طبعاً الحين انا تمرست بهالطبق بس حبيت اعرض لكم صور اول مرة اجربه فيها لان حقيقة استانست اني ضبطته .. زوجي دايم يقول طبخيها وطبخيها لمن دورت بالقوقل عن طريقة عملها .. والحمد لله استانس عليها من اول مرة ..
اخذي اللحمة وغسليها وطهريها .. وسلقيها .. خليها مدة ساعتين عشان تستوي عدل ..
تالي لمن استوت رفعيها .. وسوي صلصة اللبن .. حسب اللي انا سويته .. اخذي كاس روبة وخلطية بالقوة بالشوكة لمن تحسينها صارت ناعمة .. وتالي حطيها في قدر واضيفي لها كاس من ماي سلق اللحمة .. واضيفي ملعقة دقيق وفلفل اسود وملح وشوية زيت زيتون .. وتالي حركيهم على النار لمن يثقل اللبن ويصير مثل الصلصة ..
تالي حطي اللحم المسلوق عليه وحركيه على النار .. وتالي قصري النار وخليه مدة ربع ساعة بدون ما تغطين الجدر ..
سوي رز ابيض عادي .. واذا استوى خلاص نجبي بطريقة معينة ..
اخذي صحن التقديم وقطعي فيه خبز وتالي صبي عليه من صلصة اللبن ..
وتالي .. نجبي عليه العيش الابيض .. وحمري شوية بصل وصنوبر ,, وحطيهم على الوجه مع شوية كزبرة وفليفلة حمراء ..
وتالي في النهاية اضيفي اللحم فوق العيش وخلي الباقي في بادية اذا حابة تغرفين منها اللبن وتاكلينه ..
وبالهناء والعافية ..
وعلى حسب نصيحة زوجي .. جهزي السرير بعد هالأكلة مبااااااااااشرة ..
وتحياااااتي الشهزلانية