اهلين بالحلوين
سامحوني كان في مشكلة فالكمبيوتر ماباش يكتب يالعربي
انا ليبية في هاملتون ليا خمسة سنين في كندا زوجي طبيب جاي يتخصص قعدت في الاول في تورنتو
وعندي زوز اولاد و اللي يبي يعرفني اكثر مرحتين
و انستوني و انشاء الله نكون انستكم

اوخيياتي
ام محمد
سلفية
امواج البحار
مشيمشة
طالبة عفو الله
TITNK
قماطية
انشاء الله معرفة خير

و توا نمشي نصليو نضم الحوش اللي محوسينه الصغار و راجعتلكم
و خلونا مواصلين و الله حسيت بالجو الليبي لما قريت كتيبتكم

مساء الورد يا بنات كيف حالكم اليوم والله أنى اليوم نايضة بكرى عاد ودرت تنكيتا للحوش الفوقى لوطى:09:
وهدا وين فضيت وخشيت عليكم عاد باش نتلاقو بعدين
أم حميدة وين هربتى معاد لقيتك تيوينك يا مرا قولينا انتى قعدا من سكان لندن والا محولة قريب نعرفك راهو؟؟؟؟؟؟؟؟؟؟؟؟؟؟؟؟:22:

السلام عليكم ورحمة الله وبركاته

كيف حالكن يا عيله شن الاخبار ؟؟؟
ما شاء الله والحوت علينا أن شاء الله ديما فى الزياده .....
مرحبتين بعيونى سهارا صار جارتنا فى هاملتون ولك خمس اسنين وزوجك طبيب (اكيد معرفه )
انستينا يا حنا ومرحبتين بيك وباهل هاملتون .

أمواج لا ما تلاقيناش أنا وطلوبه امس مع أن اللمه كانت حلوه وجوها ضحك وترفهيد ماشاء الله
دارولى حفله توديع البنات الله يبارك فيهن ويحفظلهن اصغارهن ,,,
ونعم الاخوات بصراحه نعرفهن من ست سنوات وما عمره جت بينا سيئه ديمه نجتمعوا على الخير ومتعاونات ولنا عامين نحفظوا ونتدبروا فى كتاب الله واصغيورتنا يحبوا بعض ربى ايديم هالنعمه
وان شاء الله نلاقى اخوات كيفهن فى المكان اللى قاصدينه وبأذن الله ما نيش امقاطعه لندن لانه بصراحه مدينه مريحه ونظيفه والاهم التجمع الليبيى اللى فيها رائع بمعنى الكلمه ربى يحفظهم ,,,
والله يا بنات قمه فى التعاون وقلوبهم على بعض ما شاء الله
ربى يجمعنا بيهم على سرر متقابلين فى عليين ,,,,

طالبه العفو
ايوه أنا امحوله اقريب وامشهدره بروحى كل الناس عرفتنى (حيه عليا من بو الصغار )
سيرتى الذاتيه كل المنتدى عارفينها (لو كان انحط اسمى الحقيقى وبلا هالنك نيم خير خخخخخخخخخ)
هيا قولى أنتِ من مع انى تقريباً عرفتك .......

سلفيه كيف اخبارك اليوم ان شاء الله ما بيكش؟

تيتانك ما شاء الله ربى يحفظلك اصغارك ويرزقك برهم ان شاء الله وتفرحى بيهم
مادام عندك مراهقين احكى لنا على تجربتك فى التربيه وكيف امدايره معهم فى الغربه ؟
أنا حاطه ايدى على قلبى ومش امبطله الدعاء لهم بالهدايه والصلاح
وكل ما نسمع حاجه مش اكويسه نقعد نرعش ونفكر بالرجعه لليبيا لكن لما مشيت زياره وشفت المجتمع غادى قلت الغربه ارحم على صغارى رغم اللى فيها .

اللهم أصلح ذرياتنا واحفظهم يارب

بنات اليوم وأنا نتفرج على صلاة العشاء فى الحرم دموعى نزلوا بروحهم وقعدت نبكى ربى ما يحرمنا من زيارة هذاك المكان وما يحرم منها مسلم يارب
السنه هذه لما نزلت كنا ناويين نعتمروا فى العشره الاواخر وانخلوا الصغار فى ليبيا لكن زوجى تأخر فى تقديم جوازه للسفاره السعوديه فما سخرلناش المشيه سبحان الله,,, ان شاء الله الخيره فيما اختاره الله ,
بس من هذاك الوقت كل ما انشوف الكعبه والناس حواليها تخنقنى العبرهه ودموعى ينزلوا :(

يارب بلغنا زيارة البيت الحرام عاجلاً غير اااجل يارب .

امشيمشه وقماطيه ان شاء الله تكونن بخير وربى يطمنا عليكن ....

السلام عليكم و رحمة الله و بركاته
اهلين بالكل
مرحبتين بيك يا ام محمد و الله سامحيني شكلك ملخبطة بيني وبين حد ثاني
انا قعدت حوالي الثلاثة سنين في تورنتو لكن ما عرفتش ليبيين فيها
و توا في هاملتون فيها هلبة ليبيين لكن كل واحد لاهي في حاله بالاخص اللي نعرفهم كلهم دكتورات
مشغولات الله يعينهم
انشاء الله تمشي لبيت الله و تشوفي الكعبة و تمسيها بديك عاجل غير اجل انشاء الله حجة وعمرة
ليك ولينا يا رب


انشاء الله الجميع بخير
سلامتكم