السلام عليكم
كيف حالكن كلكن وشنو اخباركن كلكن انتن وعايلاتكن.
انا والعيال وبوهم بخير والحمد لله امكسدين بس الحمدللهلا خشة ولا طلعة كان في الويك اند صح الجو بدا احسن بس علشان راجلي يروح تعبان يادوبك ناكلوا اللي فيه النصيب واتليل يعني يجي الليل.
وهذي اخباري بسرعة ومع السلامة توا...

السلام عليكم ورحمة الله وبركاته
كيف حالكن جميعاً بدون أستثناء ,وسلمكن نشادات وبارك الله فيكن على الدعاء ,,,
الحمد لله اليوم حالى أحسن بواجد
وأمس امغير اندور بين مواعيد الدكاتره ولله الحمد وكل شيئ تمام

سلفيه لا باس على عمك ان شاء الله ما تسمعوا سوء وان شاء الله اتشوفوه ويشوفكم وربى يشفيه ويشد صحته ويطمنكم عليه
وما ترعشيش حتى انتِ على طريق وربى ان شاء الله ينوضك بالسلامه

عيونى
لاباس على حناك أن شاء الله ربى يشفيها ويسمعكم عليها خبر خير يارب
وهذه الغربه يا حناتى من فجعه لفجعه الله غالب ,,,

امواج
طيب على مرات خوك اللى ناضت بالسلامه وهذه ولا غيرها
ويا حنا اكيد كان عنده كيس ليفى وعلشان يكون حجمه كبير ولاصق بجدار الرحم لازم ايديروا فتحه كبيره بيش يستأصلوه لأنه ينزف هلبه وما يتحكموش فى النزيف فيكبروا فى الفتحه
حتى هنا نفس الشيئ يشلعبوا فى البطن من الحد للحد لكن ايسكروها بطريقه تجميليه
وعلى فكره فى الوسط الطبى فيه عباره مشهوره (Big surgeon Big incision)
يعنى جراح كبير فتحة العمليه تكون كبيره ههههههه
ولا باس على الصغار هذا حال الصقع ديما ونحن انعانوا
بصراحه انراجوا فى الصيف بالريق اليابس وضاق علمنا من الصقع ومنظر الثلج واللبز
وعويلتك نشطيهم خلاص توا فى سنه اولى يعنوا المفروض معتمدين على ارواحهم فى اللبس فى المدرسه
وهذه اول حاجه يتعلموها العيال فى المدارس الاعتماد على النفس وهذا الصح
تعرفى اولدى ياسين الصغير فى الجى كى لما مشى ما يعرفش ايدير شيئ والابله كل يوم اتقولى علميه يغير ادبشه ابروحه وانا امطنشتها انقول باهى ومش امعدله
فى يوم جيت نبى ناخذ العيل لقيته مش قاعد برا مع العيال سألتها قالت لى قاعد جوا
خشيت لقيته ابروحه ويحاول يلبس ومش قادر وبحذاه المساعده امتاع الابله واول ما شافنى انفجر بالبكاء
قلت له كنك قالى كل العيال لبسوا وطلعوا ألا أنا
مش حقدت على المدرسه ونويت انحرش فيها الاداره بس روحت للحوش نغلى
ولما وصلنا جيت نبى انغير للعيل ما باش ايخلينى واصر انه يغير ادبشه ابروحه
ويا حنا من هذاك اليوم وهو يلبس ويسلح فى دبشه ابروحه ويتسابق مع خوته من الاول (مبرك علينا من تسييبه فى الفصل )
مرات نقعد نجرى فى جرته بيش انسقمله ادبشه
حتى انتِ عوديهم على الاعتماد على انفسهم وما تساعديهمش وحفزيهم وشجعيهم لما ايغيروا دبشهم ابروحهم .
بصراحه نحن اندلعوا فى اعويلتنا وكل شيئ انديروا فيه لهم نين حليناهم وهذا يأثر عليهم حتى فى المدارس وفى المواقف اللى تبى حسن تصرف ,,,

نبى ننشدك اولدك عبد الكريم شنو يعطوا فيهم فى الهلث ؟
امس دزوا لى مع محمد انهم يبوا يبدوا دروس على نمو الانسان والمراحل العمريه يعنى الجنين وبعدها الطفوله والمراهقه والبلوغ والمدرس طالب موافقتنا عليها
انا شفت المواضيع حسيتها عاديه مش شور الخبر الاخر
عندكم حتى انتوا هكى يبعثوا فى اوراق توضيحيه عن المنهج للاهل وألا لا؟

امشيمشه
شنو اخبارك واخبار الدكتور والعيال أن شاء الله حالكم باهى

قود لايف
كيف حالك وسلمك نشاده

غاده
شنو اخبارك ؟
أن شاء الله بخير

ليبيا قلبى
كيف حالك ؟ وشنو الاخبار ؟
كل ما نقرى اسمك تخطر عليا صاحبتى مجبريه
لانى قريت مره انك مجبريه
وعلى فكره انا خوالى مجابره

ام مودى
كيف حالك وان شاء تمشى لليبيا وتردى شوقك
وصح كندا بعيده لكن ميزة شهاداتها افضل من الدول الثانيه
ممكن لانكم جيتوا لمكان امصقع هذا عليش طارتلك منها
لكن العيشه فيها حلوه ومريحه وخصوصا ما فيش عنصريه والناس كلها زى بعضها
صح ايجن ايام الواحد يتعقد فيهن بس هذا حتى فى بلادنا ايصير والواحد ديما يدعى امتى انهج
وهذا حال البنى ادم ما يعجبش شيئ
نصيحت ما تستعجلوش واجدين كانوا يبوا ايغيروا لدول ثانيه وبعدها ربى فرجها عليهم وحصلوا مكانات اكويسه فى كندا المهم الواحد يصبر وما يستعجلش على رزقه امتى ماربى كاتبله ايصير .
وأن شاء الله ربى ايسخرلكم الخير

لو زوجك جاى دراسه فالافضل كندا والواحد يتحمل اشوى وأن شاء الله ربى يفرجها
احنا ما كناش ناويين نستقروا هنا لكن سبحان الله شاءت الظروف وقعدنا
واكثر سبب هو استكمال علاجى والمتابعه لانى لازم انراجع كل 3 شهور ولمدة خمس سنوات
بس تعودنا على العيشه هنا وتأقلمنا معها والحمد لله امورنا تمام
العيال ماشيين اكويس سواء فى المدارس او من الناحيه الدينيه
واحنا استفدنا هلبه خصوصا تفقهنا فى امور دينا وهلبه اخطاء كنا انديروا فيهن وتعلمناهن صح وعلاقتنا بربى افضل
ياسر غير الواحد معش تفكيره محصور فى الزيارات الاجتماعيه ومسايرة فلان وعلان وقعد يلتفت للامور الاهم فى حياته ويقدم الاولويات وابتعد عن النميمه والغيبه .

وأن شاء الله ربى ايثبتنا على دينه ويبعدنا عن المعاصى ويسخرلكم الخير وين ما كنتوا .

قرين ستار
كيف حالك وحال بنتك
ما شاء الله هدرازه ربى يعطيك الصحه

ذات الهمه
ربى يشفيك ويحفظك ان شاء الله
تحصنى بكتاب الله وارقى نفسك بنفسك اقرى ايات الرقيه على روحك كل يوم
واقريها على عسل واشربى منه مع حبة البركه
واكثرى من الدعاء والاستغفار وأن شاء الله ربى يشفيك ويبعد عنك اولاد الحرام


tt.m كيف حالك وشن الاخبار؟

مرام
كيف اخبارك وشنو حال الصغار ربى يحفظهم لك

المصباحى
كيف حالك؟
المانيا مليانه مبتعثين ما شاء الله وعندهم هلبه نشاطات .

عندى صديقتى خريجة اسنان كانت فى كندا وروحوا السنه اللى فاتت بس زوجها طبيب بشرى ويسكنوا فى قرقارش بالك تعرفيها ؟

اريام
كيف اخبارك ؟
وما شاء الله داخله بقوه على الطبخ الليبيى هناء وعافيه يا غاليه ...

حياه
تسلم ايدك على الكيكه روعه هاتى قطعه
وحطيها يا حنا بالحلويات لكن ما انتِ عارفه حكم الاحتفالات باعياد الميلاد انها بدعه
والافضل انك فى موضوعك ما تذكريش انها عيد ميلاد
الواحد تعلم انه المناسبات الخاصه يحتفل بيهن بشكل تشجيعى
يعنى اصغارى لما نبى انديرلهم حفله انقوللهم لانكم حفظتوا سورة أو لانكم نجحتوا فى امتحاناتكم وهكذا
بيش ما يتعلقوش بالبدع ونفس الشيئ ابراء لذمتى امام خالقى ..
وربى ينجحك ونفرحوا بيك واديرى لنا احلى كيكه (حتى فى نجاحك نحن اللى نستغلوك ههههه)

تقربصتى
شنو اخبارك وكيف حال ابنياتك ومبروك الاربعه كيلو اللى طاروا

ليبيه وليبيه 100 فى 100 شنو اخباركن ؟

مهاد كيف حالك ؟

باقى البنات ان شاء الله كلكن بخير وأن شاء الله ما انسيتش وحده منكن

اشوى ثانى نبى انسكر الموضوع ونفتح الجديد بأذن الله

فى امان الله

السلام عليكم
من جديد كيف حالكم
المصباحي
ممكن تقوليلي شنو ريجيمك انا ليا ثلاث اسابيع مخففة في الاكل بس الوزن يعاند فيا ما نقصتش الا كيلو واحد واندير في تمارين كل يوم نصف ساعة وانا انشاء الله نازلة ليبيا زيارة في الصيف ما نبيش انكون يعني انت فاهمة........
حياة ماشاء الله عليها كيكتك اتهبل وسهفتيني علي الحلو صحة عليك مع انها متاخررررررررررررة وااااااجد.
ام الاء
ان شاء الله توا حال الاء احسن...
سلفية كيف حال عمك لا باس عليه.
جي ليبيا
كيف حالك.............
توا انكمل بعدين

السلام عليكم ورحمة الله وبركاته

كيف حالكم و شن اخباركم
انشاء الله تكونوا كلكم بخير و سلامة
و الله يشفي جميع مرضى المسلمين و بسمعنا عليهم الاخبار الطيبة

سلمكم نشادات و بارك الله فيكم علي الدعاء لحناي و علي شعوركم الطيب
اني بنحاول انردعلي كل وحدة , لكن بصراحة ما قدرتش نقرا كل ردودكم, الواجب اتراكم اعليا و معاش قادرة انلحق

توا كيف كنت نكلم في بابا قالي حناي غدوة بديرولها العملية و عطاني نكلمها صوتها مهزوز وواضح انها تعبانة هلبة لين معاش قدرت نتحكم في روحي صكرت التليفون وهات يا بكي
الحمد لله علي كل حال

سلفية
لاحول و لاقوة الا بالله العلي العظيم
الله يشفيه و يعافيه و يسمعكم عليه الاخبار الطيبة و انشاء تروحوا لليبيا و تشوفوه بخير
و الله انت مش في بابه هالرعيش كله , الله يكون في عونك و عون زوجك
و انشاء الله يسهلك امورك يارب و يونضك بالسلامة

امواج
بارك الله فيك كل ما ضيق بيا الدنيا سبحان الله تتصلي و تخففي عليا
تعرفي بعد ما نتكلم معاك نحس براحة
الله يريحك زي ما تريحي فيا

تقربصتي
الحمد لله انك بخير
تعرفي امش لما كلمتني امواج سألتها عليك لاني كنت مشغولة عليك و قالتلي انك تمام و حالك توا باهي و انك ما شاء الله ناقصة و امدارتيها علي الصيام
انشاء الله اجر و عافية
و كيف حال البنوتات الحلوات


ام محمد
سلمك نشادة , الحمد لله انك توا احسن و انشاء الله ربي يزيدك من الشفي
و كيف حال بوك توا

مشيمشة
كيف حالك و حال صغويرتك , شن قاعدين تتفسحوا و الا روحتوا

غادة
شن اخر اخبارك, وين جديدك
خيرك كسدتي و معاش شوفنا حاجاتك الحلوة

حياه حلوة الحلوة
تسلم ايديتك علي الكيكة وانشاء الله لما نشوفوا صور كيكة عرسك كان ما شوفنهاش على الطبيعة
على اعتبار احني معزومين

مرام
كيف حالك و شن اخبار التخفيف معاك و الا معاش عدلتي
تعرفي زمان خوي مشي للبرازيل و جابلي خاتم وتعليقة دهب بالالماس و حجر لونه موف و قالي هذا حجر مشهورة بيه البرازيل ياريت لو تعرفي اتقوليلي شن اسمه و صحتي

ليبيا قلبي
شن اخبار الريجيم

قوذلايف
كيف حالك و حال وليدك انشاء الله تكونوا بخير , خيرك معاش زي الاول خشاتك قللوا

ذات الهمة
لاحول و لاقوة الا بالله العلي العظيم
الله يفرج همك و يفك كربك و يبعد عنك اولاد الحرام و الله يجعل كيدهم في نحرهم
و الله يهديهم و يغير رايهم

ام مودي و ميمي
تعرفي اني اتفجرت و خلاص , الله يعينا غربة و اخبار مفجعة نحس في روحي خلاص
و بالنسبة انكم تقعدوا و الا تغيروا البلاد انتم ادري الناس بروحكم و ظروفكم يعني احسبوها كويس بجميع المقاييس و من جميع الاتجاهات و الله يقدركم علي اختيار القرار الصحيح
ام ءالاء
كيف حالك و حال اللولة مش عارفة شن ادلعي فيها ,اني بنت عمتي ءالاء نقلولها {اللولة}

النجمة الخضراء
شكلك هدرازة درجة اولي
تعرفي خشيتي خاطري ,غير اني هادي الفترة ظروفي مش و لا بد كنهادا راني كسدت معاك
تعرفي اني صغاري هما الي امشيني زي ما يبوا , قلت لماما بدل ما نربيهم هما قاعدين يربوا فيا و يمشوا فيا زي ما بيوا الله يعينا , انت بنيتك قاعدة بيبي صغيرونة و كل البيبيات هكي يرقدوا النهار و يقيموا الليل

امل المصباحي
صار عريسة , ربي يهنيك ويجعل ايامك كلها سعادة
نصيحة عيشي ايامك و ما تفكريش في الجياب قبل العام هادي الايام ما تتعوضش

اريام الحنين
بارك الله فيك علي السؤال علي حناي
صار خلاص وليتي طباخة في الاكل الليبي

ليبية 100100
صار حتى انت نازلة لليبيا في الصيف , خلاص انظمي لمجموعة نيولوك و امشي سجلي عند ام مودي و ميمي

سامحوني ايدي بدت توجع فيا خلي نبعت هذا الرد خير ما يطير و بعدين انكمل الردود

عيونى
أن شاء الله ربى يطمنكم على حناك وأن شاء الله ربى يشفيها وادير عمليتها وتولى افضل من قبل ,,,
ما تبكيش وشدى عزمك
وربى أن شاء الله كاتب الخير

بنات فتحت لكم موضوع جديد أهوا الرابط
http://forum.hawaaworld.com/showthread.php?p=11839013#post11839013

هذا خلاص بنسكروه (سامحينا يا امشيمشه )