انا خطيبي - و ابن خالتي - جالي النهاردة في الجامعة علشان ساعات بنتقابل هناك و نقعد شوية مع بعض و كده , المهم قعدنا شوية و كنا حنمشي و بعدين حسيت اني تعبت فجأة و دخت لأني عاملة ريجيم و مش باكل و انا كمان ضغطي واطي , المهم قلتله اني حاسة اني دايخة وقلتله ممكن تجيبلي عصير , قالي عصير ايه و بتاع ايه يلا بس انتي لما تمشي حتبقي كويسة !! , و انا مستغربة اوي و مش عارفة ارد اقول ايه ! , المهم مشينا فعلا و انا دايخة بجد و مش شايفة قدامي و هو عمال بيقولي متمدي شوية علشان احنا كده اتأخرنا ! , و انا مش في حالة تسمحلي اني ارد عليه لغاية ما خلاص محستش بنفسي غير و انا علي الارض و ربنا ستر ان كان في بنات اصحابي موجودين بالصدفة الباحتة قاعدين قريب مننا بيفوقوني ولولاهم الله اعلم كان ايه اللي حصل و جابولي العصير اللي حضرته كسل يجيبهولي ! و لما فقت بقي ببص كده علي خطيبي ملقيتهوش ! , يمين شمال مش موجود , طلعت الموبايل و كلمته و اول ما رد عليا قالي ياااه اخيرا فقتي ما لسه بدري !!!!!!!! انا اصلي لقيتك مفوقتيش بسرعة و الدنيا اتزحمت حواليكي فقلت استاناكي في العربية !!!!!!! انتو متخيلين , و كل ده و انا ساكتة مبردش و قمت قفلت السكة في وشه و قعدت اعيط لحد ما روحت البيت , انا مش عارفة اسيبو و لا اعمل ايه ؟؟ انا قلت لاختي و هي كلمته و قعدت تهزقه طبعا و قالتله :
" انت ازاي تلاقيها بتقولك دايخة و بتتحايل عليك تجيبلها علبة عصير يوم ما تزيد حتبقي ب 2 جنيه !!! وتخليها تمشي و هي دايخة و بتقولها مدي كمان لحد ما خليتها تقع من طولها وبدل ما تحاول تفوقها و لا تشيلها و هي مش تقيلة يعني دي 56 كيلو يعني مش حاجة عيب علي عضلاتك يعني تسيبها كده مرمية و مغمي عليها علي الارض وتسيبها و تمشي يعني مفكرتش لو مكانش اصحابها بالصدفة موجودين قريب كان ايه اللي ممكن يحصل ؟! مش كان ممكن اي ولد من اللي موجودين ما حيصدق ان في بنت دايخة و مش دريانة بالدنيا يستغل الموقف و يحاول يلمسها ولا حاجة ؟! , بلاش مش كان ممكن اي واحد عنده دم و بيحس مش زيك لما يلاقيها كده يشيلها و لا يحاول يفوقها ؟! كان حيبقي شكلك انت ايه ساعيتها لما تلاقي واحد شايل خطيبتك و بنت خالتك و انت واقف بتتفرج ؟!!! , لأ و تروح تقعد في عربيتك عادي و لا كأن في حاجة !! , لأ و لما اتأخرت مش تدخل تشوف ايه اللي حصل و لا حتي تتصل تشوف في ايه ؟؟ , لأ هي اللي من خيبتها اتصلت بيك لما فاقت !! , و أول حاجة تسمعها منك انك تقولها يااااه اخيرا فقتي ما لسه بدري !!!!! يعني بجد انا مش عارفة اقولك ايه ؟؟ , و ماخوفتش عليها و هي لسه دايخة انها تروح لوحدها مش كان ممكن يجرالها حاجة مش كان ممكن تقع وسط العربيات و لا حد يخطفها و يعملها حاجة ؟؟!! , بجد انت انسان مقرف , اعتبر ان مكانش ليك خطيبة قبل كده و انسي انك ممكن تكمل معاها بعد اللي حصل . "
و راحت قفلة السكة في وشه , طبعا هي متدلوش فرصة يرد و عمالة تتكلم ورا بعض و قفلت السكة , طبعا بعد كده مامتي عرفت و بابا وخالتي مامته و خالتي التانية , المهم بقي جالي البيت و كل العائلة موجودة علشان يشرح موقفه , و ده كان كلامه :
" يا جماعة انتم لسه مسمعتوش وجهة نظري , انا من ساعة ما ريما قالتلي انها عايزة تعمل ريجيم قلتلها لأ انتي جسمك حلو كده و مش محتاج ريجيم و مكنتش موافق بس هي صممت و مسمعتش كلامي و عملت اللي في دماغها و قالتلي انها حتي لو هي اللي طلبت انها تاكل او تشرب حاجة بتخن اقولها لأ و امنعها , فأنا افتكرت انها بتمتحني يعني فقولتلها لأ و مرديتش اجيبهولها , لكن انا طبعا مكانش قصدي ان انا مجبلهاش العصير و لا طبعا اني اسيبها لوحدها و هي مغمي عليها ان ممشيتش غير لما شفت ان اصحابها جم يفوقوها , بس انا مشيت لأني بجد كنت متنرفز لأنها مسمعتش كلامي لأني كنت عارف انها مش حتستحمل و كنت خايف و قلقان و مكنتش عارف اعمل ايه , و انا مشيت صحيح لكن انا مروحتش العربية زي ما قلتلها انا كنت واقف في مكان بعيد انا اشوفها منه بس هي ماتشوفنيش لحد ما اطمنت انها ابتدت تفوق و بيشربوها العصير و بعد كده قامت و انا رحت العربية لأني كنت عايزها تعرف انها غلطت لما مسمعتش كلامي و ان انا زعلان و ان انا كنت صح , علشان كده ادتها الوش الخشب لما كلمتني علشان تعرف اني زعلان بس انا مكنتش فاكر انها حتسيبني وتمشي , و كلمت صاحبتها بعد كده لأني كنت عايز اطمن عليها بس برضو كنت عايزها تحس اني زعلان , و صاحبتها قالتلي انها بقت احسن"
و راح سايبنا و ماشي و انا و اهلي حتي مامته كلنا منطقناش و معرفناش نقول ايه , بس انا مكلمتوش من ساعتها و مش عارفة هو اللي زعلان و لا انا ولا ايه اللي المفروض يحصل , قولولي رأيكم في اللي هو قاله اصدقه و لا لأ ؟؟ تفتكروا ده مبرر ؟؟؟ , بجد اسيبه ولا لأ ؟؟؟؟؟؟؟؟؟؟؟؟؟؟؟:icon33:
rema 993 @rema_993
عضوة جديدة
يلزم عليك تسجيل الدخول أولًا لكتابة تعليق.
بالله و انتي طايحة هو وقت يعطيك في درس انه زعلان منك و ما سمعتي كلامه ،، كان جاء اول شي اسعفك بعصير و فوقك و بعدين لما ترتاحي كان يقولك ما يصير تسوي رجيم ،، احس خطيبك بايعيك ، مهما يكون الزعل بينكم ما توصل انه يتركك في الشارع و انتي تعبانة و حتى لو واقف بعيد ، الله يهديه ،، اذا هو دائما كده حركاته نص كم ما انصحك تستمري معاه ،، بس لو هادي المرة خليه يعترف بغلطته و يعتذر و يرجع كل شي زي اول ،،
الصفحة الأخيرة
الله يهديه ياارب