from today i will not write to you in arabic
because i don't like to speake arabic but i like to speake and meet other people who can speake englis

سلااااااااااااااااااااااامات اخواتى وين ما كنتوا كيف حال الجميع نفر نفر بدون استثنااااااااااء
الحمد لله لقيتكم ما زلتوا مستمرين فى هالمنتدى المبارك اللى خلانى نلاقى بناويت بلادى ونقرا تهدريزهم اللى وحشنى والله اوخيتكم مستاحشه البلاد او ربى ايصبرنى :(
نكتبلكم توة وانى حاطه على وجهى خلطة زيوت من المنتدى المبارك :42: ان شاء الله اتدير فايده :hahaha: ما زلت فى موالى الاول ، ورانى امس مشيت او درت اول جلسه لازلة الشعر بالليزر استخرت او ربى سهل والحمد لله او مازال انراجو فى النتيجه ، لكن اليوم صابحه شناباتى مكانهم لطع حمرا خفيفه موش هلبه او ربى يستر عندى عزومه يوم الجمعه والله حايرة وانقول ربى يستر توة شن يبى ايقولوا عليا :( ادعولى يبروا قبل يوم الجمعه يااااااااااااااارب
مريت على صفحات الملتقى الليبى المبارك ونحب انقول لوخيتنا ام محمد زادك ربى من الشفاء والحمدلله انك كنت بكندا وقتها بيش حصلتى اهتمام ورعايه وان شالله ما عاد اتشوفى سو
واوخيتنا ذات الهمه ان شالله يا رب يتعبى عليك الحوش او تتهنى عاجلا غير اجل
واوخيتنا اللى قالت على فتنة المنتدى والله حالى شر من حالك :hahaha: رانى نفتح على قسم الاكلات او نكتب وانطبق او نمشى للسوق او نشرى - تلميذه مجدة من تلميذات المنتدى- او تلاجتى توة مليانه الهرشى والماربل سيرب وانواع الصوصات و و و و و والله لقيت روحى غير نشرى فى الجنك فوود على قولت راجلى صحيح استفدت من حاجات كثيرة لكن فى نفس الوقت لقيت روحى مصاريفنا زادت هلبه علاول
والمكياجات حدث ولا حرج لقيتهم كاتبين على كريمات كلمت اختى فى ليبيا قلتلها امشى راهم يشكروا فى كذا وكذا او لما مشت قالتلى الكريمات الماركات اللى قلتى عليهم راهم غاليات هلبه الحكيكه الصغيرونه ب 80 دينار :eek: وين ماشيه او حتى لقيت موضوع على تجهيزات العروس او شن تشرى من مستحظرات العنايه بالبشرة والله كلام عجييييييييييييييب اول مرة نعرف بسيروم التألق اللى اتحطيه قبل ما يكون عندك مناسبه بليله بيش اينفخ الخدود او كانت فى النصائح للعروس اشياء خياليه والله كنت ناويه نبعت الصفحه لاختى اللى ربى انشالله يسعدها وييسر لها امرها عن قريب لكن قلت والله لو ايشوف بوى الموضوع يقعد يدعى عليا ميزانيه رررررررررررررررررهيبه وين وين ماشيين
او رانى توة راجلى ماشى للسوق قلتله قريت يشكرو فى عطر شوفهولى او بخ شوى على منديل او جيبه بيش انشمه والله هبلت حتى الراجل اوراى:hahaha:
او لما انزاد عليا ولدى فى الصيف الحمد لله او ربى ما يحرم حد ان شاءالله كنت انخش على قسم الحوامل او نقرا شن جهزتى للمولود وللنفاس موش من اكل ولا مقويات لا من ملابس و أثاث للمولود الزين والله قريب اتخولطت شن هادا :09: لكن ربى ستر او ما هبلتش راجلى لقيتهم يتكلموا عن تغيير سرير الام راهو خلينا من سرير المولود بحيث يناسب سرير المولود بيش اللى ايزور الام ايشوف التناسق هذا غير عن حاجات والله تهبل او غريبه
الحصيله هبلونى انى عارفه روحى خفيفه او فيسع ما نتاثر لكن الحمدلله لما انكلم فى اوخياتى فى ليبيا نلاقى روحى نعقل شوى والله المستعان لكن هذا ما يمنع انى استمتعت باشياء كثيرة واستفدت من حاجات هلبه وتعرفت على حاجات حلوة منها انتوا يا غاليات والحمد لله ونسال الله الثبات
ان شاء الله نرجعلكم توة اختى اتصلت او قالتلى يللا افتحى المسينجر
نتلاقو يا غاليات :)

السلام عليكم

كيف حالكم يا بنات

اعذروني عالغياب

وان شاء الله نرجع نهدرز معاكم بعد يبدا الخط كويس لانه تاعب هلبا


سلامات

هلا وغلا اختى اتشرف بمعرفتكم وياليت تزورنى بهولندا .خلاص ابعثى رقمك عالخاص .
وانا ماسبق انى رحت المانيا حاتكون اول مرة .اذا تعرفيين اسم منطقة فيها اسواق وفنادق فى هامبرج اكون شاكرة .

السلام عليكم

بارك الله فيكن كلكن يا بنات وان شاء الله ربى ما يفجعكن على غالى ويحفظلكن صحتكن وعافيتكن
الواحد لازم ديمه يحمد ربه على نعمة الصحه ويحط فى باله أن واجدين محرومين من هالنعمه
وفعلاً كيف ما ايقول المثل الصحه تاج على رؤوس الاصحاء لا يراه ألا المرضى ....
ما عرفتش هالمقوله ألا بعد مرضى
لكن الحمد لله حالتى اكثر من ممتازه ومتابعاتى كلها سليمه ومبشره بالخير ان شاء الله
ونصيحه ما تستهينش بشيئ مهما كان عارض عادى الواحد يمشى يشقى بروحه بدرى
وزى ما كتبت لكن فى موضوع تشابه الاحزان ما تنسنش الفحص الذاتى للصدر
كل ما تنظفى من الدوره ديريه لروحك ولو حسيتى اى حاجه غريبه امشى للدكتور
وهذا هو اللى نفعنى والحمد لله انى اكتشفت الورم فى مرحله مبكره جدا
والحمد لله انى فى بلد متقدمه علميا ومتعودين على علاج هالنوع من الامراض
وعندهم اهم شيئ نفسية المريض وكيف يخلوه يتأقلم مع وضعه ويصبر
ما ناقصهم غير الشهاده ربى يهديهم
والله كانن ايجنى فى الحوش متطوعات كانن مصابات بالمرض من سنوات ومعنوياتهن مرتفعه اضافه الى ايمانهن القوى بالله (بس للاسف على طريقتهم الشركيه ) نين نستغرب قوة عزيمتهم
تعرفوا وحتى قبل ما ايجن يسالنى شنو تبى انجيبولك امعانا
وحده كان موعدى معاها وقت اللنش كلمتنى من مطعم وقالت لى انا نبى نشرى لروحى فطور شنو انجيب لك امعاى قلت لها ما نبيش حاجه قالت لى كيف ما اتجيش انا نأكل وانتِ لا
مشيت قلت لها جيبى اللى على ذوقك بس انا ما ناكلش اى حاجه فيها خنزير ولا كحول
وتعرفوا نين تحشمت لما جتنى ما عقبت ما كركرت ..
هذا غير المتطوعين شياب وعزايز ايجونى كل يوم للحوش بيش ايشلونى للمركز علشان علاج الاشعه ويرجونى نين انكمل وايروحوا بى والمقابل كلمة شكراً بس
وسبحان الله مع اننا بلد مسلم لكن ما تلقى امغير اللى ينزلك معنوياتك وألا ايقولك اسم الله يا حنا عليك يا الصغيره (خخخخ) يعنى راكى تبى اتموتى غير مسالة أيام
وهذا غير ان ما عندنش حاجه اسمها متطوعين والا رفع معنويات المريض
تلاقيهم حتى لما ايجوه وقت الزياره للمستشفى الراجل عنده القلب وكلهم يدخنوا بحذاه نين اتغم عليه
هذا غير اللى ايخش يا اما يقعد يشهق ويبكى او يقوله شكلك اصفر ووجهك ضاعف من كثر سحب الدم
طبعا هذا مش فى بلادنا بس فى كل الوطن العربى نحن ناس نتفاعلوا بسرعه وعفويين احياناً لدرجة العباطه وما نحسبوش حساب لوقع الكلمه على الاخرين
ولا انفكروا ألا فى اللحظه اللى عايشينها لكن شنو تأثير تصرفاتنا على مشاعر الاخرين أو شنو ردة افعالنا ما نفكروش فيه ...
هذا غير الكبر والغرور اللى راكبنا من الشيطان اللهم أنا نعوذ بك منه يقعد ينفخ فينا ويزين لنا حسن تصرفاتنا
مع اننا لو تنازلنا اشوى فى بعض الاحيان لكسبنا رضا الله وبعده رضا العباد ....

معليش شكلى سرحت فى الكتيبه بس حاجه تجر حاجه ,,
وهذا ما يمنعش ان عندنا ناس ما شاء الله خدومه وتصرفاتها لوجه الله وصادقه وتخدمك بدون مقابل بس كيف ما ايقولوا الكثره تحرم الود بمعنى ان المجتمع الظواهر السيئه هى اللى طافيه على السطح اكثر من الخيرات ,,,,

انجوا للزبده
ما دامكن متحمسات هيا نبدوا بسورة البقره لفوائدها العظيمه
شنو رايكن كل يوم نحفظوا صفحه والويك اند انخلوه مراجعه
وطريقة الحفظ خشى على الموقع هذا
http://quran.muslim-web.com/
او موقع المرتل
http://www.reciter.org/

هذين ميزتهن انك تفتحى الكمبيوتر واتخليه يكرر الايه نين تحفظيها
انا تأخذ منى الصفحه فى ساعه تقريباً بيش نحفظها تمام وبقراءه صحيحه
يعنى ساعه فى اليوم مش حاجه كبيره لكن اجرها اضعاف مضاعفه (يضاعف لمن يشاء)
طبعا المواقع بقراءة حفص بس لو تبن بقراءة قالون زى ما فى ليبيا فيه الشيخ الدوكالى لكن بدون تكرار والشيخ بوسنينه .....

عندكن الموسوعه الاسلاميه علشان التفسير
http://www.islampedia.com/MIE2/MainInter/default.htm

المهم كانكن متحمسات هيا حطن اساميكن وخلونا نبدوا من بكرا ان شاء الله
وحنديروا بعد كل مجموعة صفحات نحفظوها ايام مراجعه وتسميع هنا فى نفس الموضوع ...

وعلى فكره يا بنات توقيعى فيه الاذكار اليوميه افتحنهن فى الصبح واسمعنهن وسمعن اعويلتكن واهلكن بيش ربى يفتح عليكن ان شاء الله .

هيا الى سباق الخير