هلا وغلا وحياكم الله
انا والله من زمااااااان وانا ودي اتكلم عن الظواهر الخارقه للطبيعه اللي قاعده اشوفها في العروس
الناس عادة تروح للعروس والبنات يعرفون هالشي طبعا عشان يتفرجون على الفساتين المكياج الرقص بس انا يامحاتسيتكم اروح عشان اتفرج على المصارعه
الحره اوالسمره او الاصلاحيات والاحداث الاصلاحيات اقصدبها الوراعين اللي ياكثر مااشك ان امه وابوه قبل لايجون العرس يقولون له هاك مية ريال بس
العن ابو خير العرس انا مره سمعت شيخ يقول ليش تكتبون في بطاقات الزواج ممنوع اصحاب الاطفال وقام ينقدهم ويقول الاطفال هم الفرحه والبهجه والبركه
وانا اقول ياحليلك ياشيخ والله انك برئ هذولي اللي تتكلم عنهم اطفال الانس بس وراعين الجن وش الدبره معهم لان بصراحه اللي اشوفهم في العروس مو
اطفال نسل التتار والمغول يوم زواج اختي كنت واقفه على الزاويه مسويه فيها ثقل وفيه ورع قاعد يخزني بنظرات الظاهر لو معه بلكه كان حفرة نفق في
وجهي قلت شفيك قال انقلعي قلت انقلع انت لابوك لا بو من عزمك ( طلع احنا اللي عازمينهم
) هذا غير القواطي اللي تفلقنا ولا اللي يرمي النعله علىخويه لينه صاك خشم عجيز نزل معها السكر وسروبها للمستشفى,,غير العصيرات اللي مسويه فياضانات بنقلاديش في الاسياب هنا عاد ماياكلها غير اللي
يكون لفستانها ذيل تذكرون صمغ الفيران من اول كيف نحطه ويلزقون فيه ابد نفس الشي عشان كذا كل وحده جايبه سيلانيتها تقشع لها ثوبها كل مالزق واتوقع
والله اعلم الوراعين يوم انهم هايتين في العروس بسبب انشغال الشغاله في قشع ثوب المدام
بس فيه حركه والله محيرتني من جد حتى اني رجعت لابحاث وكتب عادات وتقاليد الشعوب ومالقيت لها تفسير وهو اذا رقصت وحده رااااااااايقه وورعها يجاغر تحت رجلينها يلعن ام الروقان ياشيخ ماسك فستانها وهات
يادموع من عيونه وبلاوي من خشمه والمصيبه ليا حنت عليه شالته وقامت ترقص به عشان تضمن انها لوعت تسبودنا صدق.. ياخي امسحي خشمه بكمك
بفستانك ثم سوي اللي تبينه بس انا اقترح للاخوات اللي يسون هالحركه ولابد ياختي قطعتين قطن بريال ماتكلف شي من الصيدليه ادحسيها في خشم
ورعتس ,,بس بصراحه انا متى تكون متعتي اذا حضرت عرس فيه مصارعه ياسلام اتوقع لو مكمان يحضر عروسنا تبنى مواهب بعض الحريم يجونكم ثنتين
مكهرب الجو بينهم مسبقا تقوم وحده ترقص وتسوي حركات نص كم للثانيه تقوم الثانيه ترقص وتسوي حركات بدون كم للاولى بعدين تنزل الثانيه وترمق
الاولى بنظرة الفكتوري والنصر عاد الاولى تقول مامشيها لك وانا اخت عماش وتجي عند حافة المنصه وتسوي حركة جيم سنوكا ترفع يدينها وتطير على
الثانيه الين ساوتها بالبلاط عاد ترمي الطقاقه الطار وتجي طايره من فوق المنصه تنبطح عندهم وتقولone two three وترفع يد الاولى وتقول
champian دبشthe winner of the ww وتعطيها المحزم يقال الحزام حق المصارعه
عاد الثانيه تجي اخواتها وامها مديرة اعمالها ويشيلونها وياقفون عند باب الصاله ويتوعدون الاولى بمنازله اخرى الخميس الجاي في عرس ال فلان
وتعال شف اذا كان فيه بوفيه اثر الذبايح من اولمسويه فينا معروف وساتره فضايح تجيك الاخت معها صحن كبر راس ورعها اللي يمشي خشمه وتحط فيه كل الاكلات الموجوده على الطاوله وحده مسكت
خط وصلت المغاسل بغت تحط التايد في صحنها
وليا خبصت الدنيا طلعت كيس زباله وغرفت لابو الشباب وباقي الربع في البيت قايلن لها جيبي لنا عشىماحنا مسوين شي انا بصراحه اشجع الاخوان المقبيلين على الزواج يكتبون في بطاقاتهم الرجاء تناول العشاء قبل الحضور واخر شي بتكلم عنه هو الزيران
هذا عاد سالفه بلحالها تستنزل عليك الخاله وتزبد وتطيح عاد الجماعه عارفين لها يقومون يطقون لها واذا ماتحركت يطقون وحده ثانيه
في الاخير اتمنى من الجهات المختصه انا عارفه مافيه بس اعشم نفسي تحاول تقضي على هالظواهر الخارقه للطبيعه عشان اقدر احس اني رايحه لعرس ...
منقول