يا جماعة قصة تفطسسسسسس ضحك

هلا والله بالأعضاء .. يا الله ان تحييهم .. وش علومكم .. كل واحد منكم يبعد خشتة عن الشاشه ترى غثتنا ريحة البصل .. والكراث .
المهم انتم تعرفون أن كل واحد له طفولة ... طبعا الطفولة أنواع فيه ناس ألعابها فخمه وفيه ناس كانت ألعابها أغلفة أشرطة أغاني يشيل فيها التراب في الحديقة .. أنا أبقولكم عن موقف لي .. يوم كنت صغير كنت شيطاني ،، بس الموقف فيه شوي بهارات لكن صلب الموضوع حاصل
كنت مطلع الشيب في شعر أمي ومع الوقت وكثر الصبر انقلب شعرها اخضر

(( ذكريات المساخر ))


جلست العب بالكورة في الحوش واشوتها على الجدار بكل قوتي من قوة التشويت اسمع صوت ابو الجيران يقول اهجد يا السبهه لأجي اتوطى في بطنك .. وأنا أشوت والكورة اطلع صوت صرصرة كنها عربانه يبغالها تشحيم وأنا انط نط وأمسك الكورة إذا أرتدت من الجدار ثمن ارجع اشوتها مره ثانية لو للكورة عيون كان بكت وأنا العب جت امي عندي في الحوش وفي يدها نعله وتقول نعنبو خيرك اهجد الشياطين عزلو من بيتنا والسبه انت ما خليت ليلهم ليل ولا نهارهم نهار .. اهجد
ناظرت فيها وقلت يمـه امسكي الكورة ابيك ترفعينها لي عشان أضربها بالراس مسكت امي الكورة وهي تقول

( ابو هديب ) من زين هالراس عشان تسبب له ارتجاج .. ناظرت فيها وقلت كيف
قالت ما بزيناك صاحي نبزاك وفيك اختلال .. المهم وانا امك ابوزي الكورة لك الين تجي العطله .. قلت يمـه كل العيال يجي في بيوتهم عطله الا حنا ليش ما يجينا عطله قالت بلا والله من ثوارتك كل ما جت العطله جيتنا بشهاده مكتوب فيها ربو ولدكم وذاكرو له كل المواد تراه ساقط .. حتى ما يكلفون على أنفسهم يسوون الشهادة على ورق فخم ... دايم يسوونها لك على ورق مطبق :29:

قلت يمه ارفعي الكورة .. ناظرتني وقالت حسبي الله على ابوك اللي يوم جاب لك تكميلة وزارة المعارف عز الله ما جاب لنا خير هو ويا شنبه اللي كنه فلتر لبن
قلت يمه حرام عليك تكميلتي زينه .. قالت لي وهي تناظر بأستحقار وين زينة معه وهي ضيقة مع الجوانب كنك فيفي عبدو .. وإلا هالخطين اللي على الجنب ناقصهم عيون قطط وتصير شارع .. جلست أتلفت على نفسي وأمي تقول ترى اباخذ الكورة وأن طولت الهرج أبشقها .. قلت يمه لا تشقينها تكفين .. ناظرتني امي وقالت أنا لو ابي اشقها كان خليتك تضربها بالراس جعله في شعرك اللي كنه اسلاك شائكه:23:

قالت كلامها ودخلت .. وجلست في الحوش اركض وأنا صاك السحاب حق الغالوقة وطالع وجهي ازرق كنه كدمه في فخذ بزر .. وأنا اركض رن الجرس رحت فتحت الباب لقيت في وجهي خالي متعلق على عروة الباب من قصرة .. تعدل وقالي وش لونك ( ابو هديب ) انشاء الله انك عاقل .. ناظرت فيه وأنا أقول في نفسي الحمد الله والشكر الله رازقني خال طوله كنه ببس العائلة .. وأنا أفكر دخل خالي وقالي وين أمك التفت عليه وقلت جالسه في حمام السونا .. ناظرني بطرف عين وجا عندي وهو يقول ( ابو هديب ) إلى متى هالشطانه ان ما عقلت ابقطع اذنك اللي كنها مغسلة رجال .. هو قال كذا أنا على طول قلت في نفسي لو تقدر توصل لذني كان ما قصرت قطعتها .

دخل خالي وصكيت باب الشارع أول ما صكيته سمعت صرخة .. صرخة كلب مطقوق بنعال الين قال ربي الله شوي فتحت باب الشارع لقيته ولد خالي ( محمد ) جالس يصيح عند الباب وهو ماسك أصابع يده كنها قضبان سجن ويقول ما تشوف يا ( ابو هديب ) قلت له وش عرفني انك عند الباب كان نبحت عشان اعرف وإلا نهقت .. ناظرني وقالي وش قالولك حيوان .. قلت هم ما قالولي ... هذا شي أنا متأكد منه ... أدخل لصك الباب على راسك .. ترى والله ما نيب ناقص سبايك أنت وبوك اللي كله حجان ورجلين ...:42:

ناظرني وهو يقول .. اوريك اعلم ابوي بكل شي .. هو قال كذا على طول نقز للبيت وهو يصارخ .. كنه مدفع رمضان يبه ترى ( ابو هديب ) يقول انك رجلين وحواجب .. يعني انك قصير .. يعني قزم .. وهو يتكلم حطيت يدي على فمه وأنا أقول كذاب يا خالي هو اللي يقول انك إذا جيت تسوق السيارة تحط مساند تحتك عشان تشوف الشارع .. وواحد من عيالك تحت رجليك عشان يدوس البنزين والفرامل:o

وحنا نتكلم قام خالي وفصخ العقال ولشطنا vvsmile من قوة التلشيط تقطعت التكميلة حقتي اللي يشوفني يقول هذا توه طالع من غارة ألمانية في الحرب العالمية .. مع الوجع رحت أركض لأمي اللي جالسه تقول .. ايه يا ابو محمد عندك أياه اضربه .. ايه اضربه .. ابرد قلبي .. تخبيت ورها وخالي يلشط وهي توصيه وتبعدني .. وأنا أقول وين الأمومه .. حشى مهوب أم جالسين في ملعب الملز كل هذا تشجيع عشان الضرب .. وخالي يضرب وزنده يقطع الثوب من قوة رفعة اليد .. طالع زنده كنه فخذ بقره:o .. وأنا أصيح وأقول خلاص خالي تكفى .. توبه صدقني .. وهو يقول أنا لازم اعلمك كيف تحترمني مهوب عشانك اطول مني مالي كلمه عليك .. أنا خالك .. قلت يا خالي إذا على الطول لو أجيب علبة حليب سايل أطول منك ... أنا قلت كذا ما دريت إلا بلشطة بالعقال نصفت وجهي وخريت عند رجل أمي مغمي علي :44:.

وقف خالي وجلس يناظر وهو يقول عسى ماصر فيه شي هالقرد .. قالت امي وهي ترجفني برجلها .. أبد الا مليان عيارة ونصب خلك منه بعد شوي يقوم .. وأنا مغمي علي جلست أمي مع خالي تشتكي له عن شطانتي .. وتقوله يا ( أبو محمد ) وش أقولك الولد بثر ما يقر ابد فيه نشاط لو شبكنا فيه اسلاك إن ينور الرياض لمدة سنه كامله

جلس خالي يحكك في لحيته .. وهو يقول شوفي ابوديه هو ويا ولدي للمطوع عشان يقرى عليه وعلى ولدي منها يعقل ولدك ومنها يرجع عقل ولدي وكود انه يصغر فكه اللي متقدم كنه واحد مثبت فاول

طيب وش بتقول لهم عشان يقتنعون .. ما عليك أباخذهم هالحين للمطوع بس أنت اسكتي .. وحاولي تصحين ولدك وأنا ابصحي ولدي .
جت امي عندي وأنا طايح ... جالس احلم في سمك قرش كبير يبلع خالي ونفتك منه .. وامي فوق راسي تقول قم .. قم يا شين الحلايا .. قم جعله في خشمك هاللي كنه ملعقة نواشف ... قم جعله في جبهتك اللي كنها مواقف جامعة الإمام .. نعنبو خيرك فشلتني مع خالك .. قم .. قم .. وهي تتكلم عطتني رجفه في الكلى من قوة الرجفه تجمعت الكليتين في جهه واحدة .. صحيت وأنا احك راسي وقلت يمه ما نيب رايح اليوم للمدرسة .. ناظرتني وهي مستغربه من اللي جاب طاري المدرسه .. الظاهر انك بعد الضرب اللي شفته من خالك فقدت الذاكرة ..

هي قالت كذا على طول استرجعت الموقف كله وناظرت على جمب لقيت خالي يصحي في ولده ومالي فرشتنا سعابيل .. وخالي يقول لأمي أقول يا اختي ما عندكم سكين حقت مطبق وإلا حقت البيض عشان افك وجه ولدي من الفرشه نشفت سعابيله على الفرشه ونشب وجهه .. ناظرت فيهم وقلت والله المفروض تستفيد من ولدك يا خالي وتبيع سعابيله على أنها صمغ صدقني بتضرب الصمغ اللي في السودان ... ولو نجح العمل وظف باقي عيالك وانت معهم وافتحوا محل لبيع الصمغ وكلها كم سنه وتصير انت وعيالك وكيل الصمغ في الشرق الأوسط وإلا أي واحد من الزباين بيركب ورق حائط في بيته روحوا عنده وسعبلوا على الورق ولزقوا في الجدران ..

ما أمداني اخلص كلامي إلا خالي ملتفت علي وهو يقول الظاهر ان الضرب ما فاد فيك يبغالك زياده .. قلت لا خلاص .. قالي تعال معي صح ولد خالك عشان امشيكم .. هو قال امشيكم على طول أنا طرت من الفرحه وقلت وين .. قال ابوديكم للحراج ابخليكم تشوفون شي ما قد شفتوا مثله .. بس رح البس رحت البس وخالي يغمز لأمي ويقولها بصوت واطي لا تقولين شي .. ابوديهم للشيخ يقرى عليهم .


لبست وطلعت في الشارع وفتحت باب السيارة وناظرت شوي ثمن صكيت الباب .. وجيت ابدخل للبيت قالي خالي وين رايح قلت ما لقيت سيارتك .. أشر لي وقالي هذي للي قدام بابكم .. قلت هذي والله احسبها سيارة الزبالة لأني فتحتها ولقيت علب وقراطيس وحفايظ .. تنح نح خالي وقالي أقول انطم وركب وأنت ساكت
ركبت السيارة وجمبي ولد خالي ( محمد ) وحنا في الطريق السيارة تهز فينا .. وهي تهز قلت لولد خالي .. أقول سيارتكم هذي كانت قارب .. قالي ليش .. قلت يا خوي من يوم ركبنا وأنا حاس بدوار البحر .. التفت خالي علينا وقال اسمعوا بنروح قبل الحراج لبيت واحد من زملائي بنجلس عنده شوي ونطلع زين .. قلنا بصوت واحد .. عادي اهم شي نروح للحراج .


وصلنا بيت مكسر .. بيت كله شلوخ ولا مبنى البلدية ... أول ما وقفنا قال خالي انزلوا وخلكم جمبي .. نزلنا ودخلنا البيت لقينا عالم جالسه في الحوش .. جلست أناظر فيهم وقلت بصوت واطي شكل خويك هذا عنده عزيمه يا الخال .. قالي خالي بنجلس معهم شوي وبنروح .

جلسنا على الفرشات اللي في الحوش انا عن يمين خالي وولد خالي عن يسارة .. كأن حنا نحمي شخصية مهمة من غدر غاشم .. وأنا جالس أناظر دخل علينا شيخ وجلس على طاولة وفتح المصحف وقام يقرى .. وهو يقرى وخالي ماسك يدي ويقولي اسمع لا تسرح ... من زين مخك انت مركز ما تفهم كيف وأنت سرحان ... هزيت براسي ومطيت وجهي قدام عشان اسمع .. وأنا جالس اسمع طمر واحد جمبي وقام يلافط ثمن تعلق فيني وعيونه حمر وقام يرجف وأنا من الخوف قمت اركض ويتعلق خالي على الغالوقه حقت الثوب ويسحبني وهو يقولي اقعد يا الثور .. التفت عليه وقلت بصوت يقطع خااااليييي الررررججججاااال طااااح عليييي وعيوووونه حمررر كننننهاااا عين فرن مطبوخ عليها سليق .. قالي تعال هو كذا يستهبل .

سمعت كلامه و قربت ولقيت العالم طابه على هذاك الرجال ومكتفينه وشايلينه لغرفة ثانية .. جيت وأنا أتنافض كني خلاط حاطين فيه ثلج ويرج من قوة الخلط .. جلست وهذاك الرجال للي شالوه في الغرفة يصارخ .. يقول طلعوني .. طلعوني .. اوريكم .. صدقوني بتندمون كلكم .

التفت على خالي وقلت خلنا نمشي .. يا الخال الرجال يهدد .. وانا اللي كنت جمبه أخاف يفهم غلط ويحسب أن لي دخل في اعتقاله .. قالي خالي اسكت وأبلع لسانك هاللي كنه لسان دلاله .. أول ما خلص خالي كلامه خلص الشيخ قرايته .. ثمن قال الشيخ بصوت عالي امسكوا سرى وكل واحد يجيني بالدور .. وقفنا في السرى وخالي يقول لي .. هد أنا وانت و( محمد ) بيقرى علينا وبنخلص ثمن نروح للحراج ..


جلس الشيخ يقرى على الناس لين جا الدور عند خالي ودنق الشيخ وجلس يقرى عليه حسيت وهو يقرى انه بيجيه دسك في ظهرة من قوة التدنيقة .. خلص من خالي وجا عند ولد خالي وقام يقرى عليه وهذاك فاق خشته والله مايدري وش يقول الشيخ
المهم جا دوري .. يوم جا الشيخ بيقرى علي .. ناظر الشيخ لواحد كان جالس في الزاوية ومتكتف .. قال الشيخ جيبوه لي هو قال بس جيبوه على طول طبوا عشرين عليه ووقفوه قدامي .. وقام الشيخ يقرى عليه وهو يقرى بدى الولد يتحرك يوم جا بيمشي ويمسكونه ثلاثة واحد من فوق والثاني من الوسط والثالث من رجليه .. والشيخ يقرى عليه وكل شوي يرفع صوته بالآيات وهذاك يصارخ وهو يصارخ مسكة الشيخ من تحت فكه ودخل اصبعه تحت الفك وقام يغرزه ويقول اطلع ... اطلع .. وهذاك تغير صوته قام يقول ما نيب طالع .. وانا جالس اسمع وقلبي طاح في ركبتي .. حتى انه يوم يطيح طلع كنه صوت علبة فاضيه طايحه من فوق درج رخام
جلست ابلع في ريقي .. واسمع الشيخ يقول اطلع وإلا ذبحتك .. وهذاك يقول خلاص ابطلع .. بس ترى ابطلع من راسه .. والشيخ يقول لالالالا من اصبع رجله .. قال الجني لا .. غرز الشيخ أصبعه تحت الفك بقوة ثمن قال الجني خلاص ابطلع .. ابطلع .. ابطلع

فكوه اللي كانو ماسكينه ثمن شالوه وجلسوه بعيد .. وجلست أناظر في الشيخ وهو يناظر فيه .. يوم التفت علي حسيت اني بلعت التفاحه اللي في الحلق ورجليني تعفطت يوم قال تعال .. جيت مدفوف من اللي وراي لأني حسيت بشلل

جلس يقرى علي الشيخ .. وهو يقرى يطلع تفال ( رذاذ ) منه وأنا ابعد وجهي عشان الرذاذ هذا .. شوي لقطني من تحت الفك وغرز اصبعة .. رفعت يدي ابفك يده طمرو علي ثلاثة كتفوني .. والشيخ يقرى علي وأنا عيوني طايره من الألم من قوة الألم قلت ابطلع .. ابطلع .. ابطلع ..

انا قلت كذا على طول الشيخ طاح من الضحك .. وقال قل لا إله إلا الله قلت لا إله إلا الله .. ثمن ناظرني شوي وقال رح انت ما فيك شي وشوله تقول ابطلع .. قلت وأنا وجهي طالع كله احمر .. قلت احسب اللي يقول ابطلع انك تفكه .


طلعنا من عند الشيخ وخالي يضحك علي .. ويقولي والله من الدباشه واللعانه في هالراس( يا أبو هديب ) اجل تحسب اللي يقول ابطلع يطلعه .. والله لو فيك شي ان يطلع الخيزرانه على ظهرك .. ويا ليته سواها عشان معد تعق بمك .. وتعقل وتخلي الشطانه عنك ... ناظرت فيه وقلت يا خالي متى بتودينا الحراج .. التفت علي وقالي وهو يتنهد .. اسمعني يا ( ابو هديب ) انا خالك في مقام ابوك .. وابيك تسمع كلامي زين انت يا ولدي كبير وتفهم وتعرف الزين من الشين .. ليش تهبل بمك ؟ .. أمك اللي ربتك .. امك اللي عطتك من الحب والحنان وضحت بنفسها عشانك .. امك اللي سهرت عليك .. ما درستوا هذا كله يا ( أبو هديب ) في المطالعه .. ناظرت فيه وأنا أقول والله يا الخال اني احبها بس هي بعض الأحيان تعلق علي وتهزئني وتستفزني .. قالي هذي مهما كان أمك والأم الجنة تحت أقدامها .. عشان كذا حاول انك تبر بمك لا يجي وقت تتمنى انك تشوفها وترد لو شي يسير من جمايلها عليك .. ولا تنسى اهم شي انها حملت فيك تسعة شهور وإلا انت من يصبر عليك .
وهالحين وأنا خالك ابوديك للبيت عشان تحب على راسها .. وتشوف وش تبي وترضيها .. وانشاء الله اوديكم بكره للحراج أنت وللي ما له اسم ... قال كلمته الأخيرة وهو متأفف وقرفان كأنه مشممينه ريحة شراب في رجل لاعب من أسبوع ضحكت عليه وعلى ولد خالي اللي مفهي كنه شارب لبن في القايلة .

قلت يا الخال بروح لأمي .. ابستسمحها واحب على راسها .. اللي أنا شفته اليوم شي مهوووووول ..

(( النهــــايـة ))

قصة منقولة

أتمنى إنها تعجبكم خخخ:o:21::23:خخخخ