يا مدرسات رياض الاطفال الفزعة؟؟؟؟؟؟؟؟؟؟

شوفي حبيبتي أنا كنت معلمة روضة والحين موجهة رياض أطفال وبعطيج أفكار واااااايد بديكور الصف ولوحات العرض وكل شي بس الحين أنا رايحة الدوام بالمنطقة التعليمية لما أرجع ما يصير خاطرج الا طيب وبكتب لج كل اللي تبينه واللي شفته من بعض معلمات الفصول الللي أشرف عليها في الروضات واختاري اللي تبينه الحين عندي فكرة لما كنت معلمة سويتها وهي قماش الستائر يكون فيه رسومات أو شخصيات مثل بنات أو بعض شخصيات الرسوم المتحركة . القماش الللي يزيد من الستائر أقطع الشخصيات منه واخليها ديكور الصف مثلا كان في الستارة الدبدوب ويني أخذت صورة القماش للدبدوب ويني تقريبا عشرين قطعة وخليتها هي الشخصية الرئيسية في الصف مثلا يؤشر عند قسم الحلقة ، الدبدوب ويني عند لوحة العرض ، عند ركن المكتبة ، عند ركن الاستكشاف ، التعبير الفني ..... الخ
في لوحة الغياب عملت صورة بيضة مكسورة وبداخلها صورة الطفل ، لوحة الجو وايام الاسبوع سويت الدبدوب ويني بأوضاع مختلفة شايل شنطة ، على البحر ، ياكل ، يلبس ملابسه ، يغسل أسنانه ...بالنسبة لمسميات الأركان أنا عملت مثل اللوحات اللي نشوفها في السوبر ماركت والجمعيات اللي نازلة من السقف هي عبارة عن لوح فلين والصق فيه اسم الركن مع الصورة المعبرة واربط أطرافه بخيط الصيد الشفاف من جهتين واعلقه بسقف الصف كان وايد روعة ...اتأخرت على الدوام بكمل لج بعدين أي استفسار أن حاضرة حطي أسالتج وطلباتج و أنا في الخدمة ....لنا عودة انشاء الله

اسمحيلي اختي منايراتأخرت عليج ... توني واصلة من الدوام وقلت أشوف اختي الغالية مناير شو تبي مثل ما وعدتج حبوبة أول شي زين انج اخترتي اللون وبعده اختاري ديكور الصف على هذا الأساس أنا شفت وحدة من معلماتي مسوية صفها بالخيش الملون مال تغليف الهدايا وايد شكله حلو .. هي جابت ورق كاروهات أصفر مع أخضر ليموني وغلفته بالخيش البيج وحطت عليه الصور المعبرة عن الأركان ومسميات الأركان والشخصية كانت فراشة لها عيون لصقتها على طرف كل لوحة وتؤشر بجناحها للمكان ولوحة الغياب كانت مسوية تعرفين أكياس الهدايا الصغيرة اللي حجمها تقريبا 4سم جايبة منهم على عدد الأطفال ومعلقتهم على الحائط البنات بلون وردي والأولاد بلون أزرق وشو مسوية بصور الأطفال جايبة ورق مقوى مقطعته على حجم الكيس تقريبا وملصقة صورة كل طفل عليه اذا كان حاضر ويه الطفل للأمام واذا غايب الوجه للخلف يعطينا لون الورق فهمتي علي والا أشرح زيادة .
ممكن تسوين لون الستاير ولون أثاث ومخدات وفرش ركن التعايش الأسري ( التمثيل نفس اللون ) ومفارش الطاولات وأغطية الكراسي ...
في وحدة مسوية الأيام على شكل ساعة والمؤشر يتحرك عند اليوم اللي نكون فيه واللوحة مقسمة الى سبع أقسام وكل قسم فيه اسم اليوم وصورة تعبر ..
تعبت.... بتغدى وبكمل لج الباقي ...أكون وانا أتغدى أتذكر لج بعض الأشياء
اسمحيلي حبيبتي...

برجيس



مشكورة يا حياتي وفعلا استفدت منة :26: :26: :26:



مشكورة يا قلبي:24:

صدى الأشجان



انتي رووووعة وافكارك احلى بس تدرين اول ما قلتي انا موجة ورايحة للمنطقة اختبصت على بالي موجهتي


قلت لالالالالالالالالالا ما بي منها شي بس لما قريت طلعتي من الامارات وعلى فكرة منهجنا تقريبا نفس الامارات


علشان جذي احس انك فاهمة شلي ابية:24:



بالنسبة لفكرة تعليق اسماء الاركان روووعة وفكرت فيها ومادري اذا يصلح اخذ صور من برنامج عندي وثبتها علي الفلين واجلدها بس اخاف الفلين يخترب وما يدوم؟؟؟؟؟


بالنسبة للوحة الحضور والغياب حلوة طريقتك قشرة البيضة


بس على فكرة انا ابي اسويها من الخشب الخفيف وتكون صورة كبيرة مرسومة اومكبرة كخلفية


مثلا بيت والشبابيك تكون فيها صور الاطفال شرايك؟؟؟


وانا عندي مجموعة من الفراشات لونها ليموني مع بنفسجي ودي اوزعها على لوحة الانتاج بس شلون تكون الخلفية للوحة؟؟؟




واللة ادري مصختها بس حدي متوهقة وما شاء اللة عليك حسيت انك فاهمة اللي ابية علشان جذي ابيك تتحمليني




مناير:26:

الحبوبة مناير : أشكرج حبيبتي على ردج ومثل ما قلت لج أنا في الخدمة ولا تستحين واللي تبينه أنا حاضرة :
بالنسبة للوحة الانتاج : الخلفية خليها بنفسجي وقسميها الى مستطيلات بشرائط صفرة ليمونيةوالمستطيلات هاذي بتحطين داخلها انتاج الأطفال ووزعي الفراشات على انتاج الأطفال أو عند اسم لوحة انتاج الأطفال فقط بس نصيحة حبيبتي خلي لوحة انتاج الأطفال في مستوى الطفل علشان بنفسه يعلق انتاجه ويفرح فيه.
بالنسبة لأسماء الأركان عادي حبيبتي اختاري الصور اللي تبينها وغلفيها حراري مع اسم الركن وبعدين لصقيها باللاصق ذو وجهين على الفلين ما بيخترب اذا استخدمتي صمغ الأوهو بيخترب ..

ملاحظة : لهالدرجة الموجهات يخوفون .. نصيحة : لا تسوين حاجز بينج وبين الموجهة أنا مثلا أنزل لمستوى معلماتي واعامل كل وحدة على انها صديقتي المقربة ونتبادل الايميلات والمسجات والمكالمات الهاتفية والكل الحمدلله يرتاح لي ويشكي له مشاكله في العمل والبيت .. الموجهات مثلكم لا تخافون منهم بس افهمو انهم في خدمتكم علشان تكونون أحسن الناس .. الأم من عندها مب عيالها وتحب تفتخر فيهم عند كل الناس .. نفس الشي الموجهة تحب تفتخر بمعلماتها وبانجازاتهم .. لا تحسبيني كبيرة في السن معظم معلماتي أكبر مني .. أنا صغيرة في السن ...وما شاء الله عليكم يا بنات الكويت كلكم فن وذوق اللي أشوفه في برنامج ماما أنيسة عن رياض الأطفال يدل على ذلك .. أتمنى لج الوفيق حبيبتي والمزيد من العطاء والتميز..

لا تستحين اسألي اللي بخاطرج واذا تتفاعلين معاي عالخاص أنا مستعدة بعد ...
اليوم الخميس اجازة .. ما عندي دوام متفرغة على النت لحد الساعة 2 ظهرا وبعدين بطلع دبي تبين شي من هناك ..