السلام عليكم خواتي العزيزات وآآآآآآآسفة على التأخير عليكم والله انشغلت بالبيت وما كان عندي وقت للكتابة .
الحبيبة غنى القمر مشكورة على كتابتك وأنا مستمرة وياه إن شاء الله إلى أن يتغير ويفك نفسه من هالعقدة اللي حاطط نفسه فيها ويقدر يمسك القرآن ويصلي وأنا بين فترة وفترة أقرأله شغلات خاصة بالدين والصلاة والأحاديث من باب التسلية بس أنا أكون قاصدة علشان يسمع ويحط في باله هالأشياء والحمد لله هو مو بالمرة بس قاعد يحاول وحتى لو مو قادر يقرأ بس على الأقل عنده سيديات وشفته قاعد يسجلهم علشان ياخذهم للدوام ويسمعهم بس مثل ما قلت ما يحب أحد يشوفه بينه وبين نفسه وأنا مخليته على راحته . سألتيني ليش ما كنت أدخل عليهم لما كانت بغرفتي وتسويله مساج بالعكس هي الحين ماخذه فكرة عني إني جاسوسة لأني ما كنت أنام إلا لما أشوفها راحت وطبعا الباب يكون مفتوح ولما هي تطلع تسكر الباب وراها وباب غرفة البنات يكون بعد مفتوح علشان أشوفهم وكنت كل شوي أروح للحمام ( أكرمكم الله ) ويشوفوني ونظرتها حقي تكون غريبة إنه اشلون للحين مو نايمة وليش كل شوي أروح الحمام أو المطبخ علشان شذي سموني الجاسوسة بس ما يهمني مو عيب هذا حقي . تدرين قبل يومين سمعتها تقول لزوجي بالمطبخ عندنا بالبيت جاسوسة والله بغيت أقلب البيت عليها بس كنت قاعدة أقرأ قرآن وبالليل قلتلها سمعتك تقولين في بالبيت جاسوسة شنو قصدك شان تقول أشوفك ما تثقين فينا لما نكون مع بعض وأنا ماكو شي في بالي ولا زوجك مجرد كلام ليش مخك يروح بعيد فقلتلها مالك شغل ولا تقولين مرة ثانية جاسوسة وحتى لو أنا جاسوسة هذا حقي وزوجي وبيتي ومالك شغل شنو أسوي شنو بتحاسبيني قالتلي بس ليش ما تثقين في زوجك فقلتلها أنا ما أثق فيكي إنت مو بزوجي وهذا شي خاص فيني لا تدخلين . والله أشوف نفسي الحمد لله أحسن يعني بالأول أخاف أرد عليها بس الحين أقول ما يهمني أنا قاعدة أدافع عن بيتي وزوجي وحتى لو بكذب عليه وأقوله قالت أي شي بس أنا أطلع منها وبقوله هذا حقي وشنو هي ومنو هي أصلا علشان أسويلها حساب . وهذا بفضلكم إنتوا اللي عطيتوني القوة وعنتوني الله يسعدكم كلكم يارب .
عزيزتي أسيرة موني فتحت الخاص بس اشلون بفتحه لما حطيت صح على المربع الخاص ما طلعلي شي اسم المرور أو شي بجرب وبشوف بس ياريت تقوليلي عادي علشان غيري بعد يستفاد . اشرايك .
عزيزتي ديباجه . فعلا أنا أنظر لنفسي أقل من الطبيعي بس هذا شي طبيعي إذا فكرت شذي لأن اللي حوالي ما عطوني شي أقدر أغير هالنظرة يعني ما في تشجيع ودائما زوجي يقولي غبية ويحلف إنه ما في أغبى مني بالعالم ويشبهني بالهنود فاشلون تبيني أنظر لنفسي . يعني آخر مرة من يومين قال لبنتي الصغيرة إن شاء الله لا تنعدين من أمك لأن الحمد لله بنتي الصغيرة وايد حلوة ما شاء الله وذكية وايد ويسمعني دائما إنه خايف عليها لأحطمها أو أمحي هالذكاء فاشلون تبيني أفكر عن نفسي حتى قلت له الله يسامحك اللي يسمعك يقول إني أجهل من الجهل وأغبى من الغباء ما تشوف الحمد لله ابنتك الكبيرة من المتفوقين اشلون تقول شذي شان يقول للحين مو فاهمه نفسك . وما جادلته أكثر خوفا من المشاكل وانسحبت وطلعت برة الغرفة . فعلا مثل ما قلتي أهرب من المشاكل لأني دائما خسرانه وياه لازم يطلعك خسرانه وغلطانه ما في مجال بس مع غيره لأ أنا غير ما أسمح أحد يغلط علي بكلمه أو أكون مظلومه فيها وأتهم بشي صوتي يعلى خصوصا إذا كنت مظلومه بس وياه ما أقدر يختي أخاف منه واااايد ما أقدر أواجهه جسمي يرجف من الخوف . وبالنسبة لازم أعطيه رأيي ومو دائما أطاوعه جربت عدة مرات أقول لأ نسوي شذي أو نروح هالمكان فمثلا سوينا شي على حسب ما أنا قلت وطلع هالشي مو زين حط الخطأ كله علي ويقول هذا لأني طاوعتك ومشيت على رايك وقالي بعد كم مرة أنا ما أحب أمشي على شورك لأنه كله عوج . بهالحالة اشلون تبيني أعطيه رايي علشان شذي أقوله كيفك اللي تشوفه مناسب هذا دائما اللي أقوله .
حبيبتي أم عيالي أهلا وسهلا بك أخت وصديقة حياك الله . كلامك صحيح ما علمنا الخدامة حدودها وأنا وضحت الأسباب من قبل وفعلا طريقته طلعت خاطئة يمكن تكون صحيحة بس مو مع هالجنسية وحسب كل واحدة يعني في منهم يقدرون وفي منهم لأ يدوسونك ويانتظرون الوقت المناسب ويطعنونك من ظهرك . فعلا ما ينعطون وجه . وأنا وضحت إن بيتي شقة يعني غرفتها مع غرفة البنات بس لو عندي فيلا وإن شاء الله يصير إدعولي . ...... راح أخليها بعيده عنا وفعلا ترى قالي إني أغار منها كم مرة وحتى قالها إنها تغار مني بس هو فاهم خطأ بالنسبة لي مستحيل أغار من واحدة مثلها أبدا ...... سألتيني اشلون يتفاهمون مع بعض هي تتكلم الإنجليزي تفهم عربي شوي بس ما تقدر تتكلم مثلنا فالكلام بالبيت كله إنجليزي . ومثل ما قلت ما يقفلون الباب أبدا .

آآآآخر المستجدات متزاعلين مع بعض من يوم الجمعة وهو كارهها حيل والسبب قالها من الظهر يوم الجمعة أخذي وياك هالأغراض ضروري ولما صار الليل علشان نطلع وإحنا عند الباب قالها بصوت عالي وعصبية وين الأغراض مو ركزت عليك علشان تجيبيهم وينهم وشان تزعل مع إني ذكرتها قبل دقائق بس ما جابتهم فهم زوجي من هالشي إنها تبي تسوي خلاف وتحط الخطأ علي أنا المسؤولة ويصير زعل بيني وبين زوجي . طبعا زعلت وما عطاها وجه أبدا طول الطريق وصارت تبكي بالخفية ولما رجعنا البيت قالتله ليش صارخت علي ليش ما كلمتني شوي شوي بس أنا ما دريت إنها راحت عنده علشان تراضيه بس هو على حسب ما عرفت ما عطاها وجه وقالتلي شي ما صار ورحت سألت زوجي هي قالت شذي قالي لأ يعني كل كلامها كذب صار شي وقالتلي شي بس علشان تثير غيرتي واللي يقهر قالتلي ليش زعلان مني علشان أنا مسكت كرامته وقلتله هالكلام وسبها وتضايق منها زيادة وثاني يوم كنا قاعدين نسمع موسيقي وهي تبي تشوف فيلم شان تسكر الباب وتعلي صوت التليفزيون وهو شاف شذي وقال منو هالحمار اللي سكر الباب وفتح الباب بعصبية وشان تزعل زيادة وزوجي قالي مو على كيفها تسكر الباب شنو بيت أبوها تتحكم فينا . هذا آخر الكلام اللي صار بالأمس وقالي ودي ما يكون عندنا خدامة ونسوي كل شي على كيفنا .
اشرايكم يا حبايبي في تحسن صح . طبعا بفضل الله ثم بفضلكم.

يالله
الله يزيدكم تعلق ببعض ويخليكم لبعضكم ويكفيكم شر اللي عندكم
الحمدالله
ريحتينا والله

المشكله طويله وصفحاتها كثيرة جدا ..



اتمنى من اي عضوة تتكرم و ( تـلخص ) المشكله ولو بخمسه اسطر فقط حتى اكون ملم بالمشكله تقريبا ..


اعذروني على العجز

ااااااااااااه اعذريني يالغاليه بس رررفعتي ضغطي موووت
مدري احس فيك شي غررررريب شي مو طبيعي ابداااااااا كيف تخلين هالتافهه تسوي كل اللي تبغى مع زوجك
تقولين زوجك يتضايق من غيرتك( اسمحيلي ) وووووييين الغيره
وترى هي مااااااخذه عليك مررررررره الشغاله اذا انعطت وجهه الله يعين عليها وش يفكنا منها فما بالك وانتي معتبرتها شريكه لك في زوجك وبيتك لاوحتى تدخل غرفتك بعد
والله والله احس ان دمي يغلي
على الأقل يالغاليه حاولي تبعدين بناتك عن الموضوع كله
افرضي مثلا لو ارسلتي بنتك تراقب الوضع وشافت وضع مخزي وهي مازالت صغيره وش تستفيدين من الصدمه اللي بتوقع فيها بنتك
على العموم الله يصلح مابينكم ويهدي سركم

بصراحه الموضوع..
ان هذي السيده على ما فهمت انها ..ما لها كلمه قدام زوجها..

ودايم يقول عنها غبيه..والخدامه تعمل لزوجها مساج ..وفي

مشاكل بينهم ..