ياليتني ما تزوجت / تم الرد + قديم

يابنات اقرو قصتي واعطوني رايكم

كنت صغيره يمكن عمري 16 فجأه بدون مقدمات خطبني شاب والزواج ما كان على بالي ابد كنت مستمتعه بمراهقتي وما كنت اعرف معنى الزواج وتمت الخطبة بضغط من ابوي وامي بس ما فكرت بالموضوع لحضتها لان اهلي شرطو يكون الزواج بعد اربع سنوات ووافق الخاطب وعشت ثلاث سنوات مراهقة ممتعه جدا وفجأه صار لازم اتزوج وكرهت نفسي وكرهت الزواج .
زوجي : موظف مرموق ، وغني لكن عاادي الشكل بس جذاب شوي لكن مو على ذوقي ابد ابد ، تعليمه فوق الجامعي (ماجستير) مثقف جدا ومتحدث بارع ، عمله يستقطع جل وقته وهو اصغر اخوانه واخواته بس ماهو دلوع ابد . يصلي ومحافظ ، رغم انه مو متخصص في الدين الا اني معلوماته معلومات شيخ ، يعرف كل شي مشاء الله عليه ، دمه خفيف ولبق ، ما يبخل على نفسه ولا على عياله ، علاقاته مع الناس ممتازه والكل يثني عليه ، سمعته ممتازه مرره ، نسيت اقول ان عمره 33 ماهو رومنسي ابد وما يمدح الا نادر اذا كان زعلان يخوف بس يهدا بسرعة . علاقته مع اهلي ممتازة ورافع راسي عندهم اي شي يطلبونه يسعى فيه ويرفع راسي وابوي مستانس عليه ويشوفه شي كبير ودايم يقول هذا الرجال والا بلاش .
انا : شهادتي ثانوية وادرس الجامعة ، جميله جدا ، ما عندي اسلوب نقاش واهتماماتي اهتمامات طفله وعالمي لازال عالم المراهقة ، ما احس اني رومنسية ولا احس اني جلفه ، ذكيه بس كسوله ، ما احس اني مرحه بما يكفي ، علاقاتي الاجتماعيه محصروة في عائلتي تقريبا ،صديقاتي يحترموني كثير .
حياتنا : زواجنا كان تقليدي ونتج عنه طفلين ، نعيش في بيت مستقل وعندي سواق وعندي خادمة ، بلا مبالغه اي شي اطلبه (ماديا) موجود ، وما كنت متعوده اصرف بتذير (نوعا ما) الا مع زوجي مع ان اهلي اغنياء بس ماكنت متطلبه ولا كنت اهتم اشتري اي شي . لكن مع زوجي وكرمه الزايد صرت اشتري واشتري واشتري اللي ابيه .على سبيل المثال خلال سنه غيرت اثاثي كله تقريبا مرتين مرره كلف سبعين الف والمره الثانية حول المية هو حريص علي وينفذ اغلب طلباتي ، غالبا حليم بس يعصب ويصير يخوف لكن بالمجمل صبور ويتحمل، ما يسولف في البيت كثير ولا يجلس اصلا كثير واذا جلس يكون على الجهاز يشتغل ويشتغل ويشتغل ما يمل ، وانا طفش احس اني اعمل مع شخص في مكان واحد مو متزوجه شخص ويجمعنا بيت واحد . يصير بينا مشاكل متقطعه ، وغالبا على ترتيب البيت والاعتناء بالاطفال ، انا مهمله جدا والبيت دائما مكركب واطفالي بصراحه احرص عليهم بس اتعب واطفش منهم احيان واهمل حتى رضعاتهم ، ما اطبخ الا وجبه واحده في اليوم وغالبا الوجبه هذي ارسل رساله اعتذر منه ويقوم يجيب من المطعم ، انا ما احب الاكل كثير وعادي لو بس كيكه او ببسي وتوكس وتمشي اموري ، وهو يحب الطبخ ولا ياكل (السناك) لكن انا ما اطبخ واتعذر وغالبا يقدر الوضع ويمشيها .حياتنا في غرفة النوم رتيبه جدا ، ولا اعطيه ادنى اهتمام وبالنسبه لي الموضوع تأدية واجب لا اكثر،و بالعكس اغلب وقتي احب انام في غرفه الجلوس او في الصاله وهو ما يعلق ابد اذا شافني مطنشه يطنش لو بالاسابيع ولا يسأل ولا يعلق ولا يقاطعني يعني نتكلم ونسولف عادي ونضحك والحياه تمشي كما هي رغم اني انام في مكان وهو في مكان برغبتي انا مو هو !
المشكله : زاد اهمالي مؤخرا وتهاوشنا هوشه كبيره قام طقني ووداني اهلي في الشرقية رماني ولا سأل ولنا الان سته اشهر ، يمكن انا غلطانه بس هو برضو مقصر ما يجلس معي وانا احس المشكله مو هنا ،، المشكله ماعري حبيته ولا احس تجاهاه بشعور ابد ، رغم انه طيب مرررررررررررررره وجنتل ، لكن انا لا اكرهه بصراحه ولا احبه عادي يعني ، افتقده اذا غاب واشتاق له بس احسه عادي اشتياق شخص لشخص عايش معه وفقده .

طبعا الان هو مطنش وانا مطنشه عند اهلي ومرتاحه ، لاعمره ارسل لي ولا عمري ارسلت له ولا كلمته ، يجي مرره في الشهر يشوف عياله ويمشيهم ويحطهم ويروح .اهلي يحاولون يصلحون الموضوع بس احس مافيه حماس مني وهو الله اعلم ما عنده حماس بعد وشكله ارتاح مني ..
بنات هل احاول اصلح الموضوع والا اتركه ، لاني اخاف اظلمه معي انا ما عندي شعور تجاهه ولا شعور تجاه احد يمكن طبعي بارده ولا يمهني شي .. واحس اني مظلومة معه وانحرمت من مراهقتي وشبابي وبسرعه صرت ام ما امداني اتهنا ،،

وش تنصحوني !