يراسلني بيوم ملكته على حرمه تكبرني سنا💔

السلام عليكم يابنات
اول شي انا راضيه بمكتوب الله والحمدلله احس بربط على قلبي وراح اواجه كل الصعوبات لان مافي شي يسوى لكن من اللي صار لي نحتاج مشورة بعضكم وخاصه للي مرت بنفس قصتي
انا وولد عمي تزوجنا عن حب عمري٢٣ وهو٣١ كان يهديني قبل الملكه وهو اللي لزم على اهله الا ياخذني عشنا مع بعض خمس سنوات عندي منه ولد ودرست معاه الجامعه ماكان بيننا ذاك المشاكل يادوب استفزاز ومناقره ونرجع نتراضى بس هالسنه سبحان الله غير😭 زوجي مايقصر علي والله لكن فيه فيه بعض التصرفات الغريبه ونكدي ويهدد بالزواج على ادنى سبب احس ماعنده ثقه بنفسه وعنده وسواس قهري مرض بشهر١١ ووقفت معه عالعلاج النفسي واغصبه عالحبوب لين الحمدلله تحسن كثير وله فتره يهددني بالزواج ويرسل لابوي تراهي ماتنام سهرانه عالجوال وانا اسهر عشاني كنت ترم تخرج مشغوله ببحوثي سبحان الله احس من ضغوط الجامعه مع اسلوبه اخر الشهور ومعاناتي معه بمرضه والوحم اللي مريت فيه كرهته كره وقلت خلاص بتخرج واروح لاهلي انت ناكر جميل ولا وقفت معي بس ترسل لابوي وش اسوي وما اسوي فشلني معه المهم حملت بشهر ٢ وتوحمت بوحم سيء جدا لدرجة كنت اصلي الفروض جمعا من شدة مافيني من تعب ورفض يجيب لي شغاله تساعدني لاني كنت اخر ترم فالجامعه المهم جت امي من الجنوب عشاني وبس يجرح فيني تو امي وانها بخير مافيها شي هنا انا زعلت بقوه وحلفت اني لا اروح ولا ارجع وفعلا رحت مع امي لديرتنا وجالس يهدد اسيل والله اني اتزوج قلت انت ليش تهددني اذا ماتبغاني طلقني وتزوج وشوف حياتك انا ماعاد ابغاك وانت كذا معي ورافض التحاور ورافض اصلا انك تتعدل وجلست شهرين عند اهلي وجو عماني يصلحون بيننا قلت خلاص برجع عقب ولادتي عشانهم توام وهو عيا من الشغاله وسويت له حظر وارجع افكه يقول ارجعي ابغاك ترى اذا صديت ماتعرفيني انا حبيتك وشفتي نفسك!! قلت جيت زعلانه يعني ارجع واحنا ماحلينا مشكلتنا وتفاهمنا ويقول اشياء ماكان يقولها ومشكلتنا بسيطه بامكانه يجي ونتفاهم ونرجع احسن بس هو فيه حب القاله والسمعه انه مايخطي ولا اهتم لتعبي مع الحمل
والله اني تحملت اشياء توجع بسني هذا
تخيلوا يابنات تملك قبل شهر على وحده ارمله معها ثلاث عيال عمرها٣٢ وقام يرسلي اسوله تراني ملكت تبغين تعرفين ع من ملكت!! ويرسلي صوره ويقول انتي حبيبتي الاولى وام اولادي ومستحيل اتنازل عنك وادعي لي بالتوفيق من الصدمه قلت لامي شكله يمزح يبغى يشوف وش بقول تخيلوا اني حامل في اثنين وتعبانه وفوق هذا بيننا مشكله بسيطه ولا جاء حلها وخذ بخاطري لكن حلها بمشكله اكبر ويقول استخرت وارتحت قلت مالقيت تستخير الا يومنا متزاعلين ومالي شهرين ماقدرت تستخير وتدعي ربي يصلح شاننا حسبي الله عليه و زواجه هذا فاشل ماله اي مبرر ويبغى يواجهني فيه واني قدرت اتزوج تراني مطنوخ مع اني ماتحديته بس هو مسكين شاك في نفسه عشان يثبت لاخوياه اني كفو
اللي مو مستوعبته التعدد عندنا نادر جدددا ومايعددون الا لسبب انا احس محد نفس قصتي لا من قريب ولا من بعيد وشكلي غلط وعلي ضره بهالعمر وربي اقوم من النوم اقول ليته حلم😭😭 كل عماني واجهووه ورفضوا يباركون له وكمان خواله محد بارك له وكلن يدعي عليه واهلي زعلوا خاصه ابوي واخوي مقاطعينه مايردون ع اتصالاته ويروح يدق عالناس يقول ليش ماتباركون لي هي اللي سمحت لي اتزوج وماعاد تبغاني الله يكسره خذها عذر
طبعا يابنات صار مشاكل عشان الناس وقفو ضده وامه تبكي ماكانت راضيه يتزوج وراح غصب عن اهله
ويراسلني برقم ثاني يترجاني ارجع ويحلف مايطلقني ويقول والله انها طيبه وانها ماتضرك ههههههه ياربي هذا بزر كيف يعدد وهذي علومه انا تزوجتها عشان اخذ فيها اجر ارمله وايتام ومنها تتغير حياتي معك للاحسن ويمكن بيننا انا وانتي حسد ولا عين ومنها اصير اشتاق لك اكثر كان يقولي زمان كذا لكن والله انه نكب نفسه ونكبوه خوياه اللي يهايطون بالتعدد
اللي اخذها شارطه يقعدون عيالها معها اكبرهم باول متوسط ووافق تخيلوا وهو اصلا يالله يشيل ولده ماهو حق مسؤوليه كبيره هي بنت حلال واخلاقها طيبه وامي تعرفها لكن الضره محد يبغاها لو انها نازله من الجنه
جلس فتره يراسلني فالليل كاني انا خطيبته الجديده ويحاولني ارجع له وجه بعد واطنشه اما هالاسبوع لقيته مسوي لي حظر ويقول والله ان تتعدلين ويقر عقلك انتي ماعاد تبغيني اذا تبيني بيتك مفتوح ماتبين بكيفك لكن مابطلقك فجاه تغير اسلوبه وصار قاسي ويكلمني برسميه قصده اني بغار واجي اسعى له ولا عاد راسل ولا شفت منه اي شي وغيرت رقمي وتعبانه من كل مكان طاحت شيمته فيني
ادعوا لي حبيباتي بالخيره الطيبه ولادتي بشهر١٠ بنفس شهر زواجه
و الحمدلله من قال اني انا وهو بنوصل لكذا😔 رغم ان مشكلتنا تافهه جدا وجدا وزواجه المتهور عقدها
اعطوني نصايحكم لو انكم بمكاني