لااليوم معزّلين ويك إندهم ...

قلت ايييييييييه أجل معزّلين....وتنبت براسي هالويك إند وانا وياه نهز روسنا في الشارع ولا مابه احد ...



تقولون يوم خميس .....!!!!

عاد يوم انها جات الصدقية وجا يوم الاحد واجهش الساعة حدش واقوله قم قم خل تلحق الخطبة والصلاة ...



وهو يقوم يفرّك عيونه وشهي خطبته أنتي وخشتس....!!!!

هني أحسبنها يوم جمعة هماها ويك إند....وراح مخي بعيد...!!!
............


والله تبي تقولون تبالغ إن هاذا الي صار ....


عاد يوم اني من الحماس قلت ميخالف قم هز طولك وخل نتمشى نشوف وشلون يوم جمعتهم مدري يوم صلاتهم قال ابد ولايهمتس تبي تشوفين من هالكنايس لين تشبعين ....


ونطلع عاد وتلاقينا الكنيسة اول مرة اشوفها مفتوحة وتبدا اجراسها تقنقن ولامابه حولها مخلوق...

الا تسان عجيزن متعنقدتن بشايبها وتعصلب هي وياه يبي يرقون الدرج حق الكنيسة...


ويالله العمل الصالح به شيبان وعجزن قاعدين يتمرنون وقت الصلاة !!!!!!!


هيامال الحراويل ماحنطت التمارين والتمغط الا وقت الصلاة ؟؟؟؟:)

عاد أنا وانشد رجلي اقوله ذولا وراهم ماراحوا يصلون عساهم البلا؟؟؟؟


قال لي ياحبي له ههههههههههههههه ذولا الله يعافيهم ولايبلانا....مهوب لم دين ولاصلاة ولاعبادة...


وأصلا عن كلام رجلي (مدري هو صدز ولاتسذب عاد) إن برايتن موطن حزب العمال....


ورغم كثرة الكنايس فيها إلا أن المتدينين فيها عددهم قليل ....



وبشهادة وحدة من مسلمات برايتن تقول ان حتى الكنائس ماتشهد اقبال من المصلين للأسف....

بكل اسف مافي اي ايمان حتى ولو كان ايمان بالنصرانية ....


لكن....


والشهادة لله.....


حتى الآن تعرفت على ثلاث بريطانيات من برايتن....حديثات الاسلام...


وحدة لها ست شهور...والثانية لها شهرين.....والثالثة في طور التعلم لسه مابعد اشهرت اسلامها....


علما بأن جهود المركز على قدهم وبقوة....وامكاناتهم اقل من قليلة....ومسجدهم مايزيد عن شقةةكبيرة مقسومة نصفين للرجال وللحريم...


ومع ذلك فتعامل المسلمين الصدوق واخلاقهم الرفيعة (كثير منهم طبعا ولايعني هذا عدم وجود استثناءات) ادى الى ان ياخذ الكثيرين منهم فكرة حسنة وطيبة جدا عن الاسلام ....



شفتوا كيف ؟؟؟



عاد هذا كله طرّاه الويك إند وصلاة الجمعة الي يوم الاحد..




يتبع ياحبايبات...

عاد انها مورين يوم شافت قرامتي وسنعي وانحرجت مني ومن حوسته قلت شوفي ياخالة....


قالت لي سميني أم ويليام الله لايهينتس..


قلت يام ويليام ترا حنا بالسعودية تسذا...خادم القوم أصغرهم...

ولاننحرج أننا نقدم المساعدة للكبار لأن هذا مايفترض إنا نسويه (هذي قلتها لها بانغليزي فصيح)...
:)

قالت أجل تساعدين أمتس بالبيت قبل تاخذين أبوكم؟؟؟


قلت إيه أجل....أجل أخلي أميمتي هي اللي تكرف وتنظّف؟؟؟


قالت إيه ....بنت أختي يامال الحراويل ماتشيل العود من تحت رجلها وهي أنشط من الناقة ...


وامها هي اللي تكد وتشيل وتحط بس إن أمها عاد أنشط مني...


مهيب ثاويةٍ زيي يعين...



قلت ايه يام ويليام الله لايخزينا .....تخلي امها تكرف زليلت الصلاح ؟؟؟؟

قالت ايه زليلت الحيا....

قلت وبغضب :

لالا ياام ويليام....لو الدنيا تسذا كان خربت...


شوفي ياام ويليام...أنحن عندنا مبدأ في الإسلام....

إنك تعطي لتأخذ...وتمنح لتحصل...

والأم والأب يربون عيالهم وبناتهم عشان ينفعونهم بعد عمرن طويل...


ولا أجل ليه أنجب وأتعب وأربّي عشان أهيّت عيالي عقب؟؟


ونعيد ونزد على مشكلة القانون ....ولما يجي القانون ويغفل جانب العاطفة من أجل المصالح ...


القانون في الدول المتحضرة عموما وبريطانيا خصوصا يهتم لحقوق الطفل باعتبار إنه تحت وصاية الوالدين ...


لذلك تكرّس الدولة كل جهودها من أجل تربية جيدة ومواطن صالح وبس...


لكن ماذا بالنسبة لحقوق الوالدين؟؟؟

وحقوق العائلة....؟؟؟


هل فيه قانون يحمي الوالدين او يلزم الابناء بأي التزام تجاه الوالدين؟؟؟

أيضا نرجع نقول لا...مافي....


كلمت مورين وهرّجتها كثير عن الشغالات وقالت لي ايه لحقت على زمن الخادمات وكانت عند اهلي خادمة (ميد)...

بس عقب ماصار لهم وجود وتقدرين تقولين ان تغير الاقتصاد بعد الحرب العالمية الاولى غير طبيعة الحياة البريطانية تماما...ومن ضمنها وجود الشغالات...


قلت لها حتى أنحن يامورين تبي تغيّر حياتنا....ونبي نستغني غصب عن الشغالات...خصوصا الجيل المتحضر زيي...


هزت راسها وقالت أجل انتي متحضرة؟؟؟


منين تجيني الحضارة وانا يوم ألقى غسالة لهدوم الفول اوتوماتيك (فول !!!!!:) )


وان ااطالعها ...عاد الحق يقال انا عارفتن انها غسالة فول اتوتماتيك قد شفتها في بيت اختي الكبيرة....


بس اني اعرف استخدمها لاوالله ...

عمري كله على غسالتن عادية أم الحوضين حقت اشطف ونشّف همن انشر....

لاواحمدوا ربكم كان المحروس يبي يجيب لي غسالة البابطين أم عصاقيل ذيك اللي تعصر الهدوم عصر ...


تعرفونها؟؟



اللي تقول طاطاع..طاطاه...اللي يوم اني اول ماولدت....


الله يازينها وزين صوتها....


هيهههههههه.........!!!!

بس ربي نصرني عليه وماعاد صاروا يبيعونها....


وجاب لي ام حوضين...

المهم ....اني ماقد استخدمت فل اتوماتيك ولااعرف وشهي من لحية...


ويوم اني اشوفها واطير من الفرحة قلت اخيرا ماعاد انا منشفة ولاكاوية ولاشي بس احط خلقاني وتطلع بدقيقة نظيفات (كذا كنت متخيلتن الدعوى:)...!!!)


عاد يوم اني من الحماس قمت كبيت الشاهي على بلوزتين وحدة لي وحدة له...

ومير ادحشهن في الغسالة واضغط الزر على طول.....أحسبن صابونها منها وفيها....

أبونا ماكان موجود ولاتسان قال لي اعقلي وناظري التعليمات قبل تستخدمينها...


انا من الهبال حطيت الهدوم مع ورقة التعليمات واضغط الزر وتبدا تقول عررررر


والاها تعبي موية...قلت انا ياسلاااااااااااااام ....تعبي موية من نفسها....اجل اكيد تعبي صابون من نفسها :)....

المهم ومير اتذهن وقلت يابدورة ...هلحين الموية تجي من الانابيب اللي موصلتن بها ....

بس مااخبر به انابيب توصل صابون....!!!


مير اتحمّد واقوم اجيب شامبو حق الفندق ( :) ) وافتح الباب وعيا ينفتح !!!


واحزني انصكت الغسالة على هدومي هذي الورطة عاد انا منب خايفتن على هدومي اخاف الغسالة تخرب وانا مابعد تهنيت بها....!!!!:)


المهم وتقعد دقيقة وينفتح الباب
(أمان ضد الاطفال شوفوا الانغليز ماخلوا شي عساهم البلا)....


ومير ينكب الماء اللي بالغسالة على الارض حقت المطبخ...الفتحة قدامية طبعا...


وارض المطبخ بلاستيك مهيب بلاط ولافيه تصريف...

وياهي الوهقة صدز...واكب الشمبو واطير ادور لي فوطة بمسح المطبخ قبل فوات الاوان...

والا الاوان قد فات ورحتا وطي كله عشان اجرب الغسالة...


المهم قلت ميخالف كل الدنيا تجارب...:)

واضغط الزر نوبتن ثانية ومير تبدا تعرعر ويوم يبجا يطلع هكالصوت وتقوم تقل انها تمخض حليب !!!!


قلت ياربيه هم جايبين لي غسالة ولامخّاضة؟؟؟

عاد يوم إن اللي يشوفني وانا ماغير غازتن خشتي في القزازة حقت الغسالة يقول ذي وش تسوي؟؟؟

ماادري ماقتنعت ان الغسالة تغسل بهالكمية القليلة من الموية ....متعودة اطفح واشوف الهدوم طافحتن موية....


عاد المهم ورحت اشوف هكالساعة المحطوطة في الغسالة وانا مادري هي وشهي هي موقّت هي كونترول مدري وشهي...


اثرها تختارين البرنامج حسب نوع الهدوم....


وانا ماغير طق...طق ....طق..


واطالع الساعة مرت نص ساعة انا عادتي ربع ساعة تكون غسالتي مخلصة الدورة حقتها....


هذي وراها عيت تقضي؟؟؟

وياما طقيت الأوف...وأون....وياما فرّيت الساعة والتعليمات جنبي بس من العجز لااقراها...


يوم اني فرّيت الساعة اخيرا على رقم سبعة وتبدا الغسالة تطلع هكالصوت....



وننننننن...


تسنها طيارتن تبي تقلع وتبدا تهز الارض تحتي قلت واحزنييييييييييه جانا صدّام....!!!!:)


واقوم من الوهقة قلت لابوك لابو هالبلوزتين وادوّر ورا الغسالة وأمعط الفيش ومير تركد وترجهنّ..


وتقولين يابدور متحضرة لمورين...؟؟؟


قلت ايه متحضرة غصبن عليتس...أجل اخلي حرمة غريبة تقوم ببيتي وقدام رجلي انا وش سنعي أجل؟؟


عاد الشهادة لله إنها تقول اني قرما وسنعة....

وانها ودها تذوق طبخي الشرقي ( :) )....

ومير أوادعها عند الباب....


ووعدتها خير وقلت لها إن شالله بزين عشا والدين مرقوق على لحيمة حاشي وقفر وقرع....

وبروّح لتس ان شالله...





وتخلّص ....


وتملّص....


وتركب حميّرها...


وتزنّط...


عاد ان شالله اني بكتب لكم مذكراتي ومواقفي المضحكة والمهسترة في مواضيعن جاية...


ولكن تابعوني بارك الله فيتسن...


واتمنى القصة تكون حازت اعجابتسن.....


و.....



وأحبكم ...احبكم ...أحبكم....:)