ياناس انا غلطانه والا اخوي

الأسرة والمجتمع

السلام عليكم ورحمة الله وبركاته
ترددت كثيرا قبل ان اكتب مشكلتي ولكن القلب مرض والروح ذبلة
فتذكرت اخوات لي في الله لربما طابت نفسي وابعدت عني شبح تانيب الضمير والافكار السوداء

قبل حوالي سنة جا اخوي وطلب مني اطلع رخصة باسمي علشان يفتح مشروع

وافقت لكن بشرط انه بعد فترة من عملة ويبدا يدخل دخل من المشروع يعطيني راتب (لانه بيحرمني من الوظيفة بسبب الرخصة )
رفض وقال مو من حقك؟؟؟؟؟؟؟؟؟
بعد اسبوع جا اخوي لزوجي يشتكي مني وطلب من زوجي التدخل وافق زوجي انه يتدخل بس بشرط انه بعد سنه من فتح المشروع يبدا يعطيني راتب وما حدد قيمة الراتب قالة حسب شغلك وكرمك مع اختك
وطلع اخوي من بيتي راضي وموافق على كل الشروط........

الان بعد مرور تقريا سنه تفاجانا انا وزوجي بانه اخوي ناوي يشارك واحد ثاني ويحط باسمه المشروع
اتصل علية زوجي وطلب يشوفة لانه بيتاكد من الكلام اذا صحيح والا لا ....

يوم جا سالة زوجي .... صحيح بتنقل المشروع باسم واحد ثاني ؟؟؟؟
رد اخوي ايوة لكن مو اكيد .....
طيب واختك؟؟؟؟
عادي ما بتزعل.. وبعدين تبغى الصراحة انا كنت ناوي اعطيها راتب من فوق خشمي ( يعني غصب ) ( بالعربي ماهو موافق يعطيني راتب )
قاله زوجي والاتفاق اللي بينا قبل سنه ... وموافقتك على كل الشروط
قال والله جايتني فايدة لية تزعلو.. والصراحة اختنا وطت راسنا يوم طلبت راتب منا احنا اخوان كيف تطلب فلوس
قالة زوجي بصفتها المسؤلة قدام الدولة عن العمال وعن المشروع يعني اي مشكلة هي اللي بتروح فيها وممكن تنسجن مو انت
قالة اخوي هي مجرد اسم ما دفعت ولا ريال
المهم انهى زوجي معاه الكلام وما حب يتطاول علية لانه في بيته وقالة روح انقل كل شي عن اسم اختك
طبعا امي وابوي واخواني الباقيين زعلو وقالو اني طماعه واني وطيت راسهم (والله هذي الكلمة قطعت قلب وحسيت قلبي يومها بيتوقف) وزعلو مني وتكلمني امي وهي تبكي
ابوي ما تدخل حتى ولا حاول يحل الخلاف ( قلت انا كذا احسن علشان زوجي يعرف انه امي وابوي مالهم دخل في الموضوع )
المهم يوم راح زوجي ينقل كل شي باسم الشخص الجديد للاسف اكتشف زوجي انه وحدة من قريباتي وماهي شريكة لا نقلو كل شي باسمها لانها ما راح تاخذ منهم ولا ريال
والطامة الكبرى كان ابوي في المكتب
انا طوال اسبوع كامل كنت اقول لزوجي امي وابوي ما تدخلو لانهم مالهم دخل لا تدخلهم في المشكلة بينك وبين اخوي الله يهديه خرب كل شي هد الدنيا على راسي
طبعا زوجي انصدم يومها وجاني زعلان قال شوفي بيت اهلك بعد كذا منتي رايحة واخوانك انسيهم مو انا اللي اتفق مع رجال ويخونوني ..................
ولان الرخصة اللي انا مطلعتها باسمي طلعت الفيز وبعتها وربحت فيها ولله الحمد
يوم عرف ابوي قالي اصلا العمال مو من حقك ولا يحقلك تتصرفي ولا بعامل منهم .... وكلام كثير جارح مالو داعي اكتبة
انا مو زعلانه على فلوس او اي شي
انا زعلانه على معاملتهم لزوجي وخيانت اخوي له ويشهد الله انه زوجي عمرة ما قصر معاهم كان يدين اخوي ولا يطلب منه يرد الفلوس
كان يطلع سيارات باسمه لاخوي ويتحمل كمبيالات وغيرة
يعني اقل شي يحفظو لزوجي جمايلة
حتى انا ما فكرو فيا
ما فكر ابوي او امي او اخوي انه حياتي ممكن تنهد بسببهم؟؟؟
ما فكرو انه ممكن يطلقني او يضربني او او او.......................................
الان انا ليا شهر ما شفت ابوي ولا امي ولا اخواني
والله قلبي بيتقطع كل يوم
نفسي احضن امي واشم ريحتها
نفسي اجلس في حضن ابوي والعب في شعره ولحيته
نفسي اجلس اضحك مع اخواني مثل زمان
والله وصلت الى درجة كبيرة من الانهيار
حتى دموعي حابستها علشان زوجي ما يتضايق وعيالي ما يحزنو
اخليهم ينامو في الليل واجلس ابكي لوحدي

قسم بالله وصلت الى حد الانهيار التام
يا ناس ارحموني انا بشر
يوم اسمع صوت امي على التلفون احس قلبي بيتوقف
قولولي مين الغلطان زوجي والا اخوي؟؟؟
58
13K

يلزم عليك تسجيل الدخول أولًا لكتابة تعليق.

تسجيل دخول

"قطرات الندى"
"قطرات الندى"
حبيبتي انتي غلطتي يوم أسئتي الظن من البداية في أخوج

باجر اذا زعلتي ويا زوجج وين بتروحين مو لاهلج؟؟؟؟ ما كان لازم تخسرين أهلج عشان فلوس او عشان اي احد حتى لو زوجج

حاولي تصلحي الموضوع بين زوجج وأهلج الدم عمره ما يصير ماي

لي عودة ان شاء الله
كليوباترا76
كليوباترا76
ما ادري انا بعد اقول انج غلطتي يوم طلبتي من اخوج فلوس
يعني انتي ما دفعتي شي من جيبتج عشان تطالبين فلوس حياالله طلعتي الرخصة باسمج
و بعدبن وينها الاخوة يوم الوحدة تطالب اخوها بفلوس مقابل خدمة تقدمها له

المهم اللي فات فات و الحين حاولي تصلحين الموضوع و تبادري بالصلح مه اهلج
جـ:*ـ*:ـوري
جـ:*ـ*:ـوري
الله يعينج وصبرج

بصراحه الطمع أعمى عيونهم ...

لك حق ان يمشي لك راتب اخوك وأسبب الرخصه بسمك ومثل ماقلتي حرمك من الوظيفه ومثل مقال زوجك مسؤله قدام الدوله ... وأعتقد لين يمر 15 سنه يكون ليك معاش شهري طبعا من التأمنيات لكن شهريا ينخصم من مدخول المحل للتأمينات مبلغ معين .. هذا بقانون الكويتي مادري اذا نفس القانون السعودي

أما من فيهم الغلطان ياعزيزتي ... الطمع أعما قلوبهم بصراحه

وانتي المتظرره الوحيده .. وعلى كلامك ان زوجك مايقصر مع أخوانك وهلك ؟ ليه ناكرين الجميل؟

لو من زوجك اسحب نفسي ويشيل رخصه من اسمك ويعتذر من اي شخص لو يبي سلف او مساعده وربي يعوضى الي اخير منه

لكن لاتقطعين علاقتك مع هلك روحي لأبوك وكلميه قولي انا مالي غيركم وبليس دش بينا ...

وخلي زوجك يفهم مهما صار هذولا هلي مالي غنى عنهم قطعه مني ..

أما أخوك من وجهة نظري هو ساس البلا حكم وجوده دايم مع امك وابوك وراح يأثر عليهم ويشوه صورتك انك طماعه ... ولا انتي مالك ذنب

ولله يصبرك يعينك على بلاك
جـ:*ـ*:ـوري
جـ:*ـ*:ـوري
"قطرات الندى"
كليوباترا76

أخواتي

لاتنظرون الموضوع انها مادفعة فلس واحد ؟ اوكي انحرمة من الوظيفه وسبب الرخصه؟ لابد من تعويض يالغاليه :)

للعلم زوجي عرض علي يفتح رخصه بأسمي وقال راح امشي لك معاش شهري علشان ماتقولين ظلمتك وهذا حقج ... وهو رافض أصلاً الوظيفه يعني لو ذكيه وافقة قلت له لا مابي ابي توظف .. حاول يقنعني بعد عمر طويل ان لو غمضة عينه الحلال كله يكون لج ولعيالج قلت هم مابي أبي توظف ... قلت حط الرخصه بإسم إمك ... تدرون شنو رده قال لا ولا يمكن احطه بأسم إمي معنه أمه عنده الكون كله وهي السبب الرئيسي ماتوظف لانها تقول ماعندنا حريم يتوظفون ... سبحان الله قال لا وأسبب حالي ومالي لعيالي ولا افكر ان ادخلهم في مشاكل مع عمانهم؟ كلمته هذي دل انه مايثق بأخوانه قلت هم مابي شوف لك حل ثاني :)
ايشوريه
ايشوريه
الله يعينج وصبرج بصراحه الطمع أعمى عيونهم ... لك حق ان يمشي لك راتب اخوك وأسبب الرخصه بسمك ومثل ماقلتي حرمك من الوظيفه ومثل مقال زوجك مسؤله قدام الدوله ... وأعتقد لين يمر 15 سنه يكون ليك معاش شهري طبعا من التأمنيات لكن شهريا ينخصم من مدخول المحل للتأمينات مبلغ معين .. هذا بقانون الكويتي مادري اذا نفس القانون السعودي أما من فيهم الغلطان ياعزيزتي ... الطمع أعما قلوبهم بصراحه وانتي المتظرره الوحيده .. وعلى كلامك ان زوجك مايقصر مع أخوانك وهلك ؟ ليه ناكرين الجميل؟ لو من زوجك اسحب نفسي ويشيل رخصه من اسمك ويعتذر من اي شخص لو يبي سلف او مساعده وربي يعوضى الي اخير منه لكن لاتقطعين علاقتك مع هلك روحي لأبوك وكلميه قولي انا مالي غيركم وبليس دش بينا ... وخلي زوجك يفهم مهما صار هذولا هلي مالي غنى عنهم قطعه مني .. أما أخوك من وجهة نظري هو ساس البلا حكم وجوده دايم مع امك وابوك وراح يأثر عليهم ويشوه صورتك انك طماعه ... ولا انتي مالك ذنب ولله يصبرك يعينك على بلاك
الله يعينج وصبرج بصراحه الطمع أعمى عيونهم ... لك حق ان يمشي لك راتب اخوك وأسبب الرخصه...
والله يهدي سركم:26: :26: